امریکی فوج نے اتوار کے دن کہا ہے کہ مشرقی افغانستان میں ایک خودکش حملے میں نیٹو کے ریزولیوٹ اسپورٹ مشن سے وابستہ تین فوجی مارے گئے ہیں۔ یہ حملہ افغان صوبے پروان کے دارالحکومت چاریکار کے نواحی علاقے خالازئی میں کیا گیا۔ ان فوجیوں کا تعلق چیک جمہوریہ سے بتایا گیا ہے۔ چیک فوج نے اپنے تین فوجیوں کے ہلاک ہونے کی تصدیق کر دی ہے۔۔

پروان صوبے کے گورنر کے ترجمان نے بھی حملے کی تصدیق کرتے ہوئے بتایا کہ غیر ملکی اور افغان فوجی دستے معمول کی گشت پر تھے، جب یہ حملہ کیا گیا۔ نیٹو کے فوجی حکام اور افغان سکیورٹی فورسز کے ذمہ دار حلقوں نے اس خودکش حملے کی باقاعدہ تفتیش شروع کر دی ہے۔

ہلاک ہونے والے غیر ملکی فوجیوں کی شہریت کا اعلان پہلے تو نہیں کیا گیا لیکن اب کی قومیت بتا دی گئی ہے کہ یہ چیک جمہوریہ سے تعلق رکھتے ہیں۔ نیٹو کی پالیسی کے تحت حملے کے فوری بعد مرنے والے فوجی کی شہریت کو عام نہیں کیا جاتا ہے۔

امریکی فوج کے کمانڈر جنرل جان نکلسن نے فوجیوں کی ہلاکت پر شدید افسوس کا اظہار کرتے ہوئے کہا کہ ان فوجیوں کی ’قربانی ہمیشہ زندہ رہے گی‘ اور یہ رائیگاں نہیں جائے گی۔ انہوں نے یہ بھی کہا کہ ان فوجیوں کی ہلاکت نے مقصد کے حصول کی جانب ارادوں کو مزید تقویت دی ہے۔

یہ امر اہم ہے کہ مشرقی افغانستان میں امریکی فوجی دستے تعینات ہیں اور بعض مقامی ذرائع کے مطابق ہلاک ہونے والے فوجیوں کا امریکی فوج سے تعلق ہو سکتا ہے لیکن یہ اندازہ غلط ثابت ہوا ہے۔۔ مغربی دفاعی اتحاد کے افغان مشن کے بیان کے مطابق ایک امریکی اور دو افغان فوجی زخمی بھی ہوئے ہیں۔ ہلاک ہونے والے فوجی پیدل گشت پر تھے کہ انہیں خودکش حملہ آور کے حملے کا سامنا کرنا پڑا۔

طالبان نے اس حملے کی ذمہ داری قبول کر لی ہے۔ افغان طالبان کے ترجمان ذبیح اللہ مجاہد نے ذمہ داری قبول کرتے ہوئے کہا کہ اس خودکش حملے میں آٹھ امریکی فوجیوں کی ہلاکت ہوئی ہے۔ مجاہد کے مطابق غیر ملکی حملہ آوروں نے اپنی لاشوں کو سنبھالنے اور زخمیوں کو ہسپتال پہنچانے کے لیے تین ہیلی کاپٹر ایمبیولینسز کو بھی حملے مقام پر پہنچایا تھا۔

طالبان سن 2001 سے افغانستان میں اسلامی شریعت کے نفاذ کے لیے مسلح سرگرمیوں کا سلسلہ جاری رکھے ہوئے ہیں۔ طالبان کا یہ حملہ ایسے وقت میں ہوا ہے جب چند دن قبل اس کے نمائندوں نے قطر کے دارالحکومت دوحہ میں ایک اعلی امریکی اہلکار سے مبینہ ملاقات کی تھی۔