افغانستان سے امریکی فوجی انخلا کا اعلان اور کرزئی کا خیرمقدم
29 مئی 2014![](https://static.dw.com/image/16939883_800.webp)
منصب صدارت سے اگلے ماہ کے دوران فارغ ہونے والے افغان صدر حامد کرزئی نے امریکی افواج کے انخلا بارے صدر اوباما کے بیان کا خیر مقدم کیا ہے۔ کرزئی نے کہا ہے کہ افغانستان سے امریکی فوجی سن 2016ء تک نکل جانے کا اعلان ایک استحسانی قدم ہے۔ کرزئی کے مطابق اس اعلان سے طالبان عسکریت پسند وں کو اپنی مسلح جدوجہد ختم کرنے کے علاوہ کابل حکومت کے ساتھ امن بات چیت کو آگے بڑھانے کے لیے ایک اہم وجہ مل جائے گی۔ یہ امر اہم ہے کہ کرزئی افغانستان میں امریکی فوجی آپریشنز پر کڑی نکتہ چینی کے ساتھ ساتھ دو طرفہ سکیورٹی معاہدے پر دستخط سے بھی انکاری ہیں۔
واضح رہے کہ امریکی صدر باراک اوباما نے منگل کے روز کہا تھا کہ رواں برس کے اختتام تک افغانستان میں صرف نو ہزار آٹھ سو فوجی رہ جائیں گے، جو سن 2016 تک افغانستان سے نکال لیے جائیں گے۔ صدر اوباما کا تاہم کہنا تھا کہ افغانستان میں امریکی فوجیوں کا قیام صرف اسی صورت میں ہو گا، جب نئے افغان صدر امریکا کے ساتھ باہمی سکیورٹی معاہدے (BSA) پر دستخط کر دے گا۔ واضح رہے کہ اس معاہدے پر صدر کرزئی نے دستخط کرنے کے فیصلے کو جلد ہی برسراقتدار آنے والے نئے صدر کے لیے مؤخر کر رکھا ہے۔ افغانستان میں کرزئی کی جگہ نیا صدر چودہ جون کو ہونے والے صدارتی الیکشن کے دوسرے مرحلے میں منتخب کیا جائے گا۔
مبصرین کا خیال ہے کہ کابل اور واشنگٹن کے درمیان باہمی سکیورٹی معاہدے پر وقت پر دستخط ہو جائیں گے کیونکہ دوسرے مرحلے میں شریک دونوں صدارتی امیدوار اِس ڈیل پر دستخط کرنے کو واضح طور پر اپنی اپنی انتخابی مہم کے دوران بیان کر چکے ہیں۔ صدارتی امیدواروں میں سابق وزیر خارجہ عبداللہ عبداللہ اور ماہر اقتصادیات و سابق وزیر خزانہ اشرف غنی احمد زئی شامل ہیں۔ اس باہمی معاہدے کے تحت امریکا افغان فوج و پولیس کی تربیت جاری رکھے گا۔ اِس تربیت کا مقصد افغان سکیورٹی فورسز کو انسداد دہشت گردی ، القاعدہ اور دوسرے انتہا پسندوں کے خلاف بھرپور کارروائیوں کے لیے تیار کرنا ہے۔
بدھ کے روز افغانستان میں امریکا اور اتحادی فوج کے اعلیٰ ترین کمانڈر جنرل جوزف ڈنفورڈ کی جانب سے جاری ہونے والے بیان میں کہا گیا کہ صدر اوباما کی جانب سے فوج کے انخلا سے متعلق بیان نے بےیقینی کی دھند کو ختم کر دیا ہے۔ جنرل ڈنفورڈ نے امریکی صدر کے بیان کو مناسب اور بہتر قرار دیا۔ امریکی جنرل نے اپنے بیان میں واضح کیا کہ یہ پیغام اُن قوتوں کے لیے بھی ہے جو یہ کہتی پھرتی تھیں کے رواں برس کے اختتام پر امریکا افغانستان کو تنہا چھوڑ دے گا اور اب واضح ہو گیا ہے کہ ایسا کہنے والے صحیح نہیں تھے۔