افغانستان کے ايک اعلٰی حکومتی مشير نے کہا کہ دنيا کے غريب ترين ممالک میں سے ایک افغانستان ميں شاديوں کے حد سے زيادہ اخراجات کو کم کرنے کے مجوزہ قانون کی مخالفت بہت سے قانون ساز يعنی اراکين پارليمان بھی کر رہے ہيں۔

2001 ميں بچت پر بہت زور دينے والی طالبان حکومت کے امريکی فوج کے ہاتھوں خاتمے کے بعد افغانوں نے بہت پر تعيش انداز ميں شادیوں کی تقريبات منانے کا سلسلہ دوبارہ شروع کر ديا جن پر ہزاروں ڈالر خرچ کيے جاتے ہيں۔ يہ ايک ايسے ملک ميں ہو رہا ہے جس ميں اوسط سالانہ آمدنی 400 ڈالرز سے بھی کم ہے۔ ليکن دولھا کے خاندان والوں کی شکايات پر، جنہيں تمام اخرجات ادا کرنے اور دلہن کے ہر مطالبے کو پورا کرنا ہوتا ہے، حکومت ايسے نئے قوانين وضع کرنے پر کام کر رہی ہے جن کے ذريعے شادی کی تقريبات ميں مہمانوں کی تعداد کو 300 تک محدود کر ديا جائے۔

وزارت قانون کے مشير قاسم ہاشم زئی نے کہا: ’’وزارت قانون ميں اس پر غور کيا جا رہا تھا کہ شادی کے اخراجات کو ضوابط کا پابند بنايا جائے تاکہ دولھا والوں کو بہت زيادہ تکليف نہ اٹھانا پڑے۔ ليکن پھر خاص طور پر بعض ماہرين نے کہا کہ يہ ايک نجی معاملہ ہے اور ہميں پرائيويٹ امور ميں مداخلت نہيں کرنی چاہيے۔‘‘

افغانستان ميں شاديوں کی تقريبات پرتعيش ہوٹلوں يا ہالوں ميں ہوتی ہيں جن ميں ملبوسات، کھانوں اور موسيقی پر بہت زيادہ پيسہ خرچ کيا جاتا ہے۔ دلہن والوں کی طرف سے پوری برادری کو مدعو کيا جاتا ہے۔

پچھلے سال افغان حکومت نے پر تعيش شاديوں اور جہيز پر پابندی لگا دی تھی جس کا اطلاق صرف کچھ علاقوں پر ہوتا تھا۔ اس کا مقصد نوجوانوں کو شادی کے ناقابل برداشت اخراجات کی وجہ سے شادی کو ملتوی نہ کرنے کی ترغيب دلانا تھا۔ اس کے بعد سے حکومت شاديوں پر فضول خرچی کو روکنے کے ليے اسی قسم کے قوانين پورے ملک ميں نافذ کرنے کی کوشش کر رہی ہے۔

نئے قانون ميں عورتوں کے بغير بازو والے ايسے ملبوسات پر بھی پابندی لگائی جائے گی جن سے جسم بہت کھل جاتا ہے اور جن پر قدامت پسند مسلمان اعتراض کرتے ہيں۔ ناقدين کا کہنا ہے کہ يہ قوانين طالبان کے دور کے ضوابط کی واپسی ہے، جن کے تحت شاديوں کی تقريبات کی نگرانی کی جاتی تھی تاکہ اُن ميں موسيقی کی ممانعت سميت دوسرے اسلامی قوانين کی خلاف ورزی نہ ہو۔

ہاشم زئی نے کہا کہ خود صدر حامد کرزئی کی کابينہ ميں بھی مجوزہ قانون کی کافی مخالفت پائی جاتی ہے۔ انہوں نے کہا: ’’اگر پارليمنٹ ميں قانون منظور ہو جاتا ہے تو پھر اس کا نفاذ ممکن ہے ليکن بہت سے لوگوں کا يہ خيال ہے کہ شادی ايک نجی معاملہ ہے اور اس ميں مداخلت نہيں ہونی چاہيے۔‘‘

ہاشم زئی نے يہ بھی کہا کہ عملی طور پر اس قانون کا نفاذ تقريباً نا ممکن ہوگا کيونکہ اس صورت ميں حکومتی اہلکاروں کو ہر شادی ميں شريک ہونا، مہمانوں کی تعداد گننا اور اخراجات کا اندازہ لگانا ہوگا۔ انہوں نے کہا کہ ممکن ہے کہ بعض لوگ دلہن والوں سے کہيں گے کہ قانون کے تحت آپ ہم سے 300 سے زيادہ مہمانوں کو مدعو کرنے کا مطالبہ نہيں کر سکتے۔ اس طرح کچھ تبديلی تو آ سکتی ہے ليکن ميرے خيال ميں شادی کی تقريبات کی نگرانی بہت مشکل کام ہے۔

sas,aba/Reuters