آج صبح مشرقی صوبے ننگرہار کے شہر جلال آباد میں، جو دارالحکومت کابل سے 150 کلومیٹر کے فاصلے پر واقع ہے، ایک خود کُش کار بم حملے میں کم از کم دو انٹیلیجنس افسران ہلاک اور تین زخمی ہو گئے۔ صوبائی حکومت کے ترجمان احمد ضیاء عبدالزئی کے مطابق نیشنل ڈائریکٹوریٹ آف سکیورٹی کی عمارت کے گیٹ پر کیے جانے والے اس حملے میں کوئی شہری زخمی نہیں ہوا۔ مزید یہ کہ عمارت کو نقصان پہنچا ہے۔ طالبان کے ترجمان ذبیح اللہ مجاہد نے اس حملے کی ذمے داری قبول کرتے ہوئے دعویٰ کیا ہے کہ اس حملے میں 14 انٹیلیجنس افسران ہلاک ہوئے۔

طالبان کے ترجمان نے اس حملے سے کچھ ہی پہلے مشرقی صوبے لوگار کے دارالحکومت پل عالم میں ایک ہائی وے پولیس چیک پوائنٹ پر ہونے والے اُس حملے کی بھی ذمہ داری قبول کرنے کا اعلان کیا، جس میں ایک حملہ آور نے اپنی بارود سے لدی وَین دھماکے سے اڑا دی تھی۔ اس حملے میں ایک پولیس اہلکار ہلاک ہو گیا۔

اسی صوبے کے ضلع باراکی بارک میں ایک خود کُش حملہ آور نے پولیس ہیڈ کوارٹر میں گھسنے کی کوشش کی اور روکے جانے پر خود کو دھماکے سے اڑا دیا۔ ایک پولیس اہلکار زخمی ہو گیا۔

اُدھر آج ہی افغان دارالحکومت کابل کے غیر ملکی سفارتخانوں والے علاقے میں سکیورٹی فورسز نے ایک موٹر گاڑی میں بیٹھے ایک مشتبہ خود کُش حملہ آور کو گولی مار کر ہلاک کر دیا۔ ابتدائی رپورٹوں میں حملہ آوروں کی تعداد دو بتائی گئی تھی اور کہا گیا تھا کہ ایک حملہ آور بچ نکلنے میں کامیاب ہو گیا ہے۔ تاہم کابل پولیس کے سربراہ محمد ایوب سالنگی نے کسی دوسرے حملہ آور کی موجودگی کی خبروں کو مسترد کرتے ہوئے کہا ہے کہ واحد حملہ آور کو ہلاک کر دیا گیا ہے اور اُس کی گاڑی میں نصب بم کو ناکارہ بنا دیا گیا ہے۔

خبر رساں ادارے اے ایف پی کے ایک فوٹوگرافر کا کہنا ہے کہ اُس نے ا یک زیر تعمیر عمارت کے قریب ایک کار میں ایک نوجوان شخص کی خون میں لت پت لاش پڑی دیکھی ہے، جسے سر میں گولی مار کر ہلاک کیا گیا۔ یہ وہی زیر تعمیر عمارت ہے، جہاں گزشتہ سال اپریل میں بھی طالبان حملہ آوروں اور سکیورٹی فورسز کے درمیان کئی گھنٹے تک فائرنگ کا تبادلہ ہوتا رہا تھا۔

بتایا گیا ہے کہ کابل میں زیادہ تر سرکاری دفاتر اور غیر ملکی سفارت خانے وزیر اکبر خان نامی علاقے میں واقع ہیں اور اسی علاقے میں آج اس ممکنہ خود کُش حملے کو ناکام بنا دیا گیا۔ جہاں طالبان کے ترجمان ذبیح اللہ مجاہد نے جلال آباد اور پل عالم کے حملوں کی ذمے داری قبول کی ہے، وہاں یہ کہا ہے کہ کابل میں جس حملےکو ناکام بنایا گیا ہے، اُس سے طالبان کا کوئی تعلق نہیں ہے۔

خبر رساں ادارے روئٹرز کے مطابق گزشتہ بارہ مہینوں سے افغانستان میں پُر تشدد واقعات میں اضافہ دیکھنے میں آ رہا ہے۔ ایسے میں یہ سوال سامنے آ رہا ہے کہ کیا 2014ء کے اواخر میں غیر ملکی فوجی دستوں کے انخلاء کے بعد ساڑھے تین لاکھ سپاہیوں پر مشتمل افغان سکیورٹی فورسز واقعی ملک میں امن و امان قائم کر سکیں گی؟

(aa/ai(afp,reuters