حکام کے مطابق برسلز میں منعقدہ اس دو روزہ اجلاس میں مغربی دفاعی اتحاد نیٹو کے وزرائے خارجہ 1990ء کے بعد سے اب تک کے سب سے سرگرم کردار کو مزید مربوط بنانے اور بلقان ریاستوں سے لے کر افغانستان تک پھیلے مختلف آپریشنز کے حوالے سے گفت و شنید کریں گے۔ اس کے علاوہ نیٹو ممالک میں دفاعی بجٹ میں کٹوتیوں کے تناظر میں یہ بھی دیکھا جائے گا کہ لیبیا سمیت متعدد ممالک میں نیٹو ممالک کس طرح مزید سرگرم کردار ادا کر سکتے ہیں۔

خبر رساں ادارے اے ایف پی کے مطابق نیٹو ممالک کے وزرائے خارجہ اس ملاقات میں تیزی سے تبدیل ہوتی دنیا کے چیلنجز سے بہتر انداز سے نمٹنے کے لیے سیاسی اور اقتصادی صورتحال کے ساتھ ساتھ عسکری طاقت کے بہتر اور مثبت استعمال کا جائزہ بھی لیں گے۔ حکام کے مطابق اس ملاقات میں 28 رکنی اتحاد کے علاوہ پارٹنر ممالک بھی شریک ہیں۔ اس اجلاس میں یہ جائزہ بھی لیا جا رہا ہے کہ شامی کیمیائی ہتھیاروں کی تباہی کس طرح ممکن بنائی جائے۔

مشرقی یورپ میں میزائل دفاعی نظام کی تنصیب اور ایران کی جانب سے حال ہی میں متنازعہ جوہری پروگرام کی بابت ایک عبوری معاہدے پر دستخط کا معاملہ بھی اجلاس کے ایجنڈے میں شامل ہے۔

برسلز میں امریکی اور روسی وزرائے خارجہ کی ملاقات بھی ہو گی، جس میں یوکرائن اور جورجیا کے موضوعات بھی بحث کا حصہ ہوں گے۔ حال ہی میں یوکرائن کے صدر وکٹور یانوکووچ نے یورپی یونین کے ساتھ شراکت داری کے ایک معاہدے کو منسوخ کرنے کا اعلان کیا تھا، جب کہ روس کے ساتھ کشیدہ تعلقات کا حامل مشرقی یورپی ملک جورجیا یورپی یونین کے ساتھ ایسے ہی ایک معاہدے پر دستخط کرنے جا رہا ہے۔ یورپی یونین الزام عائد کرتی ہے کہ روس نے یوکرائن پر دباؤ ڈال کر اس معاہدے پر دستخط رکوا دیے۔

خبر رساں ادارے اے ایف پی کے مطابق اس ملاقات میں تاہم اہم ترین موضوع افغانستان کا ہو گا، جہاں صدر کرزئی نے امریکا کے ساتھ باہمی سکیورٹی معاہدے پر دستخط اگلے برس اپریل میں صدارتی انتخابات تک ٹالنے کا اعلان کیا ہے۔ اس معاہدے کے تحت سن 2014ء میں افغانستان سے غیر ملکی فوجی انخلاء کے بعد بھی وہاں نیٹو فوجیوں کی تعیناتی ممکن ہو پائے گی۔ اس بابت واشنگٹن حکومت نے خبردار کیا ہے کہ اگر رواں برس کے اختتام تک صدر کرزئی نے اس معاہدے پر دستخط نہ کیے تو امریکا افغانستان سے اپنے تمام فوجی نکالنے کا فیصلہ کر سکتا ہے کیوں کہ دوسری صورت میں وہ مستقبل کی منصوبہ بندی کرنے سے قاصر ہو گا۔

موجودہ منصوبے کے مطابق کابل حکومت کی جانب سے اس معاہدے پر دستخطوں کی صورت میں نیٹو ممالک افغانستان میں آٹھ تا بارہ ہزار فوجی تعینات کر پائیں گے، جس کا مقصد افغان سکیورٹی فورسز کی تربیت اور معاونت ہو گی۔ اے ایف پی کے مطابق صدر کرزئی نے اس معاہدے پر دستخطوں کے لیے نئی شرائط بھی رکھ دی ہیں، جس کے ذریعے وہ خود کو ایک محب وطن اور آزاد رہنما منوانا چاہتے ہیں۔

دوسری جانب ایران کی جانب سے صدر کرزئی سے کہا گیا ہے کہ وہ اس معاہدے پر دستخط نہ کریں۔ ایرانی وزارت خارجہ کی جانب سے کابل حکومت کے لیے یہ اپیل ایک ایسے موقع پر کی گئی ہے، جب صدر کرزئی اگلے ہفتے ایران کا ایک دورہ کرنے والے ہیں۔ ایرانی وزارت خارجہ کی جانب سے کہا گیا ہے کہ ایران نہیں سمجھتا کہ یہ ڈیل افغانستان کے مفادات کا تحفظ کر سکتی ہے اور اس سے افغانستان کو کسی طرح کا کوئی فائدہ نہیں ہو گا۔