افغانستان کےصدارتی انتخابات کے متنازعہ نتائج پر پاکستان کی تشویش
8 جولائی 2014![](https://static.dw.com/image/17767399_800.webp)
افغانستان میں پیر کے روز سامنے آنے والے ابتدائی نتائج کے مطابق اشرف غنی نے 14 جون کو ہونے والے صدارتی انتخابات کے دوسرے مرحلے میں 56 فیصد سے زائد ووٹ حاصل کیے ہیں، جبکہ ان کے مخالف امیدوار عبداللہ عبداللہ 43 فیصد ووٹ حاصل کر سکے۔
تاہم عبداللہ عبداللہ کی جانب سے انتخابی نتائج کو تسلیم کرنے سے انکار اور منگل کو کابل میں اپنی کامیابی کے اعلان نے صورتحال کو تبدیل کر دیا ہے۔
پاکستان نے سرکاری طور پر تو ابھی تک افغان صدارتی انتخابات سے متعلق کو ئی بیان جاری نہیں کیا۔ تاہم دفتر خارجہ کے ذرائع کے مطابق پاکستان افغان صدارتی انتخابات کے نتیجے میں ہونیوالی پیشرفت پر گہری نظر رکھے ہوئے ہے۔
افغان امور کے ماہر تجزیہ کار رحیم اللہ یوسفزئی کا کہنا ہے کہ افغان انتخابات پہلے مرحلے سے ہی متنازع ہو گئے تھے کیونکہ دونوں امیدواروں نے ایک دوسرے پر دھاندلی کے الزمات لگانے شروع کر دیے تھے۔
انہوں نے کہا کہ عبداللہ عبداللہ اور اشرف غنی میں سےکو ئی بھی بر سر اقتدار آجائے وہ ایک کمزور حکمران ہوگا کیونکہ پاور شیئرنگ کیے بغیر حکومت کرنا کسی ایک کے لئے بھی آسان نہیں ہو گا۔
رحیم اللہ یوسفزئی نے افغان صدارتی انتخابات کے پاکستان کے لئے مضمرات کے بارے میں کہا کہ،"ڈاکٹر عبد اللہ شاید پاکستان کے لئے زیادہ ناپسندیدہ تھے اور اشرف غنی چونکہ پشتون ہیں اور اکانومسٹ ہیں تو یہ شاید پاکستان کے لئے زیادہ بہتر ہو گا لیکن یہ بات یاد رکھنے کی ہے کہ اشرف غنی زیادہ آزاد طبیعت کے مالک ہیں اور وہ افغانستان کے مفادات کا زیادہ خیال کریں گے وہ ایک قوم پرست راہنما ہیں"۔
انہوں نے کہا کہ کرزئی حکومت میں عبداللہ عبداللہ وزیر خارجہ اور اشرف غنی وزیر خزانہ رہے اس لئے یہ کہنا کہ ان دونوں میں سے کوئی بھی کرزئی حکومت کی پا کستان پالیسی سے خود کو بالکل الگ رکھے گا تو یہ شاید درست نہ ہو۔
تاہم ڈان میڈیا گروپ سے وابستہ خارجہ امور کی رپورٹنگ کرنیوالے سینیئر صحافی متین حیدر کا کہنا ہے کہ افغانستان کی موجودہ صورتحال پاکستان،امریکہ اور اتحادی ممالک کے لئے پریشانی کا باعث ہے۔ انہوں نے کہا کہ،" امریکہ اور نیٹو فورسز توقع کر رہی تھیں کہ نئی حکومت آئے گی اور وہ دو طرفہ سکیورٹی معاہدہ جو اس وقت مؤخر ہوا پڑا ہے وہ اس پر دستخط کریں گے ادھر اسلام آباد بھی یہ توقع کر رہا تھا کہ کابل میں نئی حکومت آئے گی اس کے ساتھ پاکستان کے بہت سے سیاسی اور سکیورٹی کے جو ایشوز ہیں ان پر بات کرنا تھی تو کابل میں یہ سیاسی بحران آگے بڑھا تو اس کے پورے خطے پر اثرات مرتب ہوں گے"۔
خیال رہے کہ پاکستان نے افغان انتخابات کو افغانستان اور خطے میں امن واستحکام کے لئے اہم سنگ میل قرار دیا تھا۔ پاکستانی دفتر خارجہ ان انتخابات کے دوران پاکستان کی جانب سے سکیورٹی اور دیگر حوالوں سے متعدد بار تعاون کا اعادہ کیا تھا۔
عوامی نیشنل پارٹی کے سینیٹر شاہی سید کا کہنا ہے کہ صدارتی انتخابات اور اس سے جڑے معاملات افغانستان کا اندرونی معاملہ ہے ۔ انہوں نے حکومت پاکستان کو مشورہ دیا کہ وہ افغانستان میں عدم مداخلت کے اپنے ایجنڈے پر سختی سے کاربند رہے۔ شاہی سید نے کہا کہ ،"ہم اگر اڑوس پڑوس میں اچھے تعلقات رکھیں گے برابری کے تعلقات رکھیں گے تو حالات بہتر ہو جائیں گےافغانستان کبھی نہیں چاہے گا کہ وہ پاکستان کے ساتھ لڑائی کرے لیکن یہ اگر ہم کو آرام سے جینے دیں اور ہم ان سے چھیڑ چھاڑ نہ کریں تو یہ ان کے لئے بھی بہتر ہے اور ہمارے لئے بھی بہتر ہے"۔
تجزیہ کاروں کا کہنا ہے کہ افغانستان میں صدارتی انتخابات کا تنازعہ جلد حل نہ ہوا تو اس سے سرحد کے دونوں جانب طالبان شدت پسندوں کو منظم ہونے میں مدد ملے گی کیونکہ امریکی وزیر خارجہ جان کیری نے پہلے ہی کہہ دیا ہے کہ غیر قانونی طریقے سے حکومت پر قبضے سے افغانستان کو ملنے والا امریکی تعاون ختم ہو سکتا ہے۔