افغانستان کی قومی سلامتی کونسل نے تصدیق کر دی ہے کہ امریکا اور طالبان کے مابین امن ڈیل کے تحت افغان جیلوں میں قید طالبان کے ایک اور گروپ کو رہائی دے دی گئی ہے۔ ہفتے کے روز تیسرے مرحلے میں بھی ایک سو قیدیوں کو رہا کیا گیا۔ حال ہی میں امریکا اور طالبان نے افغانستان میں قیام امن کی خاطر ایک ڈیل کو حتمی شکل دی تھی، جس میں کئی دیگر شقوں کے علاوہ قیدیوں کا تبادلہ بھی شامل تھا۔
افغان حکومت کی طرف سے جاری کردہ ایک بیان کے مطابق صحت، عمر اور سزا کی مدت کو دیکھتے ہوئے مزید سو قیدیوں کو آزاد کیا گیا ہے۔
یوں بدھ سے لے کر کل ہفتے کے دن تک رہا کیے جانے والے طالبان قیدیوں کی مجموعی تعداد تین سو ہو گئی ہے۔ اس سے قبل بھی افغان حکومت نے دو مرحلوں میں سو سو قیدیوں کو رہا کیا تھا۔ اتوار کے دن ایک افغان اہلکار نے خبر رساں ادارے ڈی پی اے کو بتایا کہ طالبان قیدیوں کے ایک اور گروپ کو جلد ہی رہا کر دیا جائے گا تاہم اس اہلکار نے یہ نہیں بتایا کہ چوتھے مرحلے میں رہا کیے جانے والے قیدیوں کی تعداد کتنی ہو گی۔
یہ بھی پڑھیے: امریکا دوحہ امن معاہدے کی خلاف ورز ی کررہا ہے: طالبان
افغان حکومت کی طرف سے بتایا گیا ہے کہ ان قیدیوں کی رہائی خیر سگالی کے جذبے تک تحت کی جا رہی ہے لیکن ساتھ ہی نئے کورونا وائرس کی عالمی وبا بھی ایک اہم وجہ بنی ہے۔ بتایا گیا ہے کہ افغان حکام جیلوں میں اس وبا کے پھیلاؤ کو روکنے کی بھرپور کوششیں کر رہے ہیں۔
افغان حکام کے مطابق رہائی کے وقت ان تمام طالبان قیدیوں سے حلف لیا گیا کہ وہ دوبارہ کبھی بھی عسکری کارروائیوں میں حصہ نہیں لیں گے۔ دوحہ مذاکرات کے دوران بھی طالبان رہنماؤں نے ان قیدیوں کی رہائی کی خاطر اس شرط کو تسلیم کر لیا تھا۔ امریکی حکام اور افغان طالبان کے مابین دوحہ میں فروری میں طے پانے والی اس ڈیل کے تحت افغان جیلوں میں قید پانچ ہزار طالبان قیدیوں کی رہائی کے بدلے طالبان جنگجوؤں کی قید میں موجود ایک ہزار افغان حکومتی اہلکاروں کی رہائی پر بھی اتفاق ہو گیا تھا۔
کابل حکومت کا کہنا ہے افغان حکومت اور طالبان کے مابین مذاکرات سے قبل پندرہ سو طالبان کو رہا کیا جائے گا۔ دوحہ ڈیل کے تحت افغان حکومت اور طالبان کے مابین مذاکراتی عمل دس مارچ سے شروع ہونا تھا تاہم اس میں تاخیر کی ایک وجہ یہ بھی تھی کہ طالبان کا ابھی تک اصرار ہے کہ داخلی سطح پر اس مذاکراتی عمل کو شروع کرنے سے قبل تمام طالبان قیدیوں کی رہائی ممکن بنائی جائے۔
ع ب / م م / خبر رساں ادارے
طالبان حکومت کے خاتمے کے بعد سے دنیا کے چالیس سے زائد ممالک افغانستان میں موجود رہے۔ بم دھماکے آج بھی اس ملک میں معمول کی بات ہیں۔ نیٹو افواج کا جنگی مشن اختتام پذیر ہو گیا ہے لیکن ان کی کامیابی پر سوالیہ نشان ہے۔
تصویر: picture-alliance/dpaگیارہ ستمبر 2001ء کو القاعدہ سے تعلق رکھنے والے دہشت گردوں نے مجموعی طور پر چار مسافر طیارے اغوا کیے۔ دو کے ذریعے نیویارک میں ورلڈ ٹریڈ سینٹر پر حملہ کیا۔ ایک تیسرے جہاز کے ساتھ امریکی پینٹاگون کو نشانہ بنایا گیا جبکہ چوتھا طیارہ گر کر تباہ ہو گیا۔ ان حملوں میں کل تین ہزار افراد ہلاک ہوئے۔
ان حملوں نے امریکی حکومت کو افغانستان پر حملہ آور ہونے کا جواز فراہم کیا اور بش حکومت نے سات اکتوبر کو اسامہ بن لادن کے ممکنہ ٹھکانوں پر بمباری کا آغاز کیا۔ تیرہ نومبر 2001ء کو دارالحکومت کابل پر قبضہ کر لیا گیا۔ طالبان نے پاک افغان سرحدی علاقوں میں پسپائی اختیار کر لی۔
طالبان کے زوال کے بعد اقوام متحدہ کی چھتری تلے افغانستان پر چار بڑے نسلی گروپوں کے رہنما بون کے قریبی مقام پیٹرزبرگ کی کانفرنس میں شریک ہوئے۔ شرکاء نے جمہوریت کے نفاذ کے لیے پانچ دسمبر 2001ء کو صدر حامد کرزئی کے تحت عبوری حکومت کے قیام پر اتفاق کیا۔
بائیس دسمبر 2001ء کو جرمن پارلیمان کی اکثریت نے اقوام متحدہ کے ’مشن فریڈم‘ میں شمولیت کے حق میں ووٹ دیا۔ انٹرنیشنل سیکورٹی اسسٹنس فورس (ایساف) کو مقامی حکومت کی تعمیر نو میں مدد اور سکیورٹی کی صورتحال بہتر بنانے کا کام سونپا گیا۔
چھ مارچ 2002ء کو ایک دو طرفہ لڑائی میں پہلا جرمن فوجی ہلاک ہوا۔ اس کے بعد جرمن فوجیوں کو کئی مرتبہ نشانہ بنایا گیا۔ سات جون 2003ء کو کابل میں ایک خودکش حملہ ہوا، جس میں چار فوجی ہلاک اور دیگر انتیس زخمی ہوئے۔ جرمن فوجیوں پر یہ پہلا خودکش حملہ تھا۔
جنوری 2004ء کو افغانستان کے نئے جمہوری آئین کی منظوری دی گئی۔ 502 مندوبین نے صدارتی نظام کے تحت ’اسلامی جمہوریہ افغانستان‘ میں انتخابات کی راہ ہموار کی۔ نو اکتوبر 2004ء کو حامد کرزئی نے فتح کا جشن منایا۔
اکتیس مارچ 2004ء کو برلن کانفرنس کے دوران بین الاقوامی برادری نے افغانستان کی تعمیر نو کے لیے 8.2 ارب ڈالر کی امداد دینے کا اعلان کیا۔ جرمنی نے 80 ملین یورو دینے کا وعدہ کیا۔ اس کانفرنس میں منشیات کے خلاف جنگ اور ایساف دستوں کی مضبوطی کا اعلان بھی کیا گیا۔
اکتیس جنوری 2006ء کو لندن کانفرنس میں بین الاقوامی برادری کی طرف سے افغانستان کے لیے پانچ سالہ منصوبے اور 10.5 ارب ڈالر کی امداد کا اعلان کیا گیا۔ اس کے بعد سکیورٹی کے نام پر متعدد کانفرنسوں کا انعقاد ہوا۔
چار ستمبر 2009ء کو طالبان نے تیل کے بھرے دو ٹینکروں کو اغوا کیا۔ جرمن کرنل گیورگ کلائن نے فضائی حملے کے احکامات جاری کر دیے، جس کے نتیجے میں تقریبا ایک سو عام شہری مارے گئے۔ دوسری عالمی جنگ کے بعد جرمن فوجیوں کا یہ سب سے ہلاکت خیز حملہ تھا۔ شدید تنقید کے بعد اس وقت کے وزیر دفاع کو مستعفی ہونا پڑا تھا۔
اکتیس مئی 2010ء کو افغانستان میں جرمن فوجیوں کے ساتھ ملاقات کے بعد واپسی پر جرمن صدر ہورسٹ کوہلر نے ایک متنازعہ انٹرویو دیا۔ انہوں نے کہا کہ افغانستان کی جنگ جرمن اقتصادی مفادات کی وجہ سے لڑی جا رہی ہے۔ اس کے بعد ان پر تنقید کا سلسلہ شروع ہوا اور انہیں مستعفی ہونا پڑا۔
انیس جولائی 2010ء کو سکیورٹی کے سخت انتظامات کے تحت کابل میں نیٹو ممالک کے وزرائے خارجہ کا اجلاس ہوا۔ افغانستان کے غیر مستحکم حالات کے باوجود سن 2014ء کے بعد غیر ملکی افواج کے انخلاء کا فیصلہ کیا گیا۔
اٹھارہ ستمبر 2010ء کو افغانستان میں پارلیمانی انتخابات کا انعقاد کروایا گیا۔ بین الاقوامی مبصرین کے مطابق ان میں بڑے پیمانے پر دھاندلی کی گئی۔ کوئی بھی امیدوار واضح برتری حاصل نہ کر سکا اور فیصلہ صدر کرزئی کے حق میں ہوا۔
دو مئی 2011ء کو امریکا کی اسپیشل فورسز نے پاکستانی شہر ابیٹ آباد میں حملہ کرتے ہوئے اسامہ بن لادن کو ہلاک کر دیا۔ امریکی صدر اپنے ساتھیوں کے ہمراہ اس خفیہ آپریشن کی براہ راست نگرانی کرتے رہے۔ ہزاروں امریکیوں نے بن لادن کی ہلاکت کا جشن منایا۔
جنگ کے دس برس بعد پانچ دسمبر 2011ء کو ایک دوسری بین لاقوامی بون کانفرنس کا انعقاد ہوا۔ اس میں سن 2024ء تک افغانستان کو مالی امداد فراہم کرنے کا وعدہ کیا گیا۔ اس کے بدلے میں صدر کرزئی نے اصلاحات کرنے، کرپشن کے خاتمے اور جمہوریت کے استحکام جیسے وعدے کیے۔
اٹھارہ جون 2013ء کو صدر حامد کرزئی نے ملک بھر میں سکیورٹی کی ذمہ داریاں افغان فورسز کے حوالے کرنے کا اعلان کیا۔ اسی دن کابل میں ایک خودکش حملہ ہوا، جس نے اس اعلان کی خوشیوں ختم کر کے رکھ دیا۔
افغانستان میں نیٹو کے جنگی مشن کا اختتام ہو گیا ہے۔ بین الاقوامی برادری مستقبل میں بھی افغانستان کو اربوں ڈالر بطور امداد فراہم کرے گی۔ لیکن افغانستان کے لیے آزادی اور خود مختاری کی طرف جانے والا یہ راستہ کانٹوں سے بھرپور ہے۔
