افغان صدر کی طالبان کو مذاکرات کی پیش کش، کیا کامیاب ہو گی؟
عبدالستار، اسلام آباد
2 مارچ 2018
افغان صدر اشرف غنی کی طرف سے افغان طالبان کو مذاکرات کی دعوت اور ان مذاکرات کی چین کی طرف سے حمایت پر پاکستان میں کئی حلقے اب یہ خیال کر رہے ہیں کہ اس جنگ زدہ ملک میں امن کی کوئی راہ ہموار ہوجائے گی۔
تصویر: Getty Images/AFP/W. Kohsar
اشتہار
افغان صدر نے کابل میں ایک کانفرنس سے خطاب کرتے ہوئے افغان طالبان کو مذاکرات کی دعوت تھی اور پاکستان کو بھی ایک نیا دور شروع کرنے کی پیش کش کی تھی۔ کئی سیاسی مبصرین کا یہ خیا ل ہے کہ خطے کے ممالک تو افغانستان میں امن چاہتے ہیں لیکن امریکا کے ارادوں کے بارے میں کچھ نہیں کہا جا سکتا۔
اس پیش کش پر تبصرے کرتے ہوئے ممتاز دفاعی مبصر جنرل ریٹائرڈ امجد شعیب نے ڈوئچے ویلے کو بتایا، ’’افغان طالبان نے روس، چین، ترکی اور ایران سمیت خطے کے کئی ممالک سے رابطے رکھے ہوئے ہیں۔ خطے کے ممالک یہ چاہتے ہیں کہ افغانستا ن میں امن ہو، تاکہ یہاں معاشی ترقی کی راہ ہموار ہو سکے لیکن ماضی میں بھی امریکا نے امن کی کوششوں کو نقصان پہنچایا۔ جب ہم نے ہم مذاکرات کی کوشش کی تو امریکا نے انہیں نقصان پہنچایا اور اب بھی اگر مذاکرات شروع ہوئے تو امریکا اس میں رکاوٹیں کھڑی کرے گا۔‘‘افغانستان: قیام امن کے لیے کیا ایک اور بون اجلاس ضروری ہے؟
ُان کا کہنا تھا کہ امریکا کے ارادے یہاں سے جانے کے نہیں ہیں بلکہ وہ اس خطے میں قیام کرنا چاہتا ہے۔ ’’سیدھی سی بات ہے کہ امریکا کے لئے یہاں رکنا مشکل ہوجائے گا اگر افغانستان مین امن ہوگیا۔ بگرام کی ایئر بیس انہوں نے ایسے ہی تو نہیں بنائی۔ اب انہوں نے ایک طرح سے چین اور روس کو اپنا دشمن قرار دے دیا ہے۔ ایران سے بھی ان کے معاملات ٹھیک نہیں ہیں۔ تو ایسی صورت مین امریکہ کیوں مزکرات چاہے گا۔ جہاں تک پاکستان کو تعلق ہے تو اسلام آباد نے ہمیشہ امن مذاکرات کی حمایت کی ہے لیکن اس کے لئے تمام فریقوں کی طرف سے اخلاص کا مظاہر ہ ضروری ہے۔‘‘
افغان صدر کی جانب سے قیام امن کے لیے افغان طالبان کو مذاکرات کی دعوت دی گئی ہےتصویر: DW/S. Tanha
لیکن تجزیہ نگار احسن رضا کے خیا ل میں ان مذاکرات کو امریکی حمایت بھی حاصل ہے۔ ’’امریکا کی نظر میں طالبان دہشت گر د ہیں تو وہ براہ راست ان سے مذاکرات کرنے سے کترائے گا۔ تاہم اشرف غنی نے یہ بات امریکہ سے گرین سگنل ملنے کے بعد ہی کی ہوگی۔ چین کی افغانستان میں بھاری سرمایہ کاری ہے۔ پاکستان پر بھی بیجنگ کا بہت اثرورسوخ ہے۔ تو ایسی صورت میں یہ ممکن ہے کہ مذاکرات شروع ہوجائیں اور بعد میں کسی سطح پرامریکا بھی ان مذاکرات کا حصہ بن جائے گا۔‘‘
اسلام آباد سے تعلق رکھنے والے سیاسی مبصر ملک ایوب کے خیال میں امن کے بغیر خطے کی ترقی ممکن نہیں۔ ’’جس طرح چین کے پورے خطے میں سرمایہ کاری کی ہے، اس کا مفاد یہی ہے کہ خطے میں امن و استحکام ہو ورنہ بیجنگ کی سرمایہ کاری کو شدید نقصان ہوگا۔‘‘
ملک ایوب نے مزید کہا کہ چین کو اس حوالے سے مخلصانہ کوششیں کرنی چاہیں اور پاکستان و بھارت کو اپنے اختلافات بھلا کر افغان امن کے لئے کام کرنا چاہیے ورنہ دہشت گدری کا ناسور نہ صرف پاکستان، افغانستان اور بھارت کو نقصان پہنچائے گا بلکہ یہ مہذب دنیا کے لئے بھی بہت بڑا خطرہ ثابت ہوگا۔
افغانستان: کب کیا ہوا ؟
طالبان حکومت کے خاتمے کے بعد سے دنیا کے چالیس سے زائد ممالک افغانستان میں موجود رہے۔ بم دھماکے آج بھی اس ملک میں معمول کی بات ہیں۔ نیٹو افواج کا جنگی مشن اختتام پذیر ہو گیا ہے لیکن ان کی کامیابی پر سوالیہ نشان ہے۔
تصویر: picture-alliance/dpa
ورلڈ ٹریڈ سینٹر پر حملہ
گیارہ ستمبر 2001ء کو القاعدہ سے تعلق رکھنے والے دہشت گردوں نے مجموعی طور پر چار مسافر طیارے اغوا کیے۔ دو کے ذریعے نیویارک میں ورلڈ ٹریڈ سینٹر پر حملہ کیا۔ ایک تیسرے جہاز کے ساتھ امریکی پینٹاگون کو نشانہ بنایا گیا جبکہ چوتھا طیارہ گر کر تباہ ہو گیا۔ ان حملوں میں کل تین ہزار افراد ہلاک ہوئے۔
تصویر: picture-alliance/dpa
آپریشن اینڈیورنگ فریڈم
ان حملوں نے امریکی حکومت کو افغانستان پر حملہ آور ہونے کا جواز فراہم کیا اور بش حکومت نے سات اکتوبر کو اسامہ بن لادن کے ممکنہ ٹھکانوں پر بمباری کا آغاز کیا۔ تیرہ نومبر 2001ء کو دارالحکومت کابل پر قبضہ کر لیا گیا۔ طالبان نے پاک افغان سرحدی علاقوں میں پسپائی اختیار کر لی۔
تصویر: picture-alliance/dpa
پہلی بون کانفرنس
طالبان کے زوال کے بعد اقوام متحدہ کی چھتری تلے افغانستان پر چار بڑے نسلی گروپوں کے رہنما بون کے قریبی مقام پیٹرزبرگ کی کانفرنس میں شریک ہوئے۔ شرکاء نے جمہوریت کے نفاذ کے لیے پانچ دسمبر 2001ء کو صدر حامد کرزئی کے تحت عبوری حکومت کے قیام پر اتفاق کیا۔
تصویر: Getty Images
جرمن افواج کی روانگی
بائیس دسمبر 2001ء کو جرمن پارلیمان کی اکثریت نے اقوام متحدہ کے ’مشن فریڈم‘ میں شمولیت کے حق میں ووٹ دیا۔ انٹرنیشنل سیکورٹی اسسٹنس فورس (ایساف) کو مقامی حکومت کی تعمیر نو میں مدد اور سکیورٹی کی صورتحال بہتر بنانے کا کام سونپا گیا۔
تصویر: picture-alliance/dpa
پہلے فوجی کی ہلاکت
چھ مارچ 2002ء کو ایک دو طرفہ لڑائی میں پہلا جرمن فوجی ہلاک ہوا۔ اس کے بعد جرمن فوجیوں کو کئی مرتبہ نشانہ بنایا گیا۔ سات جون 2003ء کو کابل میں ایک خودکش حملہ ہوا، جس میں چار فوجی ہلاک اور دیگر انتیس زخمی ہوئے۔ جرمن فوجیوں پر یہ پہلا خودکش حملہ تھا۔
تصویر: picture-alliance/dpa
نیا آئین
جنوری 2004ء کو افغانستان کے نئے جمہوری آئین کی منظوری دی گئی۔ 502 مندوبین نے صدارتی نظام کے تحت ’اسلامی جمہوریہ افغانستان‘ میں انتخابات کی راہ ہموار کی۔ نو اکتوبر 2004ء کو حامد کرزئی نے فتح کا جشن منایا۔
تصویر: picture alliance/AP Photo
برلن کانفرنس
اکتیس مارچ 2004ء کو برلن کانفرنس کے دوران بین الاقوامی برادری نے افغانستان کی تعمیر نو کے لیے 8.2 ارب ڈالر کی امداد دینے کا اعلان کیا۔ جرمنی نے 80 ملین یورو دینے کا وعدہ کیا۔ اس کانفرنس میں منشیات کے خلاف جنگ اور ایساف دستوں کی مضبوطی کا اعلان بھی کیا گیا۔
تصویر: picture alliance/AP Photo
لندن کانفرنس
اکتیس جنوری 2006ء کو لندن کانفرنس میں بین الاقوامی برادری کی طرف سے افغانستان کے لیے پانچ سالہ منصوبے اور 10.5 ارب ڈالر کی امداد کا اعلان کیا گیا۔ اس کے بعد سکیورٹی کے نام پر متعدد کانفرنسوں کا انعقاد ہوا۔
تصویر: picture-alliance/dpa/dpaweb
قندوز کا فضائی حملہ
چار ستمبر 2009ء کو طالبان نے تیل کے بھرے دو ٹینکروں کو اغوا کیا۔ جرمن کرنل گیورگ کلائن نے فضائی حملے کے احکامات جاری کر دیے، جس کے نتیجے میں تقریبا ایک سو عام شہری مارے گئے۔ دوسری عالمی جنگ کے بعد جرمن فوجیوں کا یہ سب سے ہلاکت خیز حملہ تھا۔ شدید تنقید کے بعد اس وقت کے وزیر دفاع کو مستعفی ہونا پڑا تھا۔
تصویر: picture-alliance/dpa
جرمن صدر کا استعفیٰ
اکتیس مئی 2010ء کو افغانستان میں جرمن فوجیوں کے ساتھ ملاقات کے بعد واپسی پر جرمن صدر ہورسٹ کوہلر نے ایک متنازعہ انٹرویو دیا۔ انہوں نے کہا کہ افغانستان کی جنگ جرمن اقتصادی مفادات کی وجہ سے لڑی جا رہی ہے۔ اس کے بعد ان پر تنقید کا سلسلہ شروع ہوا اور انہیں مستعفی ہونا پڑا۔
تصویر: picture-alliance/dpa
کابل کا سربراہی اجلاس
انیس جولائی 2010ء کو سکیورٹی کے سخت انتظامات کے تحت کابل میں نیٹو ممالک کے وزرائے خارجہ کا اجلاس ہوا۔ افغانستان کے غیر مستحکم حالات کے باوجود سن 2014ء کے بعد غیر ملکی افواج کے انخلاء کا فیصلہ کیا گیا۔
تصویر: picture-alliance/dpa
پارلیمانی انتخابات
اٹھارہ ستمبر 2010ء کو افغانستان میں پارلیمانی انتخابات کا انعقاد کروایا گیا۔ بین الاقوامی مبصرین کے مطابق ان میں بڑے پیمانے پر دھاندلی کی گئی۔ کوئی بھی امیدوار واضح برتری حاصل نہ کر سکا اور فیصلہ صدر کرزئی کے حق میں ہوا۔
تصویر: picture alliance/dpa
اسامہ بن لادن کی ہلاکت
دو مئی 2011ء کو امریکا کی اسپیشل فورسز نے پاکستانی شہر ابیٹ آباد میں حملہ کرتے ہوئے اسامہ بن لادن کو ہلاک کر دیا۔ امریکی صدر اپنے ساتھیوں کے ہمراہ اس خفیہ آپریشن کی براہ راست نگرانی کرتے رہے۔ ہزاروں امریکیوں نے بن لادن کی ہلاکت کا جشن منایا۔
تصویر: The White House/Pete Souza/Getty Images
دوسری بون کانفرنس
جنگ کے دس برس بعد پانچ دسمبر 2011ء کو ایک دوسری بین لاقوامی بون کانفرنس کا انعقاد ہوا۔ اس میں سن 2024ء تک افغانستان کو مالی امداد فراہم کرنے کا وعدہ کیا گیا۔ اس کے بدلے میں صدر کرزئی نے اصلاحات کرنے، کرپشن کے خاتمے اور جمہوریت کے استحکام جیسے وعدے کیے۔
تصویر: Getty Images
ذمہ داریوں کی منتقلی
اٹھارہ جون 2013ء کو صدر حامد کرزئی نے ملک بھر میں سکیورٹی کی ذمہ داریاں افغان فورسز کے حوالے کرنے کا اعلان کیا۔ اسی دن کابل میں ایک خودکش حملہ ہوا، جس نے اس اعلان کی خوشیوں ختم کر کے رکھ دیا۔
تصویر: picture-alliance/dpa
نیٹو جنگی مشن کا اختتام
افغانستان میں نیٹو کے جنگی مشن کا اختتام ہو گیا ہے۔ بین الاقوامی برادری مستقبل میں بھی افغانستان کو اربوں ڈالر بطور امداد فراہم کرے گی۔ لیکن افغانستان کے لیے آزادی اور خود مختاری کی طرف جانے والا یہ راستہ کانٹوں سے بھرپور ہے۔
