شامی اپوزیشن کے گروپوں کی جانب سے کہا گیا ہے کہ بین الاقوامی ایلچی الا خضر الابراهيمی شام کے دورے پر کچھ نئی تجاویز کے ساتھ آئے ہیں۔ ایسے ریمارکس الابراهيمی اور شامی اپوزیشن کے اراکین کے درمیان ہونے والی ملاقات کے بعد سامنے آئے ہیں۔ یہ ملاقات جمعے کے روز ہوئی تھی۔ اپوزیشن کے یہ گروپ گزشتہ کئی مہینوں سے جاری حکومت مخالف پرتشدد تحریک کے تناظر میں شامی صدر بشار الاسد کو اپنی تنقید کا ٹارگٹ بنائے ہوئے ہیں۔

الا خضر الابراهيمی سے ملاقات کرنے والے گروپس میں ایسے کئی لوگ شامل تھے جو اسد حکومت کے خلاف جاری تحریک کو دبانے کے عمل کو ہمت سے برداشت کر رہے ہیں۔ ان میں شامل نیشنل کواراڈینیشن کمیٹی برائے ڈیموکریٹک چینج بھی شامل ہے اور اس میں عرب آبادی کے علاوہ کرد اور سوشلسٹ افراد بھی شامل ہیں۔ اس بلاک کے ترجمان حسن عبدالعظیم کا ملاقات کے بعد میڈیا کو بتانا تھا کہ الابراهيمی پر واضح کر دیا گیا ہے کہ وہ ملک کے اندر بحران کے حل اور ہلاکتوں کو روکنے کے اقدامات کی حمایت کریں گے۔ گروپ نے الابراهيمی کو بتایا کہ مختلف مقامات پر پریشان حال لوگوں کو طبی امداد کی فوری ضرورت ہے۔ اس گروپ نے سیاسی قیدیوں کی فوری رہائی کا بھی مطالبہ بین الاقوامی مندوب کو ملاقات کے دوران پیش کیا۔

حسن عبدالعظیم نے میڈیا کو بتایا کہ الا خضر الابراهيمی کے پاس صورت حال کو بہتر کرنے کے حوالے سے کچھ نئے نکات ہیں جو بحران کے خاتمے اور سلامتی کی صورت حال کو بہتر کرنے میں معاون ہو سکتے ہیں۔ ترجمان نے یہ بھی بتایا کہ ہفتے کے روز ان کی کمیٹی کا ایک وفد اسد حکومت کے بین الاقوامی سطح پر بڑے حلیف چین کے دورے پر روانہ ہو گا۔ اس گروپ کے دورے کا مقصد بھی اسد حکومت پر بین الاقوامی دباؤ میں اضافہ کرنا ہے تاکہ وہ عوامی خواہشات کا احترام کر سکے۔

شام کے لیے مقرر خصوصی مندوب الا خضر الابراهيمی اپنی تعیناتی کے بعد شام کے پہلے دورے پر ہیں۔ ان کا تعلق شمالی افریقی ملک الجزائر سے ہے۔ وہ جمعرات کے روز شامی دارالحکومت دمشق پہنچے تھے۔ دمشق پہنچ کر الابراهيمی کا کہنا تھا کہ شامی بحران مزید خراب ہو چکا ہے۔ وہ شام کے وزیر خارجہ ولید المعلم سے ملاقات کر چکے ہیں۔ آج ہفتے کے روز الابراهيمی کی میٹنگ صدر بشار الاسد کے ساتھ شیڈیول ہے۔ اسد اور براہیمی کی ملاقات کی تصدیق اقوام متحدہ کی جانب سے بھی کر دی گئی ہے۔ شام کے وزیر خارجہ نے الابراهيمی کو ملاقات کے دوران مکمل تعاون کا یقیین دلاتے ہوئے کہا کہ حل کے لیے کوئی بھی اسٹیپ یقینی طور پر شامی عوام کے مفاد میں ہونا ضروری ہے۔

ah/ia(AFP)