الیکسی ناوالنی کو ہفتے کو ایک خصوصی ایئر ایمبولینس کے ذریعے سائبیریا کے شہر اومسک سے جرمن دارالحکومت برلن کے ایک ہسپتال منتقل کیا گیا تھا۔ چوالیس سالہ نوالنی روسی صدر ولادیمیر پوٹن کے سب سے نمایاں ناقد سمجھے جاتے ہیں۔

برلن کے شاریٹے ہسپتال، جہاں ان کا علاج ہو رہا ہے، نے ایک بیان میں کہا کہ طبی شواہد سے لگتا ہے کہ انہیں ایسی نشہ آور دوا دی گئی، جس کا تعلق 'کولنسٹراس انِہیبٹرز‘ نامی کیمیلکز سے ہے۔

تاہم چند دن پہلے تک روس میں ان کا علاج کرنے والے ڈاکٹروں نے ان کے جسم میں ایسے کسی کیمیکلز کی موجودگی سے انکار کیا تھا۔

جرمن ڈاکٹروں کے مطابق الیکسی ناوالنی کی حالت تشویش ناک ہے لیکن ان کی زندگی خطرے سے باہر ہے۔ برلن کے ہسپتال کا کہنا ہے کہ ابھی یہ وثوق سے نہیں کہا جا سکتا کہ انہیں کس قسم کا زہر دیا گیا۔ تاہم خدشہ ہے کہ انہیں جو بھی مواد دیا گیا وہ ان کے 'نروس سسٹم‘ یعنی اعصابی نظام کو متاثر کر سکتا ہے۔ 

الیکسی ناوالنی کی طبیعت پچھلے ہفتے جمعرات کو سائبیریا کے شہر ٹامسک سے ماسکو جاتے ہوئے ایک پرواز کے دوران اچانک خراب ہو گئی تھی۔ اس پرواز کو ہنگامی بنیادوں پر سائبیریا کے شہر اومسک میں اتارا گیا، جہاں ان کا ابتدائی علاج ہوا۔

الیکسی ناوالنی کے قریبی ساتھیوں کو شک ہے کہ انہیں ٹامسک کے ایئرپورٹ پر چائے میں زہر ملا کر دیا گیا۔ 

یورپی یونین نے 'ناوالنی کی زندگی پر اس مبینہ حملے‘ کی شدید الفاظ میں مذمت کی ہے۔ یورپی یونین نے روس سے مطالبہ کیا ہے کہ وہ ناوالنی کو مبینہ طور پر زہر سے مارنے کے الزامات کی 'آزادانہ اور شفاف‘ تحقیقات یقینی بنائے۔

جرمن چانسلر انگیلا میرکل نے مطالبہ کیا ہے کہ مبینہ 'قتل کی اس کوشش‘ میں ملوث افراد کی نشاندہی کر کے انہیں کیفر کردار تک پہنچایا جائے جبکہ برطانیہ نے بھی اس معاملے کی 'مکمل اور شفاف‘ تحقیقات کرانے کا مطالبہ کیا ہے۔