کیا مصنوعی حقیقت ہی ورچوئیل ریئیلٹی ہے۔ تاہم اس حقیقت کو ایک بڑا سا چشمہ نما آلہ لگا کر ہی دیکھا جا سکتا ہے۔ اس تصویر میں موجود نوجوانوں کے چہروں کو دیکھ کر یہ اندازہ لگایا جا سکتا ہے کہ وہ یہ چشمہ لگا کر کس طرح کے دلچسپ تجربات کر رہے ہیں۔

یورپ میں ہر سال موبائل فون کی صنعت سے وابستہ دو بڑے میلے ہوتے ہیں۔ ان میں برلن میں ’ایفا‘ جب کہ بارسلونا میں موبائل ورلڈ کانگریس ’ MWC‘ شامل ہیں۔ پیر کو ایم ڈبلیو سی کے افتتاح کے موقع پر چار ہزار سے زائد صحافی موجود تھے، جنہوں نے اس میلے میں پیش کیے جانے والے جدید ترین موبائل اسمارٹ فونز اور ٹیبلٹس کمپیوٹر کے بارے میں دنیا کو بتایا۔

کسی اہم موقع پر موبائل فون کی بیٹری ختم ہونا اکثر صارفین کے لیے پریشانی کا باعث بن جاتا ہے۔ خراب ہونے کی صورت میں کچھ اسمارٹ فونز کی بیٹریوں کو تو بالکل بھی تبدیل نہیں کیا جا سکتا۔ ایل جی کمپنی نے اس مشکل کا حل پیش کیا ہے۔ ایل جی فائیو نامی فون کی بیٹری کو نکالنا اور تبدیل کرنا انتہائی سہل ہے۔

سیمسنگ نے بارسلونا میں ’S7‘ ماڈل پیش کیا ہے۔ کمپنی کے مطابق اس میں پہلے کے مقابلے میں گرافکس تقریباً 64 فیصد بہتر ہیں۔ یہ فون چار مختلف رنگوں میں متعارف کرایا گیا ہے اور دھول اور پانی اس میں داخل نہیں ہو سکتا۔

اب یہ بات ہر ایک پر واضح ہو چکی ہے کہ اسمارٹ فونز صرف ٹیلیفون کرنے کے لے نہیں ہیں۔ اب ان پر فلمیں دیکھی جا سکتی ہیں، ویڈیو گیمز کھیلے جا سکتے ہیں، میوزک سن سکتے ہیں اور تصاویر بھی بنا سکتے ہیں۔ اس میں قطب نما بھی موجود ہے اور یہ ایک کیلکیولیٹر کا بھی کام دیتے ہیں۔ ان تمام خصوصیات کو سیمسنگ کے ’S7‘ اور ’S7‘ ایج میں اور بھی بہتر انداز میں پیش کیا گیا ہے۔

چینی کمپنی ہواوے نے بارسلونا میں اپنا ’میٹ بک‘ متعارف کرایا ہے۔ اس ٹیلبٹ کو ایک نوٹ بک بھی بنایا جا سکتا ہے۔ یہ ونڈوز دس کا حامل ہواوے کا پہلا ٹیبلٹ ہے۔ اس ٹیبلٹ کی چوڑائی صرف سات ملی میٹر اور وزن صرف 640 گرام ہے۔

ایل جی کمپنی کے رولنگ بوٹس اسٹار وارز فلم کے بی بی۔ ایٹ روبوٹس کی یاد دلاتے ہیں۔ یہ زمین پر لڑھکتے ہوئے گھر کی حفاظت کا کام کر سکتے ہیں۔ اس کے علاوہ ’Rolling Bots‘ میں ایک ایشا آپشن بھی ہے کہ جسے اگر آن کر دیا جائے، تر گھریلو جانور یعنی بلی اور کتے بھی اس سے کھیل سکتے ہیں۔

فیس بُک براعظم افریقہ کے دور دراز کے علاقوں میں رہائشیوں کو بذریعہ سیٹلائٹ مفت انٹرنیٹ فراہم کرنے کی کوششوں میں مصروف ہے۔ فیس بُک کے بانی مارک زُکربرگ نے بارسلونا میں ہونے والی موبائل ورلڈ کانگریس کے دوران گزشتہ روز اعلان کیا کہ اس سلسلے میں ان کی کمپنی کا فرانسیسی سیٹلائٹ آپریٹر کمپنی Eutelsat سے معاہدہ ہو گیا ہے۔

یہ تصویر بارسلونا میں موجود صحافیوں کی ہے، جو گیلیکسی گیئر وی آر چشمے پہنے ہوئے ہیں۔ مصنوعی حقیقت دکھانے والے چشموں کی مستقبل میں شاید بہت زیادہ مانگ ہو۔ بارسلونا میں پچیس فروری تک اس میلے میں اس شعبے کی اختراعات کو دیکھا اور استعمال کیا جا سکتا ہے۔ تاہم بہت جلد یہ مصنوعات عام مارکیٹ میں دستیاب ہوں گی۔