نیویارک شہر کے نواح مقام ویسٹ پوائنٹ میں امریکا کی قومی عسکری اکیڈمی میں فوجیوں کی پاسنگ آؤٹ تقریب کے موقع پر اپنے خطاب میں باراک اوباما نے کہا کہ واشنگٹن حکومت خارجہ حکمت عملی کے شعبے میں ایک ’نیا باب‘ لکھ رہی ہے۔ انہوں نے ایک مرتبہ پھر اپنے موقف کا اعادہ کرتے ہوئے کہا کہ دنیا کی قیادت امریکا فوجی کارروائیوں کے ذریعے نہیں کر سکتا۔

انہوں نے کہا، ’امریکا کو ہر حال میں دنیا کی قیادت کرنا ہے۔ کیوں کہ اگر ہم نہیں کریں گے، تو کوئی نہیں کرے گا۔‘

امریکی صدر باراک اوباما نے ملکی خارجہ امور سے متعلق نئی حکمت عملی کا اعلان ایک ایسے موقع پر کیا ہے، جب افغانستان میں امریکی فوجوں کا لڑاکا مشن اپنے اختتام کی جانب گامزن ہے۔ صدر اوباما نے ملک میں جاری اس تنقید کو بھی مسترد کیا، جس میں ناقدین کا کہنا ہے کہ امریکا زوال کی جانب بڑھ رہا ہے، کیوں کہ صدر اوباما دنیا میں پیدا ہونے والے تنازعات میں امریکی فوج کا استعمال کرنے سے گریزاں رہتے ہیں۔ صدر اوباما نے کہا کہ ایسے افراد ’تاریخ کو گمراہ‘ کر رہے ہیں۔

جرمن خبر رساں ادارے ڈی پی اے کے مطابق امریکی صدر کو شام کے خلاف فوجی کارروائی نہ کرنے اور لیبیا میں تنہا فوجی کارروائی کی بجائے اتحادیوں کے ساتھ مل کر فوجی کارروائی کرنے پر تنقید کا سامنا ہے۔

صدر اوباما نے کہا کہ امریکا کی فوجی طاقت اس کی عالمی قیادت میں ’ریڑھ کی ہڈی‘ کی حیثیت رکھتی ہے اور اگر امریکا اور اس کے اتحادیوں کو کبھی بھی خطرہ ہوا، تو وہ تنہا بھی فوجی کارروائی سے گریز نہیں کرے گا۔ اوباما کے مطابق ’اگر ضرورت پڑی اور ہماری بنیادی مفادات نے مطالبہ کیا تو امریکا اکیلے بھی فوجی کارروائی کرے گا۔ ‘

انہوں نے زور دے کر کہا، ’علاقائی تنازعات جن میں ہمارے اتحادیوں کو خطرہ ہوا، جیسے جنوبی یوکرائن یا جنوبی بحیرہء چین یا دنیا میں کہیں بھی، امریکی فوج تعینات ہو گی۔‘

صدر اوباما نے کہا کہ امریکا کو سب سے زیادہ براہ راست خطرہ دہشت گردی سے ہے۔ ان کا کہنا تھا کہ افغانستان میں استعمال کیے جانے والے وسائل القاعدہ کے خلاف استعمال کیے جانے چاہیں، جو مشرقی وسطیٰ اور افریقہ میں پھل پھول رہی ہے۔

انہوں نے اپنی تقریر کے اختتام پر دہشت گردی کے خاتمے اور اس سلسلے میں یمن اور صومالیہ جیسے علاقوں میں دہشت گردوں کے خلاف ڈرونز کا استعمال بھی جاری رہے گا۔ مختلف ممالک کی امداد کےلیے پانچ بلین ڈالر کے فنڈ کا اعلان بھی کیا۔ انہوں نے کہا کہ امریکا دہشت گردوں کو گرفتار کرنے کا سلسلہ بھی جاری رکھے گا۔