جرمن خبر رساں ادارے ڈی پی اے نے واشنگٹن سے موصولہ رپورٹوں کے حوالے سے بتایا ہے کہ اس سیاسی تعطل کے خاتمے کے لیے ری پبلکن سیاستدانوں کی طرف سے دی جانے والی تجویز کو وائٹ ہاؤس نے رد کر دیا ہے جب کہ ہفتے کے دن سینیٹ میں ڈیموکریٹس کی طرف سے پیش کیے جانے والے ایک منصوبے کو ری پبلکنز نے مسترد کر دیا ہے۔ بتایا گیا ہے کہ سینیٹ میں اپوزیشن پارٹی کے تمام ارکان نے صدر اوباما کی انتظامیہ کی طرف سے پیش کیے جانے والے منصوبے کے خلاف ووٹ ڈالے۔

امریکی سینیٹ میں صدر اوباما کو یہ ناکامی ایسے وقت میں ہوئی ہے، جب اسپیکر جان بوہنر نے ارکان پارلیمان کو بتایا ہے کہ حکومتی شٹ ڈاؤن کے خاتمے اور قرضوں کی حد میں اضافے سے متعلق وائٹ ہاؤس سے کوئی سمجھوتہ نہیں ہو سکا ہے۔ ری پبلکن پارٹی نے تجویز کیا تھا کہ وہ عارضی طور پر قرضوں کی موجودہ مقررہ حد کو بڑھانے کے لیے تیار ہے۔ اپوزیشن ری پبلکن پارٹی کے مطابق صرف چھ ہفتوں کے لیے یہ اجازت مخصوص شرائط کی بنیاد پر دی جا سکتی ہے۔ دوسری طرف باراک اوباما کا کہنا ہے کہ وہ اس سیاسی بحران کا طویل المدتی حل چاہتے ہیں۔

یہ امر اہم ہے کہ اس مخصوص صورتحال میں ڈیموکریٹ سینیٹر ہیری ریڈ نے کہا ہے کہ وہ ری پبلکن سینیٹرز کی دعوت پر ان کے ایک وفد سے ملیں ہیں تاکہ اس معاملے کا مناسب حل تلاش کیا جا سکے۔ انہوں نے اپنی اس ملاقات کو ایک اہم پیشرفت قرار دیا ہے۔ دریں اثناء سینیٹ میں ڈٰیموکریٹس کی قیادت نے ہفتے کی سہ پہر وائٹ ہاؤس میں صدر اوباما سے بھی ملاقات کی ہے۔

ادھر سیکرٹری خزانہ جیک لیو نے خبردار کر دیا ہے کہ اگر یہ معاملہ سترہ اکتوبر تک حل نہیں ہوتا تو حکومت کے پاس مالی ادائیگیوں کے لیے موجود رقم ختم ہو جائے گی اور وزارت خزانہ حکومتی بلز ادا نہیں کر سکے گی۔ انہوں نے مزید کہا ہے کہ کانگریس میں بجٹ اور قرض کی حد پر جاری تعطل امریکی معیشت کے لیے نقصان دہ ثابت ہو گا، اس لیے اس مسئلے کو جلد ہی حل کر لینا چاہیے۔

اس صورتحال میں یورپی مرکزی بینک کے سربراہ ماریو دراگی نے کہا ہے کہ امریکا میں جاری یہ مالیاتی بحران جتنا زیادہ طویل ہو گا، اس کے عالمی معیشت پر اتنے ہی زیادہ منفی اثرات مرتب ہوں گے۔ جرمن وزیر خزانہ وولف گانگ شوئبلے نے بھی زور دیا ہے کہ واشنگٹن حکومت کو اس مسئلے کو جلد ہی حل کر لینا چاہیے۔ ان کے بقول جیک لیو پُرامید ہیں کہ پیر تک اس مسئلے پر قابو پا لیا جائے گا۔ عالمی بینک کے سربراہ جم ینگ کم نے خبردار کیا ہے کہ امریکا میں حکومتی شٹ ڈاؤن اور قرضوں کی حد بڑھانے سے متعلق جاری سیاسی تعطل خطرناک صورت اختیار کرتا جا رہا ہے۔ انہوں نے بھی امریکی پالیسی سازوں سے مطالبہ کیا ہے کہ عالمی سطح پر پیدا ہونے والے اس ممکنہ بحران کو جلد از جلد حل کر لیا جانا چاہیے۔