جرمن خبر رساں ادارے ڈی پی اے کے مطابق، ایسی خبروں کے سامنے آنے کے بعد کہ امریکی قومی سلامتی ایجنسی کے نگرانی کے ایک پروگرام کے تحت مختلف ممالک کے سربراہان مملکت و حکومت کے ٹیلی فونز کی جاسوسی کی جاتی رہی ہے اور ان میں جرمن چانسلر میرکل بھی شامل تھیں، یورپی یونین میں خاصا عدم اطمینان دیکھا گیا ہے۔

میرکل کا کہنا تھا، ’اتحادیوں کے درمیان اعتماد کی ضرورت ہوتی ہے اور اب امریکا کو یہ اعتماد دوبارہ بحال کرنا پڑے گا۔‘

میرکل نے یہ بیان یورپی یونین کے سربراہی اجلاس میں شرکت کے لیے برسلز پہنچنے پر دیا۔ ’’دوستوں کی جاسوسی ایک نوگو ایریا ہے۔ یہاں بنیادی معاملہ میرا نہیں، شہریوں کا ہے۔‘

اسی تناظر میں یورپی کمیشن کے سربراہ يوزے مانویل باروسو نے کہا، ’یورپ میں، ہم ذاتی معلومات کے تحفظ کو بنیادی حق قرار دیتے ہیں۔‘

انہوں نے مزید کہا،’ہم جانتے ہیں کہ مطلق العنانیت کیا ہوتی ہے اور ہمیں یہ بھی اچھی طرح معلوم ہے کہ کب ریاستیں غیر ضروری طور پر طاقت کا استعمال کر کے لوگوں کی زندگیوں کو متاثر کرتی ہیں۔‘

لاکھوں فرانسیسی شہریوں کی ٹیلی فونز کالز کی خفیہ نگرانی کی خبروں پر پیرس حکومت کی ناراضگی کے بعد اب ان تازہ اطلاعات کے تناظر میں کہا جا رہا ہے کہ یورپی یونین کے سربراہی اجلاس میں اس موضوع کو بھی کلیدی اہمیت دی گئی۔

واضح رہے کہ NSA کے خفیہ پروگرام پرزم سے متعلق سامنے آنے والی تازہ رپورٹوں میں کہا جا رہا ہے کہ مبینہ طور پر درجنوں عالمی رہنماؤں کے موبائل فونز کی جاسوسی کی جاتی رہی ہے۔

خیال رہے کہ امریکا کی نیشنل سکیورٹی ایجنسی کی ان خفیہ سرگرمیوں کے حوالے سے اب تک زیادہ تر معلومات اس کے سابق اہلکار ایڈورڈ سنوڈن کے ذریعے سامنے آئی ہیں۔ امریکا سے فرار ہو کر پہلے ہانگ ہانگ اور پھر روس پہنچنے والے سنوڈن نے بڑی تعداد میں دستاویزات میڈیا کے حوالے کی تھیں، جن کی مدد سے این ایس اے کی سرگرمیوں سے پردہ اٹھا۔ ایڈورڈ سنوڈن ان دنوں روس میں عارضی سیاسی پناہ مل جانے کے بعد وہاں رہائش پزیر ہیں۔