جمعے کو امریکی صدر باراک اوباما نے فورٹ کیمپبیل کینٹکی میں دہشت گرد تنظیم القاعدہ کے سربراہ اسامہ بن لادن کو پاکستان کے شہر ایبٹ آباد میں ایک فوجی آپریشن میں ہلاک کرنے والے امریکی افواج کی اسپیشل فورسز کے اہلکاروں کو ملک کے اعلیٰ ترین اعزازات سے نوازا ہے۔ ان اسپیشل فورسز میں نیوی سیلز، ففتھ اسپیشل فورسز گروپ، ایک سو ساٹھویں اسپیشل آپریشنز ایوی ایشن ریجمنٹ اور ہیلی کاپٹر یونٹ نائٹ اسٹاکرز کے اہلکار شامل تھے۔

خیال رہے کہ پیر کی صبح ایبٹ آباد میں امریکی افواج نے ایک غیر معمولی فوجی کارروائی کرتے ہوئے دنیا کے سب سے مطلوب دہشت گرد اسامہ بن لادن کو موت کے گھٹ اتار دیا تھا۔ امریکہ نے یہ کارروائی خفیہ طور پر کی تھی اور اس میں پاکستانی فورسز شامل نہیں تھیں۔ امریکی انتظامیہ کے مطابق امریکہ نے کارروائی کرنے کے بعد پاکستانی حکّام کو مطلع کیا۔

وائٹ ہاؤس کے ایک اہلکار نے نام ظاہر نہ کرنے کی شرط پر بتایا کہ امریکی صدر نے الیٹ فورسز کے اہلکاروں کا ذاتی طور پر شکریہ ادا کیا اور انہیں ان کی بے لوث اور نڈر کارروائی پر خراجِ عقیدت پیش کیا۔ اس موقع پر الیٹ فورسز کے افسران نے صدر اوباما کو ایبٹ آباد میں فوجی کارروائی سے متعلق بریفنگ بھی دی۔ اس موقع پر امریکی نائب صدر جو بائڈن بھی اوباما کے ہمراہ تھے۔

امریکی صدر نے اسپیشل فورسز کو جن اعزازات سے نوازا، وہ امریکی افواج کے کس بھی یونٹ کو دیا جانے والے اعلیٰ ترین اعزازات تھے۔

رپورٹ: شامل شمس⁄ خبر رساں ادارے

ادارت: عاطف توقیر