امریکی وزیر خارجہ انٹونی بلنکن جمعرات آٹھ ستمبر کو یوکرین کے دورے پر کییف پہنچے جہاں وہ روسی حملے اور جارحیت کے شکار اس ملک کو عسکری طور پر مضبوط بنانے کے لیے نئی غیر ملکی فوجی مالیاتی امداد کا اعلان کرنے والے ہیں۔ امریکی اسٹیٹ ڈپارٹمنٹ نے بلنکن کے اس دورے کے مقاصد پر روشنی ڈالتے ہوئے کہا ہے کہ دو بلین ڈالرز کی امداد یوکرین سمیت 18 ایسے ممالک کو دی جائے گی جو روسی جارحیت کے خطرے کا شکار ہیں۔

بلنکن کا یوکرین کا یہ دورہ اس وقت عمل میں آیا ہے جب یوکرین نے روس کے ساتھ جنگ میں کچھ مثبت پیش رفت کا دعویٰ کیا ہے۔ کییف کے مطابق اُس کی فوج نے روس کی طرف سے قبضے میں لیے گئے یوکرین کے دوسرے سب سے بڑے شہر خارکیف کے قریب بعض علاقوں کا کنٹرول حاصل کرنے میں کامیابی حاصل کی ہے۔

امریکی محکمہ خارجہ کے ایک اہلکار کے مطابق جس نے اپنا نام ظاہر نہ کرنے کی درخواست کی، خبر رساں ادارے روئٹرز کو بتایا کہ بائیڈن انتظامیہ امریکی کانگریس کو اپنی اس خواہش سے آگاہ کرنے والی ہے کہ یہ رقم طویل المدتی سرمایہ کاری کے لیے دستیاب رہنی چاہیے۔ اس اہلکار کی طرف سے تاہم یہ نہیں بتایا گیا کہ یوکرین کے علاوہ دیگر کون سے ممالک ہیں جنہیں یہ امداد فراہم کی جائے گی اور نہ ہی اس بات پر روشنی ڈالی گئی ہے کہ یوکرین کو اس میں سے کتنا حصہ ملے گا۔

صدر بائیڈن کی یوکرین کے لیے تینتیس بلین ڈالر کی مدد کی درخواست

 

 

حکام کے مطابق صدر جو بائیڈن کے جنوری 2021ء میں عہدہ صدارت سنبھالنے کے بعد سے اب تک یوکرین کو امریکہ کی طرف سے 15.2 بلین ڈالر کی فوجی امداد دی جا چکی ہے۔

دریں اثناء امریکی صدر جو بائیڈن نے یوکرین کے لیے 675 ملین ڈالر کے مزید ہتھیاروں کی بھی منظوری دی ہے۔ اس بارے میں امریکی وزیر دفاع لائیڈ آسٹن نے آج جمعرات کو ہی جرمنی میں ہونے والے اُس اجلاس سے پہلے اس کا اعلان کیا، جس میں اس بات پر تبادلہ خیال کیا جا رہا ہے کہ یوکرین کی طویل مدتی بنیادوں پر امداد کس طرح کی جائے۔

رواں سال فروری کی 24 تاریخ کو روس نے یوکرین پر حملہ کیا تھا۔ امریکہ اور دیگر مغربی اتحادیوں کی طرف سے یوکرین کا بھرپور ساتھ دیتے ہوئے اسے عسکری اعتبار سے مضبوط بنانے کی کوششیں جاری ہیں۔ امریکہ کا کہنا ہے کہ وہ یوکرین کو مستقبل میں کسی روسی حملے سے بچانے کے لیے اُس کی مالی اور عسکری امداد کرتا رہے گا۔

 ک م/ اب ا (روئٹرز)