بھارت کی مغربی ریاست راجستھان کے ضلع بھارت پور میں ایک شادی ہال کی دیوار گرنے سے کم از کم چوبیس مہمان ہلاک ہو گئے۔ پولیس کے مطابق یہ واقعہ ممکنہ طور پر شدید بارش کی وجہ سے پیش آیا۔

امریکی حمایت یافتہ شامی باغیوں نے الطبقہ نامی شہر سے ’اسلامک اسٹیٹ‘ کو پسپا کر دیا ہے۔ باغیوں کی ایس ڈی ایف نامی تنظیم کے ترجمان نے بتایا کہ اس شہر اور قریب ہی واقع ایک ڈیم پر اب اس تنظیم کا قبضہ ہے۔

امریکی حکومت یورپ سے آنے والی پروازوں پر بھی لیپ ٹاپ اور ٹیبلٹ کے ساتھ سفر کرنے پر پابندی عائد کرنا چاہتی ہے۔ قومی سلامتی کے امریکی ادارے نے بتایا کہ ٹرمپ انتظامیہ ابھی تک اس تجویز پر کوئی فیصلہ نہیں کر پائی۔

جرمن چانسلر انگیلا میرکل نے جمعرات کو نیٹو کے سیکرٹری جنرل ژینس اسٹولٹن برگ سے برلن میں ملاقات کی۔ ذرائع کے مطابق اس ملاقات میں نیٹو کے دفاعی اخراجات اور انسداد دہشت گردی جیسے موضوعات زیر بحث آئے۔

ترک صدر رجب طیب ایردوآن نے شامی کرد جنگجو گروپ (وائی پی جی) کو ہتھیار فراہم کرنے کے امریکی اعلان پر احتجاج کیا ہے۔ ایردوآن نے اس امریکی فیصلےکو ایک ’غلطی‘ سے تعبیر کیا۔

امریکا کے وفاقی تحقیقاتی ادارے ایف بی آئی کے سابق سربراہ جیمز کومی نے اپنی برطرفی کے بعد پہلا بیان دیا ہے۔ ان کے بقول امریکا کا کوئی بھی صدر، جب بھی چاہے، بغیر کسی وجہ کے ایف بی آئی کے سربراہ کو اس کے عہدے سے ہٹا سکتا ہے۔

آج جمعرات کو برطانیہ کے دارالحکومت لندن میں صومالیہ کے موضوع پر ایک بین الاقوامی اجلاس ہو رہا ہے۔ اس موقع پر اقوام متحدہ اور فلاحی اداروں نے دنیا کے اس انتہائی غریب ملک کے لیے عالمی برادری سے مزید امداد فراہم کرنے کا مطالبہ کیا۔ اس سے قبل 2012 ء میں بھی لندن میں اسی موضوع پر ایک اجلاس ہوا تھا۔

لیبیا کے حکام نے جرمنی کی ایک غیر سرکاری تنظیم ’سی واچ‘ پر بحیرہ روم میں ایک امدادی کارروائی میں دخل اندازی کے الزامات عائد کیے ہیں۔ لیبیا کے کوسٹ گارڈز کے مطابق جب وہ ایک کشتی پر سوار ساڑھے تین سو مہاجرین کو بچا کر لیبیا واپس لانا چاہتے تھے، تو ’سی واچ‘ کے کارکن اِن مہاجرین کو یہ کہتے ہوئے اپنے جہاز پر چڑھانے کی کوشش کرنے لگے کہ لیبیا محفوظ ملک نہیں ہے۔