ایمنسٹی انٹرنیشنل کے مطابق اقوام متحدہ کی طرف سے 30 برس پہلے اذیت رسانی اور تشدد پر مکمل پابندی عائد کرنے پر رضامندی کے باوجود اس میں روز بروز اضافہ ہوا ہے۔ اس ہیومن رائٹس گروپ نے اذیت رسانی کے خاتمے کے لیے ایک نئی مہم کے آغاز کا اعلان کیا ہے۔ ایمنسٹی کے اعداد و شمار سے پتا چلا ہے کہ اس ادارے نے گزشتہ پانچ سالوں کے دوران دنیا کے 141 ممالک میں اذیت رسانی کے واقعات ریکارڈ کیے۔ ان میں 79 ایسی ریاستیں شامل ہیں جو اذیت رسانی کے خلاف اقوام متحدہ کے 1984 کے کنونشن پر دستخط کرنے والے 155 ممالک میں شامل ہیں۔

اس ضمن میں کروائے گئے ایک گلوبل سروے میں 21 ممالک کے 21 ہزار افراد کو شامل کیا گیا۔ اس کے نتائج بھی نہایت خوفناک تصویر پیش کر رہے ہیں۔ سروے میں شامل افراد کے 44 فیصد نے خدشہ ظاہر کیا کہ اگر انہیں حراست میں لیا گیا تو اُن کے ساتھ بھی شدید نوعیت کا تشدد اور اذیت رسانی کا سلوک ہو سکتا ہے۔ تاہم اس بارے میں اپنا خیال ظاہر کرنے والے ایک تہائی افراد کا کہنا تھا کہ اُن کے خیال میں کبھی کبھی معلومات حاصل کرنے کے لیے اذیت رسانی کا طریقہ کار ضروری اور قابل قبول ہوتا ہے، کیونکہ ان معلومات کے حصول سے عوام کو تحفظ پہنچانے میں مدد مل سکتی ہے۔

ایمنسٹی انٹر نیشنل کے سیکرٹری جنرل ، بھارتی نژاد سلیل شیٹھی نے لندن میں ’ اسٹاپ ٹارچر‘ کے عنوان سے منعقد ہونے والی مہم کے دوران صحافیوں کو بتایا، ’’اذیت رسانی ایک روٹین بن گئی ہے، یہ اب ایک عام سی بات ہے۔‘‘ شیٹھی کا مزید کہنا تھا، ’’دہشت گردی کے خلاف جنگ کا سلسلہ جب سے شروع ہوا ہے، تب سے اذیت رسانی کے طریقہ کار کا استعمال خاص طور سے امریکا اور اُس کے دائرہ اثر میں اتنی عام سی بات بن چُکی ہے کہ اسے نیشنل سکیورٹی یا قومی سلامتی کی توقعات کا حصہ سمجھا جانے لگا ہے۔‘‘

ایک گلوبل اسکین سروے کے مطابق اذیت رسانی کے طریقہ کار کو بروئے کار لانے کی حمایت والے معاشروں کا دائرہ خاصا وسیع ہے۔ چین اور بھارت میں اس کی شرح 74 فیصد، یونان میں 12 اور ارجنٹائن میں 15 فیصد ہے۔

برطانیہ، جہاں تمام ملکوں کے مقابلے میں اذیت رسانی کا خوف سب سے کم پایا جاتا ہے، 29 فیصد نے اس کے استعمال کے حق میں رائے دی۔ اس حوالے سے ایمنسٹی انٹرنیشنل کی برطانیہ کی شاخ کی ڈائریکٹر کیٹ ایلن نے کہا، ’’اس کی وجہ جاسوسی پر مبنی پُر تشدد ٹی وی شوز ہیں۔‘‘ امریکی ٹی وی پروگراموں کا حوالہ دیتے ہوئے کیٹ نے مزید کہا، ’’24 and Home land ‘‘ جیسے ٹی وی پروگرام اذیت رسانی کی ستائش کرتے ہیں۔ کیٹ کا کہنا تھا، ’’اسکرین رائٹرز کی ڈرامائی پیشکش اور حقیقی زندگی میں حکومتی ایجنٹوں کی طرف سے اذیت رسانی چیمبرز میں اس طریقہ کار کے استعمال میں بہت واضح فرق ہوتا ہے۔‘‘

ایمنسٹی انٹر نیشنل کو 1977 ء میں امن کا نوبل انعام دیا گیا تھا جس کی بنیادی وجہ اس ادارے کی اذیت رسانی کے خاتمے کی جدو جہد تھی۔ اب اس نے ایک نئی دو روزہ مہم شروع کی ہے جس کا مقصد ایمنسٹی کے اہم ترین مقاصد میں سے ایک پر دوبارہ سے توجہ مرکوز کرنا ہے۔