پاکستان کی ملالہ یوسف زئی اور بھارت کے کیلاش ستیارتھی کو دس دسمبر کو ناروے کے دارالحکومت اوسلو میں مشترکہ طور پر نوبل امن انعام دے دیا گیا۔ اس سے قبل ملالہ اور ستیارتھی نے کہا تھا کہ وہ دونوں پاک بھارت تعلقات میں بہتری کے خواہاں ہیں۔

نوبل انعام کی تاریخ میں سترہ سالہ ملالہ یوسف زئی یہ اعزاز حاصل کرنے والی سب سے کم عمر شخصیت بن گئی ہیں۔ نوبل انعامات دینے کا سلسلہ 1901ء میں شروع ہوا تھا۔ ملالہ کو گزشتہ برس بھی اس انعام کے لیے نامزد کیا گیا تھا مگر انہیں اس اعزاز کا حقدار اس سال ٹھہرایا گیا۔ نوبل کمیٹی کے مطابق ملالہ اور ستیارتھی کو یہ انعام بچوں اور نوجوانوں کے حقوق کے لیے آواز بلند کرنے پر دیا گیا۔

سولہ سالہ پاکستانی طالبہ ملالہ یوسف زئی کو بدھ بیس نومبر کو شٹراس برگ میں یورپی پارلیمان نے انسانی حقوق کے سخاروف انعام سے نوازا۔ اُسے یہ انعام لڑکیوں کی تعلیم کے لیے اُس کی اُس جرأت مندانہ جدوجہد کے اعتراف میں دیا گیا ہے، جس کے لیے اُس کی جان بھی داؤ پر لگ گئی تھی۔ 9 اکتوبر 2012ء کو طالبان نے وادیء سوات میں ملالہ کو گولی مار کر شدید زخمی کر دیا تھا۔

ملالہ یوسف زئی بیس نومبر بدھ کے روز شٹراس برگ میں یورپی پارلیمان کے اسپیکر مارٹن شُلز کے ہاتھوں انسانی حقوق کا انعام ’سخاروف پرائز‘ وصول کر رہی ہے۔ نوبل امن انعام یافتہ روسی منحرف آندرے سخاروف سے موسوم پچاس ہزار یورو مالیت کا یہ انعام یورپی یونین کا اہم ترین اعزاز گردانا جاتا ہے۔

یورپی پارلیمان سن 1988ء سے سخاروف پرائز دیتی چلی آ رہی ہے۔ یہ انعام ان شخصیات کو دیا جاتا ہے، جنہوں نے انسانی حقوق، اقلیتوں کے تحفظ، بین الاقوامی قانون کی پاسداری اور فکری آزادی کے لیے جدوجہد کی ہو۔ اب تک یہ انعام جنوبی افریقہ کے نیلسن منڈیلا اور میانمار کی آنگ سان سُوچی جیسی شخصیات کے حصے میں آ چکا ہے۔

ملالہ کے برمنگھم میں کئی آپریشنز ہوئے۔ ہسپتال سے فارغ ہونے کے بعد وہ اسی برطانوی شہر میں اپنے گھر والوں کے ساتھ قیام پذیر ہے۔ طالبان کی فائرنگ بھی لڑکیوں کے لیے تعلیم کے حق کے سلسلے میں ملالہ کی جدوجہد کو ختم نہیں کر سکی۔ ملالہ کی بڑھتی مقبولیت اور شہرت اُس کے پیغام کو اور زیادہ نمایاں کرتی چلی جا رہی ہے۔

اپنی 16 ویں سالگرہ پر ملالہ نے نیویارک میں اقوام متحدہ کے اجلاس سے خطاب کیا۔ اپنی کتاب ’آئی ایم ملالہ‘ میں وہ لکھتی ہے:’’اقوام متحدہ کے بڑے ہال میں کھڑے ہونا اور تقریر کرنا ایک ہراساں کر دینے والا تجربہ تھا لیکن میں جانتی تھی کہ مجھے کیا کہنا ہے۔ میرے سامنے صرف چار سو لوگ بیٹھے تھے لیکن جب میں نے ان کی طرف دیکھا تو یہ تصور کیا کہ میرے سامنے پوری دنیا کے کئی ملین انسان موجود ہیں۔‘‘

سخاروف پرائز اُن بہت سے اعزازات میں سے تازہ ترین ہے، جن سے ملالہ کو گزرے مہینوں میں نوازا گیا ہے۔ ابھی اکتوبر کے اوائل میں اس لڑکی کو حقوقِ انسانی کے لیے سرگرم برطانوی تنظیم "RAW in War" کا آنا پولٹ کوفسکایا انعام دیا گیا تھا۔ ایمنسٹی انٹرنیشنل نے اُسے ’ضمیر کی پیامبر‘ کا خطاب دیا۔

ملالہ کی خواہش ہے کہ وہ ایک روز واپس اپنے وطن پاکستان جائے۔ پاکستان میں ملالہ سیاست میں جانا چاہتی ہے اور ہو سکے تو وزیر اعظم بننا چاہتی ہے۔ اپنی اس خواہش کا اظہار ملالہ نےاپنے ایک انٹرویو کے دوران کیا ہے۔

سال 2013ء کے لیے امن کا نوبل انعام کیمیائی ہتھیاروں کی روک تھام کے عالمی ادارے ’آرگنائزیشن فار پروہیبیشن آف کیمیکل ویپنز‘ OPCW کو دیا گیا ہے۔ یہ ادارہ کیمیائی ہتھیاروں سے متعلق 1997ء میں منظور ہونے والے عالمی کنونشن کے تحت دنیا بھر میں کیمیائی ہتھیاروں کی صورتحال پر نظر رکھتا ہے۔ رواں برس اکتوبر میں اس ادارے کو شام میں کیمیائی ہتھیاروں کی تلفی کا کام سونپا گیا تھا۔

سال 2012ء کا نوبل انعام ’چھ دہائیوں سے بھی زائد عرصے سے یورپ میں ترقی، امن، مصالحت، جمہوریت اور انسانی حقوق کو فروغ دینے پر‘ یورپی یونین کو دیا گیا تھا۔ یورپی پارلیمنٹ کے اسپیکر مارٹن شُلز نے اس اعزاز کا خیر مقدم کرتے ہوئے کہا تھا: ’’یورپی یونین دراصل مصالحت ہی کا نام ہے۔ یورپی یونین ایسا منفرد پراجیکٹ ہے جس نے جنگ کو امن میں اور نفرت کو یکجہتی میں بدل دیا۔‘‘

سال 2011ء کے لیے نوبل انعام برائے امن لائبیریا اور یمن سے تعلق رکھنے والی تین خواتین کو دینے کا فیصلہ کیا گیا تھا۔ ان میں لائبیریا کی خاتون صدر ایلن جانسن سرلیف Ellen Johnson-Sirleaf اور لائبیریا ہی کی امن کے لیے سرگرم خاتون شہری لائما گبووی Leymah Gbowee کے علاوہ خواتین کے حقوق کے لیے مثالی کوششیں کرنے والی یمنی خاتون توکل کرمان شامل تھیں۔

چینی مصنف لیو ژیاؤبو کو سال 2010 کا نوبل انعام برائے امن دیا گیا تھا۔ جمہوریت نواز ژیاؤبو اس وقت چین میں 11 برس قید کی سزا کاٹ رہے ہیں۔

امریکی صدر باراک اوباما کو امن کا نوبل انعام دسمبر 2009 میں اس وقت دیا گیا، جب انہیں عہدہ صدارت سنبھالے ابھی ایک برس بھی نہیں ہوا تھا۔ بعض نقادوں کی طرف سے اس پر تنقید بھی کی گئی کہ انہیں ایسے اقدامات کے لیے یہ انعام پیشگی طور پر دے دیا گیا، جو انہیں ابھی کرنا تھے۔

فن لینڈ کے سیاستدان اور 1994ء سے 2000ء تک ملک کے صدر رہنے والے مارتی اہتساری کو عالمی سطح پر سفارت کاری اور مصالحت کاری کے حوالے سے جانا جاتا ہے۔ نوبل کمیٹی نے ’’مختلف براعظموں میں تین دہائیوں سے بھی زائد عرصے تک بین الاقوامی تنازعات کو حل کرانے کے سلسلے میں ان کی کوششوں پر‘‘ انہیں 2008ء کا نوبل انعام دینے کا فیصلہ کیا تھا۔

سابق امریکی نائب صدر ایل گور اور ’انٹرگورنمنٹل پینل آن کلائمیٹ چینج‘ کے چیئرمین ڈاکٹر راجندر کے پاچوری کومشترکہ طور پر سال 2007 کا نوبل انعام برائے امن دیا گیا۔ انہیں یہ اعزاز تحفظ ماحول کے لیے ان کی کوششوں کے صلے میں ملا تھا۔

سال 2006ء کے نوبل انعام برائے امن سے معروف بنگلہ دیشی ماہر معاشیات اور ’غربا کے بینکر‘ محمد یونس اور ان کے قائم کردہ ’گرامین بینک‘ کو نوازا گیا۔ ان کے بینک نے کئی ملین غریب افراد کو انتہائی آسان شرائط پر قرضے دیے، جن سے ان کا معیار زندگی بہتر ہوا۔

2005ء کا نوبل امن انعام جوہری توانائی کے عالمی ادارے IAEA کو دیا گیا تھا۔ اس ادارے کو یہ اعزاز جوہری توانائی کو فوجی مقاصد کے استعمال سے روکنے کے لیے اس کے کردار کو سراہتے ہوئے دیا گیا۔ اُس وقت انٹرنیشنل اٹامک انرجی ایجنسی کے سربراہ، مصر سے تعلق رکھنے والے محمد البرادعی نے یہ اعزاز وصول کیا تھا۔

ونگاری ماتھائے پہلی افریقی خاتون ہیں، جنہیں امن کے نوبل انعام سے نوازا گیا۔ کینیا کی پروفیسر اور سائنسدان ماتھائے کو یہ انعام پائیدار ترقی، جمہوریت اور امن کے لیے ان کی کوششوں پر دیا گیا، جو انہوں نے اپنی ’گرین بیلٹ موومنٹ‘ نامی تنظیم کے ذریعے کیں۔ یہ تنظیم 1977 میں خواتین کے حقوق کے تحفظ کے لیے بنائی گئی تھی۔ ماتھائے کا انتقال 25 ستمبر 2011 کو ہوا۔

ایرانی وکیل شیریں عبادی پہلی مسلمان اور ایرانی خاتون ہیں جنہیں نوبل انعام برائے امن دیا گیا۔ عبادی کو اس اعزاز سے جمہوریت اور انسانی حقوق کے علاوہ امن کے لیے ان کی غیر معمولی کوششوں پر نوازا گیا تھا۔

بارہ سال قبل امن کا نوبل انعام اقوام متحدہ کے اداروں کو دیا گیا۔ جنرل اسمبلی کے صدر اس وقت جنوبی کوریا کے وزیر خارجہ ہان سیونگ سُو تھے جبکہ اقوام متحدہ کی سربراہی اس وقت سکریٹری جنرل کوفی عنان کے ہاتھوں میں تھی۔

1993ء میں پی ایل او کے چیئرمین یاسر عرفات نے اسرائیل کے ساتھ مذاکرات کا آغاز کیا جس کا نتیجہ مشرق وسطیٰ کے تنازعے کے ان فریقین کے ایک دوسرے کو تسلیم کرنے کی صورت میں نکلا۔ 1994ء میں یاسر عرفات کو اسرائیلی وزیر اعظم یٹساک رابین اور وزیر خارجہ شیمعون پیریز کے ساتھ مشترکہ طور پر نوبل انعام برائے امن دیا گیا۔

جنوبی افریقہ کے صدر کی حیثیت سے فریڈرک ڈی کلارک نے ملک میں جاری نسلی امتیاز پر مبنی قوانین ختم کرنے میں اہم کردار ادا کیا۔ نسلی امتیاز کے دور میں افریقی نیشنل کانگریس نامی پارٹی کے سربراہ نیلسن منڈیلا نے 27 برس جیل میں گزارے۔ ان دونوں افراد کو جنوبی افریقہ میں نسلی امتیاز کے خاتمے کی کوششوں کے لیے نوبل انعام برائے امن سے نوازا گیا تھا۔

اونگ سان سوچی 1980ء کی دہائی کے آخر سے اپنے وطن میانمار یا سابقہ برما میں جمہوریت کے لیے پرامن جدوجہد کر رہی ہیں۔ سوچی کو 1991ء میں امن کے نوبل انعام سے نوازا گیا۔

نوبل انعام کی تاریخ کا اب تک کا سب سے بڑا اختلافی فیصلہ جرمن کیمیا دان فرٹز ہابر کو نوبل انعام سے نوازنہ تھا۔ انہیں 1918ء میں کیمیا کا نوبل انعام دیا گیا۔ انہوں نے امونیا کا ایسا مرکب ایجاد کیا، جسے کھاد بنانے میں استعمال کیا جاتا ہے۔ ساتھ ہی ہابر کو’’ کیمیائی ہتیھاروں کا خالق‘‘ بھی کہاجاتا ہے۔ ان کی ایجاد کردہ کلورین گیس پہلی عالمی جنگ میں بڑی تباہی کا باعث بنی تھی۔

جرمن سائسندان اوٹو ہان (درمیان میں) کو جوہری انشقاق کی دریافت پر 1945ء میں کیمیا کا نوبل انعام دیا گیا۔ انہوں نے اپنی اس ایجاد کو عسکری شعبے میں استعمال کرنے کے حوالے سے تحقیق نہیں کی تھی تاہم اسے براہ راست جوہری بم بنانے میں استعمال کیا گیا۔ نوبل کمیٹی انہیں 1940ء میں نوبل انعام دینا چاہتی تھی لیکن انہیں ہیروشیما اور ناگاساکی میں کیے جانے والے حملوں کے بعد 1945ء میں یہ اعزاز دیا گیا۔

سوئس محقق پاؤل مؤلر کو 1948ء میں ’ڈی ڈی ٹی‘ بنانے پر طب کو نوبل انعام دیا گیا۔ ’ڈی ڈی ٹی‘ کیڑے مار دوا ہے، جو ملریا جیسی دیگر بیماریوں پر قابو پانے میں قدرے مددگار ثابت ہوئی۔ اس نے دوسری عالمی جنگ اور بعد کے دور میں بہت لوگوں کی جان بچائی لیکن تحفظ ماحول کی تنظیموں کا خیال ہے کہ یہ ایجاد انسانی صحت اور جنگلی حیات کے لیے نقصان دہ ہے۔ اس کے بعد ڈی ڈی ٹی کے زرعی استعمال پر پابندی عائد کر دی گئی۔

جرمن امن پسند کارل فان اوسیتزکی کو اسلحہ سازی کےخفیہ جرمن منصوبے کو فاش کرنے پر 1935ء میں امن کے نوبل انعام کا حقدار ٹھہرایا گیا۔ اس فیصلے پر احتجاج کرتے ہوئے نوبل کمیٹی کے دو ارکان مستعفی ہو گئے تھے۔ کارل فان اوسیتزکی کو غداری کے مقدمے میں جیل بھیج دیا گیا جبکہ ہٹلر نے نوبل کمیٹی پر جرمن معاملات میں دخل اندازی کا الزام عائد کیا۔

سابق امریکی وزیر خارجہ ہینری کسنگر اور شمالی ویتنام کے رہنما ’لے ڈک تھو‘ کو امن کا نوبل انعام دینے کو شدید تنقید کا نشانہ بنایا گیا۔ 1973ء کے اس فیصلے پر نوبل کمیٹی کے دو ارکان مستعفی ہو گئے تھے۔ ان دنوں کو فائر بندی کی کوششوں پر یہ ایوارڈ دینے کا اعلان کیا گیا۔ تھو نے تو اسے لینے سے انکار کر دیا تھا جبکہ کسنگر کے ایک نمائندے نے یہ ایوارڈ وصول کیا۔ اس فیصلے کے بعد بھی جنگ مزید دو سال جاری رہی تھی۔

آزاد منڈیوں کی وکالت کرنے والے ملٹن فریڈمین کو معاشیات کا نوبل انعام دینے کو متنازعہ ترین فیصلوں میں سے ایک قرار دیا جاتا ہے۔ فریڈمین کے چلی کے آمر آگستو پینوشے کے ساتھ روابط کی وجہ سے دنیا بھر میں بائیں بازو کے حلقوں نے 1976ء کے اس فیصلے کے خلاف احتجاج کیا۔ مخالفین کا کہنا ہے کہ ان کی نظریات سے متاثر ہو کر چلی کی حکومت نے لوگوں پر تشدد شروع کیا اور کئی ہزار افراد لاپتہ ہو گئے۔

1994ء میں فلسطینی رہنما یاسر عرفات، اسرائیلی وزیراعظم اسحاق رابن اور وزیر خارجہ شیمون پیریز کو مشترکہ طور پر امن کے نوبل انعام کا حقدار ٹھہرایا گیا۔ اس کا مقصد مشرقی وسطٰی امن منصوبے میں تیزی لانا تھا۔ تاہم اس سے بات چیت کے عمل پر کوئی اثر نہیں پڑا اور ایک سال بعد ایک اسرائیلی قوم پرست نے رابن کو قتل کر دیا۔ نوبل کمیٹی کے ایک رکن نے یاسر عرفات کو’ دہشت گرد‘ کہتے ہوئے عہدے سے استعفی دے دیا تھا۔

قدیم مایا نسل کے حقوق کے لیے آواز اٹھانے والی ریگوبیرتا مینچُونے 1992ء میں امن کا نوبل انعام حاصل کیا۔ انہیں سماجی انصاف اور نسلی و ثقافتی مفاہمت کے لیے ان کی کوششوں پر اس ایوارڈ کا حق دار ٹھہرایا گیا۔ تاہم یہ فیصلہ اس وقت کافی متنازعہ ثابت ہوا، جب یہ خبر منظر عام پر آئی کہ شائع ہونے والی ان کی یادداشت جزوی طور پر فرضی ہے۔ بہت سے حلقوں کا خیال ہے کہ وہ اس ایوارڈ کی بالکل بھی حقدار نہیں تھیں۔

امریکی صدر باراک اوباما کو 2009ء میں ملنے والے امن کے نوبل انعام نے بہت سے حلقوں کو حیران کر دیا تھا اور حیران ہونے والوں میں اوباما خود بھی شامل تھے۔ انہیں بین الاقوامی سفارت کاری اور اقوام کے مابین تعلقات کو مستحکم کرنے کے ان کے ارادوں پر یہ ایوارڈ دیا گیا تھا۔ ناقدین اور اوباما کے حامیوں کا موقف تھا کہ انہیں یہ ایوارڈ اس وقت دینا چاہیے تھا کہ جب ان کے منصوبوں کے نتائج سامنے آتے۔

2011ء میں طب کا نوبل انعام جولیس ہوف، بروس بؤٹلر اور رالف اشٹائن مین کو نئے’ امیون سسٹم سیل‘ کی دریافت پر مشترکہ طور پر نوبل انعام برائے طب دیا گیا۔ اعلان سے چند دن قبل اشٹائن مین کا سرطان کی وجہ سے انتقال ہو گیا تھا۔ قانون کے مطابق بعد از مرگ کوئی بھی نوبل انعام وصول نہیں کرسکتا۔ تاہم نوبل کمیٹی یہ کہتے ہوئے اشٹائن مین کے حق میں فیصلہ کیا کہ نامزدگی کے وقت انہیں اس سائنسدان کی موت علم نہیں تھا۔

نوبل انعام اپنی نامزدگیوں اور اصل حقداروں کو نظر انداز کیے جانے کے حوالوں سے متنازعہ رہے ہیں۔ بھارت میں پر امن تحریک کے بانی گاندھی کو پانچ مرتبہ اس انعام کے لیے نامزد کیا گیا مگر ایک مرتبہ بھی فیصلہ ان کے حق میں نہیں ہوا۔ 2006ء میں ناروے کی نوبل کمیٹی کے گیئر لنڈےسٹاڈ نے کہا ’’ نوبل انعام کی 106 سالہ تاریخ کی سب سے بڑی غلطی یہ ہے کہ مہاتما گاندھی کو امن کا نوبل انعام نہیں دیا گیا۔‘‘