پاکستانی فوج کے اعلیٰ کمانڈروں کا کہنا ہے کہ نو مئی کے منصوبہ سازوں، اکسانے والوں، حوصلہ افزائی کرنے والوں اور شہداء کی یادگاروں کی بے حرمتی کرنے والوں کو یقینی طور پر قانون کے تحت انصاف کے کٹہرے میں لایا جائے گا۔

تاریخ نگران دور کو کیسے یاد رکھے گی؟

پاکستانی فوج کے سربراہ عاصم منیر کی صدارت میں منگل کے روز کور کمانڈروں کا ایک اجلاس ہوا، جس میں کہا گیا کہ فوج نے قانون کے تحت انتخابی عمل کے دوران عوام کو تحفظ دینے کا کام کیا اور اس حوالے سے اس پر الیکشن میں مداخلت کے غیر مصدقہ الزامات افسوسناک ہیں۔

انتخابی دھاندلی کی تحقیقات کے لیے زور پکڑتے مطالبات

دوسری طرف امریکہ نے ایک بار اس بات پر زور دیا ہے کہ انتخابات کے دوران جو بے ضابطگیاں ہوئی ہیں ان کی مکمل طور پر تفتیش کی جانی چاہیے۔

فوج نے اپنے بیان میں کیا کہا؟ 

راولپنڈی میں جنرل ہیڈ کوارٹرز میں چیف آف آرمی سٹاف جنرل سید عاصم منیر کی صدارت میں ہونے والے اجلاس میں پاکستان کی قابل فخر عوام پر زور دیا گیا کہ وہ مثبت اور متحد رہیں اور ملک کی ترقی اور ترقی میں دل و جان سے حصہ لیں۔

پاکستان میں حکومت سازی کا عمل کھٹائی کا شکار کیوں؟

پاکستانی فوج کے شعبہ تعلقات عامہ (آئی ایس پی آر) کی طرف سے جاری بیان میں کہا گیا کہ ''پاکستان کی مسلح افواج نے قانون کے مطابق عام انتخابات کے انعقاد کے لیے عوام کو محفوظ ماحول فراہم کیا اور اس سے زیادہ افواج پاکستان کا انتخابی عمل سے کوئی تعلق نہیں تھا۔''

پاکستان انتخابات میں ہونے والی بے ضابطگیوں کی تفتیش کرے، امریکہ

کور کمانڈروں کے فورم نے اس بات پر مایوسی کا اظہار کیا کہ سیاست اور میڈیا کے کچھ مخصوص چھوٹے طبقے، خاص طور پر سوشل میڈیا، مداخلت کے بے بنیاد الزامات لگا کر مسلح افواج کو بدنام کر رہے ہیں، جو کہ انتہائی افسوسناک ہے۔

بینگن، بوتل، چارپائی، کس نشان پر مہر لگائیں؟ ووٹرز مخمصے میں

بیان میں کہا گیا، ''یہ بدقسمتی کی بات ہے کہ گڈ گورننس، معاشی بحالی، سیاسی استحکام اور عوامی بہبود جیسے حقیقی مسائل پر توجہ دینے کے بجائے، ایسے مفاد پرست عناصر کی پوری توجہ اپنی ناکامیوں پر دوسروں کو قربانی کا بکرا بنانے کی کوشش کر کے سیاسی عدم استحکام اور غیر یقینی صورتحال پیدا کرنے پر مرکوز ہے۔''

آئی ایس پی آر نے اپنے بیان میں مزید کہا کہ '' بدنیتی پر مبنی کنفیوژن اور غلط معلومات پھیلانے کی کوششیں بالکل بے سود ہیں اور یہ اس منظم مہم کا حصہ ہے، جو تنگ نظرسیاسی مفادات کے لیے چلائی جا رہی ہے تاکہ سرزد ہونے والی گھناؤنی سرگرمیوں کو دھندلا دیا جا سکے۔''

'نو مئی کے منصوبہ سازوں کو بخشا نہیں جائے گا '

آئی ایس پی آر نے اپنے بیان میں اس بات پر بھی زور دیا کہ کور کمانڈرز کانفرنس نے معاشرے میں مایوسی اور تقسیم کے بیج بونے کے لیے بعض مذموم عناصر کی جانب سے منظم غلط معلومات اور جعلی خبروں کے پھیلاؤ پر تشویش کا اظہار کیا ہے۔

پاکستانی انتخابات پر اقوام متحدہ کی تشویش اور اسلام آباد کا جواب

اعلیٰ فوجی کمانڈروں نے اپنے اس عزم کا اعادہ کیا کہ نو مئی کے واقعات کے ''منصوبہ سازوں، اکسانے والوں، حوصلہ افزائی کرنے والوں، مجرموں اور شہداء کی یادگاروں کی بے حرمتی کرنے والوں اور فوجی تنصیبات پر حملہ کرنے والوں کو یقینی طور پر قانون اور آئین کی متعلقہ دفعات کے تحت انصاف کے کٹہرے میں لایا جائے گا۔''

 امریکا کا انتخابی بے ضابطگیوں کی تحقیقات کا اعادہ

 امریکی محکمہ خارجہ نے منگل کے روز ہی پاکستان کی نو منتخب حکومت پر زور دیا ہے کہ وہ ملک میں مبینہ انتخابی بے ضابطگیوں کی مکمل تحقیقات کرے۔

یہ بیان واشنگٹن کے اس بیان کے ایک دن بعد آیا ہے، جب امریکہ نے مریم نواز کو پنجاب کی پہلی خاتون وزیر اعلیٰ منتخب ہونے پر مبارکباد پیش کرنے کے ساتھ ہی نئے وزیر اعظم شہباز شریف کی قیادت میں پاکستان کے ساتھ اپنی مضبوط شراکت داری کو مضبوط بنانے کے عزم کا اعادہ کیا تھا۔

ماحولیاتی تبدیلیاں، پاکستانی انتخابات میں کہیں پیچھے

ایک نیوز بریفنگ کے دوران محکمہ خارجہ کے ترجمان میتھیو ملر نے نئی پاکستانی حکومت کے ساتھ مل کر کام کرنے کے وائٹ ہاؤس کے عزم کا اعادہ کیا۔ تاہم انہوں نے تسلیم کیا کہ ''بے ضابطگیوں کی اطلاع ملی تھی اور سیاسی جماعتوں کی جانب سے بھی نتائج میں چیلنجز سامنے آئے ہیں۔ ہم ان چیلنجوں کو دیکھنا چاہتے ہیں، ان بے ضابطگیوں کی مکمل تحقیقات ہونی چاہیے۔''

ملر نے سیاسی جماعتوں کی طرف سے اٹھائے گئے خدشات کو دور کرنے اور صورتحال کو واضح کرنے کے لیے مکمل تحقیقات کو یقینی بنانے کی اہمیت پر بھی زور دیا۔

جمہوری استحکام ملک کی ترقی کا واحد راستہ

آئی ایس پی آر کے بیان کے مطابق کور کمانڈروں کے فورم نے مرکز اور صوبوں میں اقتدار کی ہموار جمہوری منتقلی پر اطمینان کا اظہار کیا اور امید ظاہر کی کہ انتخابات کے بعد کا ماحول مطلوبہ سیاسی اور معاشی استحکام آئے گا، جس کے نتیجے میں پاکستان کے عوام کے لیے امن اور خوشحالی بھی آئے گی۔

آئی ایس پی آر نے کہا کہ فورم کا پختہ یقین ہے کہ جمہوری استحکام ملک کے لیے آگے بڑھنے کا واحد راستہ ہے۔ اس نے کہا کہ فوجی قیادت چیلنجز اور خطرات سے پوری طرح آگاہ ہے اور وہ پاکستان کی مضبوط عوام کی حمایت کے ساتھ اپنی آئینی ذمہ داریاں نبھانے کے لیے

 پرعزم ہے۔

فورم نے سیکورٹی خطرات سے نمٹنے اور ملک کی سماجی و اقتصادی ترقی کو بڑھانے میں حکومت کو مکمل تعاون فراہم کرنے کے اپنے عزم کا اعادہ کیا۔

عسکری قیادت نے مسلح افواج کے افسران، جوانوں، قانون نافذ کرنے والے اداروں اور شہریوں سمیت شہداء کی عظیم قربانیوں کو زبردست خراج تحسین پیش کیا جنہوں نے ملک میں امن و استحکام کو یقینی بنانے کے لیے اپنی جانوں کا نذرانہ پیش کیا۔

ص ز / ج ا (نیوز ایجنسیاں)