خبر رساں ادارے اے پی کے مطابق  بھارت کے پنجابی گلوکار دلیر مہندی اور ان کے بھائی شمشیر سنگھ کو انسانوں کی اسمگلنگ کا الزام ثابت ہونے پر پٹیالہ کی ایک عدالت نے دو برس قید کی سزا سنائی ہے۔ تفصیلات کے مطابق  دلیر مہندی پر انسانوں کی اسمگلنگ کا یہ مقدمہ سن 2003ء میں درج کیا گیا تھا۔

دلیر مہندی اور ان کے آنجہانی بھائی شمشیر سنگھ پر الزام عائد تھا کہ وہ بھاری رقم کے عوض لوگوں کو اپنے گروپ میں شامل کرکے غیر قانونی طور پر بیرون ملک منتقل کرتے تھے۔ وہ مبینہ طور پر ان لوگوں سے رقم لے کر انہیں اپنے گروپ کا حصہ ظاہر کر کے اپنے بیرون ملک دوروں کے لیے ویزے لگواتے تھے۔

عدالت کے فیصلے کے بعد دلیر مہندی نے سماجی رابطوں کی ویب سائٹ ٹوئٹر پر ایک ویڈیو پیغام بھی جاری کیا۔ اس ویڈیو پیغام میں انہوں نے اپنے بے قصور ہونے کا دعویٰ کیا اور مقدمے کی تفصیلات بتاتے ہوئے ان کا کہنا تھا کہ یہ مقدمہ چودہ سال پرانا ہے اور وہ اس فیصلے کے خلاف سیشن کورٹ میں اپیل کریں گے۔

بھارت کے صوبہ پنجاب کے شہر پٹیالہ کی عدالت نے دلیر مہندی کو دو برس قید کی سزا سنانے کے بعد ان کی ضمانت کی درخواست بھی منظور کر لی ہے۔

دلیر مہندی کو سن 1990ء کی دہائی میں اپنے پنجابی گیتوں کی وجہ سے شہرت حاصل ہوئی تھی۔ وہ بالی ووڈ کی کئی فلموں کے لیے بھی گیت گا چکے ہیں۔