پاکستان میں کچھ عرصے سے انسداد پولیو مہم کی ٹیموں پر حملے دیکھنے میں آئے۔ یہ سلسلہ اس حد تک بڑھ گیا کہ گزشتہ برس دسمبر کے ماہ میں پارلیمان کے ایوان بالا نے انسداد پولیو کی مہم کی ٹیموں پر حملوں کی مذمتی قرارداد منظور کر لی۔ ان حملوں کے بعد اقوامِ متحدہ نے پاکستان میں جاری پولیو مہم میں شریک اپنے عملے کو واپس بلا لیا۔ پولیو کے خلاف مہم کا تعطل پاکستان میں پولیو کے خاتمے کی کوششوں کے لیے دھچکے سے کم نہیں۔ اب ایسی ہی صورتحال افریقی ملک نائجیریا میں نظر آ رہی ہے۔ نائجیریا کا شمار دنیا کے ان تین ممالک میں ہوتا ہے جہاں پولیو جیسی متعدی بیماری مسلسل پائی جاتی ہے۔ تاہم انسداد پولیو کی مہم کے بارے میں نائجیریا میں بھی ایک عرصے سے نظریہ سازش کار فرما ہے۔ تاہم ماہ رواں میں پولیو کے خلاف ٹیکے لگانے والی ٹیموں کے کارکنوں پر ہونے والے ہلاکت خیز حملوں نے اس معاملے کو سنگین تر اور خوفناک مسئلہ بنا دیا ہے۔

آٹھ فروری کو مسلح افراد نے دو کلینکس میں موجود پولیو کے ویکسینیشن کی ٹیم کے عملے پر حملے کیے جس کے نتیجے میں نائجیریا کےدوسرے بڑے شہر اور ملک کے شمال میں قائم مسلم اکثریتی علاقے ’کانو‘ میں کم از کم 10 افراد ہلاک ہو گئے۔ اس خونریز کارروائی سے دو روز قبل نائجیریا کے ریڈیو کے ایک مقبول پروگرام میں ایسے خطرناک نظریات نشر کیے گئے جن سے یہ تاثر دیا گیا کہ انسداد پولیو کی مہم دراصل مسلمانوں کے خلاف مغرب کی ایک سازش ہے۔ انہیں دنوں شہر زار یا ایک متنازعہ مسلم عالم الاول آدم البانی اس قسم کے تبصرے کر چکے تھے کہ مغرب پولیو ٹیکے سے متعلق صحیح معلومات کو پوشیدہ رکھے ہوئے ہے۔ تاہم اس امر کا کوئی ثبوت اب تک نہیں ملا ہے کہ کانو میں ہونے والی فائرنگ اور 10 افراد کی ہلاکت کے واقعے کا مذکورہ ریڈیو پروگرام اور مسلم عالم کے بیانات سے کوئی تعلق ہے۔ تاہم صورتحال نائجیریا کی حکومت کے لیے سنگین شکل اختیار کرتی جا رہی ہے۔ حکومتی اہلکار نائجیریا سے پولیو کے خاتمے کے لیے ممکنہ کوششیں کر رہے ہیں تاہم بل گیٹس جیسے خدمت خلق پر مامور معروف انسان دوست کی فاؤنڈیشن کی طرف سے شائع ہونے والی ایک تازہ ترین رپورٹ میں کہا گیا ہے کہ نائجیریا سے پولیو کا خاتمہ بہت مشکل عمل بن گیا ہے۔

اُدھر پاکستان میں پولیو کی ویکسین کے بارے میں پائے جانے والے اسی قسم کے شکوک و شبہات گزشتہ دسمبر میں 19 افراد کے جانوں کے ضیاع کا سبب بن چکے ہیں۔ نائجیریا کے علاوہ پاکستان اور افغانستان دو ملک ایسے ہیں جہاں پولیو کی متعدی بیماری علاقائی عارضے کی شکل میں موجود ہے۔ پولیو کا وائرس عام طور پر مُنہ کے ذریعہ جسم میں منتقل ہوتا ہے اور یہ زیادہ تر آلودہ پانی یا کھانے کے سبب پیدا ہوتا ہے۔

km/mm(AFP)