سوشل میڈیا ایپ انسٹا گرام نے اپنے آن لائن پلیٹ فارم کو ایک محفوظ جگہ بنانے کی کوششوں کے لیے نجی اکاؤنٹس کا اجراء کر دیا ہے۔ اس ضمن میں امریکہ، برطانیہ، کینیڈا اور آسٹریلیا میں کل منگل کے روز سے سائن اپ کرنے والے 18 سال سے کم عمر کے نئے صارفین کو محدود خصوصیات اور والدین کی زیادہ نگرانی کے ساتھ خصوصی ''ٹین اکاؤنٹس‘‘ دیے جا رہے ہیں۔

ان ممالک میں 18 سال سے کم عمر کے موجودہ انسٹا گرام صارفین کو بھی اگلے 60 دنوں میں  ٹین اکاؤنٹس پر منتقل کر دیا جائے گا۔

انسٹاگرام کی مالک کمپنی میٹا میں مصنوعات کے شعبے کی سربراہ نومی گلیٹاس نے کہا، ''والدین کی جانب سے، جن تین خدشات کا اظہار ہم سنتے ہیں،  وہ یہ ہیں کہ ان کے نوعمر بچے ایسا مواد دیکھ رہے ہیں جسے وہ نہیں دیکھنا چاہتے ہیں یا یہ کہ ایسے لوگ ان سے رابطہ کر رہے ہیں، جن سے وہ رابطہ نہیں کرنا چاہتے ہیں یا وہ ایپ پر بہت زیادہ خرچ کر رہے ہیں۔‘‘

ان کا مزید کہنا تھا، ''لہٰذا ٹین اکاؤنٹس حقیقتاﹰ ان تینوں خدشات کو دور کرنے پر مرکوز ہیں۔‘‘

ٹین اکاؤنٹس کن فیچرز کو محدود کرتے ہیں؟

 بنیادی طور پر نجی اکاؤنٹس ہونے کے علاوہ ٹین اکاؤنٹس صرف ان لوگوں کے پیغامات ہی وصول کر سکتے ہیں، جن کو وہ فالوکرتے ہیں یا جن سے وہ پہلے سے جڑے ہوئے ہیں۔

یہ پلیٹ فارم ''حساس مواد‘‘ تک رسائی بھی محدود کر دے گا، جس میں تشدد اور خوبصورتی کے لیے مصنوعی طریقہ کار اپنانے کو فروغ دینے والی ویڈیوز شامل ہیں۔ اگر کوئی صارف 60 منٹ سے زیادہ آن لائن رہتا ہے تو انسٹاگرام ٹین اکاؤنٹس نوٹیفکیشن بھیجے گا۔

ایک ''سلیپ موڈ‘‘ رات دس بجے سے صبح سات بجے کے درمیان نوٹیفکیشنزکو خود بخود خاموش کر دے گا اور اس دوران آنے والے پیغامات کے خود کار طریقے سے جواب دے کر  لوگوں کو صارف کے ساتھ دن کے وقت رابطہ کرنے کا کہے گا۔ اس اکاؤنٹ کی سیٹنگز تک والدین کو بھی رسائی ہوگی تاکہ یہ مانیٹر کیا جا سکے کہ ان کے بچے آن لائن کن مشاغل میں مصروف ہیں۔

گلیٹ نے کہا، ''والدین فیملی سینٹر کے ذریعے دیکھ سکیں گے، کہ ان کے نوعمر بچوں کو کون پیغام بھیج رہا ہے اور  وہ اس بارے میں   اپنے بچوں کے ساتھ بات چیت  کر سکیں گے۔‘‘

"اگر کوئی آن لائن دھونس یا ہراسانی کا شکار ہو رہا ہے، تو والدین کو یہ معلوم ہوگا کہ ان کا نوعمر بچہ یا بچی  کس کو فالو کر رہا ہے اور کون ان کے بچوں کو فالو کر رہا ہے، ان کے ٹین ایجر نے گزشتہ سات دنوں میں کس کو میسج کیا ہے اور امید ہے کہ اس  گفتگو کی روشنی میں وہ  اپنے بچوں کو ان مشکل آن لائن حالات میں راستہ ڈھونڈنے میں مدد کریں گے۔‘‘

'ٹین اکاؤنٹس‘ کو ختم کیسے کیا جا سکتا ہے؟

18 سال سے کم عمر کے تمام صارفین کو ٹین اکاؤنٹس خود بخود دیے جائیں گے۔ 16 اور 17 سال کی عمر کے نوجوان سیٹنگز میں جا کر ان  پابندیوں کو غیر فعال کر سکتے ہیں۔ تاہمم پندرہ سال اور اس سے کم عمر کے بچوں کو ایسا کرنے کے لیے اپنے والدین کی اجازت درکار ہوگی۔

ش ر⁄ اب ا (اے پی، روئٹرز)