سائنسدانوں کا کہنا ہے کہ انٹارکٹیکا مین لینڈ میں پہلی بار ایک نہایت مہلک برڈ فلو کی موجودگی کی تصدیق ہوگئی ہے، جس سے وہاں موجود  پینگوئنز کی کالونیاں کو خطرہ ہو سکتا ہے۔   

اسپین کی 'ہائر کونسل فار سائنٹفک انویسٹی گیشن' (CSIC)  نے اس حوالے سے  اتوار کو ایک بیان میں کہا کہ اس پیش رفت سے پہلی بار یہ بات سامنے آئی ہے کہ انٹارکٹیکا کے دوسرے براعظموں سے دور ہونے اور ان کے درمیان موجود "قدرتی رکاوٹوں" کے باوجود 'ہائلی پیتھوجینک ایویئن انفلوئنزا وائرس' وہاں پہنچ گیا ہے۔

CSIC کے مطابق اس مخصوص برڈ فلو وائرس کی  انٹارکٹیکا میں موجودگی کی تصدیق گزشتہ ہفتے کے روز ہوئی تھی، جب ارجنٹائن کے سائنسدانوں نے انٹارکٹک بیس پریماویرا کے قریب ملنے والے سمندری پرندوں سکوا کے مردہ جسموں کے نمونوں کا ٹیسٹ کیا تھا۔

کونسل کے بیان میں یہ بھی کہا گیا ہے کہ'' اس تجزیے  سے یہ بات حتمی طور پر واضح ہو گئی  ہے کہ یہ پرندے ایویئن انفلوئنزا کی ذیلی قسم H5 سے متاثر ہوئے تھے اور مردہ پرندوں میں سے کم از کم ایک کے جسم میں انتہائی پیتھوجینک ایوین انفلوئنزا وائرس موجود تھا۔"

جزیرہ نما  انٹارکٹک میں اس وائرس کی موجودگی کی تصدیق سے قبل اس کے قریب واقع جزیروں میں بھی اس برڈ فلو کے کیسز سامنے آئے تھے، جن کا شکار جینٹو پینگوئنز بھی ہوئی تھیں۔ اب  انٹارکٹیکا مین لینڈ میں اس کی موجودگی کی تصدیق کے بعد یہ بات نمایاں ہوگئی ہے کہ اس خطے میں پینگوئنز کی کالونیوں کو H5N1 ایویئن فلو سے خطرہ ہے۔ یہ وہی فلو ہے جو حالیہ مہینوں میں دنیا بھر میں پرندوں کی آبادیاں ختم کرنے کا سبب بنا ہے۔

ارجنٹائن کے انٹارکٹک انسٹی ٹیوٹ نے بھی پیر کو ایک بیان میں کہا تھا کہ اس ارجنٹائن  کے محققین نے ہسپانوی محققین کے تعاون سے رواں سال کے اوائل میں ارجنٹائن بیس کے قریب ملنے والے مردہ پرندوں کے نمونوں کا ٹیسٹ کیا تھا، اور اس کے بعد بھی خطے میں اس برڈ فلو کے وائرس کی موجودگی کی تصدیق ہوئی تھی۔

 اس کے علاوہ اب 'سائنٹفک کمیٹی آن انٹارکٹک ریسرچ' کی ریسرچ بیس میں موجود ڈیٹا میں بھی اس برڈ فلو کا ایک تصدیق شدہ کیس شامل ہے۔

لاکھوں پینگوئنز گنجان کالونیوں کی شکل میں انٹارکٹک براعظم اور قریبی جزائر پر جمع ہوتی ہیں، جس سے اس اب مہلک وائرس کو آسانی سے پھیلنے کا موقع مل سکتا ہے۔

ک م/ م ا(روئٹرز)