اپنے بچے سے بدسلوکی کا الزام: بریڈ پِٹ کی بے گناہی ثابت
بینش جاوید
10 نومبر 2016
نامور امریکی اداکار بریڈ پٹ پر ان کی سابق اہلیہ نے الزام عائد کیا تھا کہ انہوں نے اپنے ایک بچے کے ساتھ بدسلوکی کی تھی۔ اس مقدمے میں بریڈ پٹ کو بے قصور قرار دے دیا گیا ہے۔
اشتہار
نیوز ایجنسی اے ایف پی کے مطابق بریڈ پٹ پر ان کی سابق اہلیہ انجیلینا جولی نے الزام عائد کیا تھا کہ رواں برس برس ستمبر میں فرانس کی فلائٹ کے دوران بریڈ پٹ نے اپنے 15 سالہ بیٹے میڈاکس کو جان بوجھ کر پیٹا تھا۔
اس الزام عائد کے بعد سماجی کارکنان نے بریڈ پٹ، انجیلینا جولی، ان کے بچوں اور عینی شاہدین کے انٹرویو کیے تھے۔ امریکی چینل سی این این اور یو ایس اے ٹوڈے کے مطابق ’لاس اینجلس کاؤنٹی ڈیپارٹمنٹ آف چلڈرن اینڈ فیملی سروس‘ نے اپنی رپورٹ میں کہا ہے کہ 52 سالہ بریڈ پٹ کسی طرح کی بدسلوکی میں ملوث نہیں تھے۔
41 سالہ انجیلینا جولی نے اس برس ستمبر میں بریڈ پٹ سے طلاق لینے کے لیے درخواست دے دی تھی۔ انجیلینا جولی نے اپنے تمام چھ بچوں کی مکمل پرورش کا حق یا تحویل حاصل کرنے کے لیے بھی عدالت میں درخواست دی ہوئی ہے جبکہ بریڈ پٹ نے عدالت میں بچوں کی مشترکہ پرورش اور دیکھ بھال کے لیے کیس کیا ہوا ہے۔
سن 2004 سے انجیلینا جولی اور بریڈ پٹ ایک ساتھ تھے۔ انہوں نے دو سال قبل شادی کر لی تھی۔
’برینجلینا‘ کا عروج و زوال
گزشتہ دس برسوں سے انجلینا جولی اور بریڈ پٹ کو ہالی وُڈ کی سب سے طاقتور اور خوبصورت ترین جوڑی تصور کیا جاتا تھا۔ ان کی محبت کے آغاز سے اچانک اختتام تک کی کہانی پر ایک نظر۔
تصویر: Getty Images/K. Winter
’’مسٹر اینڈ مسز سمتھ‘‘ کے سیٹ پر محبت کا آغاز
جولی اور پٹ میں محبت کا آغاز سن دو ہزار چار میں بنائی جانے والی کامیڈی اور ایکشن فلم ’’مسٹر اینڈ مسز سمتھ‘‘ کے سیٹ پر ہوا۔ اس فلم کی شوٹنگ کے دوران ہی دونوں کی محبت کی خبریں منظر عام پر آنا شروع ہو گئی تھیں لیکن اس وقت تک پٹ اداکارہ جینیفر اینسٹن کے ساتھ شادی کے بندھن میں بندے ہوئے تھے۔
تصویر: picture-alliance/kpa
’برینجلینا‘ کی بڑی فیملی
ہالی وُڈ اسٹار بریڈ پٹ کے ساتھ جولی کے چھ بچے ہیں۔ ان میں سے تین کو انہوں نے گود لیا ہے۔ جولی کے ہاں پہلی بیٹی سن دو ہزار چھ میں پیدا ہوئی جبکہ سن دو ہزار آٹھ میں جولی کے ہاں جڑواں بچے پیدا ہوئے۔
تصویر: picture-alliance/abaca/E. Pantaleo
جولی اور پٹ کا محل
جولی اور پٹ سن دو ہزار آٹھ میں ’شیتو میروال‘ میں منتقل ہو گئے۔ یہ علاقہ فرانس کے جنوب میں واقع ہے اور اعلیٰ معیار کی وائن کے لیے مشہور ہے۔ بعد ازاں اس جوڑے نے اپنی شادی کی تقریب بھی اسی گھر میں منعقد کی۔
تصویر: Getty Images/AFP/M. Gangne
شادی میں تاخیر
سن دو ہزار چھ میں اپنے ایک انٹرویو میں پٹ کا کہنا تھا کہ وہ اور جولی ’اس وقت تک باقاعدہ شادی نہیں کریں گے، جب تک امریکا میں ہر وہ شخص قانونی طور پر شادی کے قابل نہیں ہو جاتا، جو شادی کرنا چاہتا ہے۔‘‘ امریکا میں ہم جنس پرستوں کو شادی کی اجازت کہیں سن دو ہزار پندرہ میں ملی۔
تصویر: picture-alliance/abaca/H. Nebinger-Orban
فلاحی کاموں میں حصہ لینے والا جوڑا
پٹ اور جولی نے ایک امدادی تنظیم کی بنیاد رکھی اور فلاحی کام کرنے والی تنظیموں کا ساتھ دینا شروع کر دیا۔ اس جوڑے نے لاکھوں ڈالر عطیے میں دیے۔ سن دو ہزار بارہ میں اقوام متحدہ نے جولی کو مہاجرین کے لیے خصوصی مندوب نامزد کر دیا۔
تصویر: Getty Images/T. Stoddart
ایک حیران کن فیصلہ
سن دو ہزار تیرہ میں انجلینا جولی نے یہ انکشاف کیا کہ انہوں نے رحم کے کینسر سے بچنے کے لیے احتیاطی تدبیر کے طور پر اپنی بیضہ دانی اور بیض کی نالیاں نکلوا دی ہیں۔ انہوں نے چھاتی کے کینسر سے بچنے کے لیے دیگر خواتین کو بھی ایسا کرنے کا کہا۔
تصویر: Getty Images/J. Merritt
فرانس میں شادی
آخر کار سن دو ہزار چودہ میں پٹ اور جولی نے فرانس کے جنوب میں واقع اپنے گھر پر شادی کی۔ بچوں نے اپنی ماں جولی کی شادی کا جوڑا تیار کرنے میں مدد کی۔ ان بچوں نے اپنے والدین کی شادی کی باقی تقریبات میں بھی بھرپور حصہ لیا۔
تصویر: Imago/Levine-Roberts
آخری فلم
سن دو ہزار پندرہ میں امریکی سپر اسٹار انجلینا جولی نے اپنی نئی فلم ’سمندر کنارے‘ میں ایک شادی شدہ جوڑے کے مسائل کو موضوع بنایا۔ اس فلم میں وہ اپنے حقیقی شوہر بریڈ پِٹ کے ساتھ جلوہ گر ہوئیں۔ اب ستمبر میں جولی نے پٹ سے طلاق لینے کے لیے درخواست دے دی ہے۔