یورپ کی ایوی ایشن کمپنی ایئر بس نے دنیا بھر میں زیر استعمال اپنے طیاروں  اے 320 کی ہنگامی بنیادوں پر مرمت کا فیصلہ کیا ہے۔ یہ فیصلہ اس وقت کیا گیا جب گزشتہ ماہ ان طیاروں میں ایک سافٹ ویئر بگ سامنے آیا۔ حکام کے مطابق 30 اکتوبر کو جیٹ بلیو کی ایک پرواز کے سافٹ ویئر میں ایک مسئلہ پیدا ہوا، جس کے بعد طیارہ اچانک نیچے جانے لگا اور متعدد مسافر زخمی ہوئے۔ طیارے نے ہنگامی طور پر فلوریڈا میں لینڈنگ کی۔

ایئربس نے اپنی ابتدائی تحقیقات میں اس واقعے کو ایک ممکنہ ڈیجیٹل نقص سے جوڑا ہے۔ کمپنی کا کہنا ہے کہ غیر معمولی شمسی تابکاری طیارے کے فلائٹ کنٹرول سسٹم کے اہم ڈیٹا کو متاثر کر سکتی ہے، جو طیارے کے توازن اور اونچائی کو برقرار رکھنے میں بنیادی کردار ادا کرتا ہے۔

جیسے ہی یہ معلومات سامنے آئیں، یورپی یونین ایوی ایشن سیفٹی ایجنسی اور امریکی کی ایف اے اے ایجنسی نے فوری طور پر ان طیاروں کے سافٹ ویئر کو اپڈیٹ کرنے کا حکم جاری کر دیا ہے۔ 

یورپی ایوی ایشن اداروں کی جانب سے ان طیاروں میں سافٹ ویئر کو فوری طور پر اپ ڈیٹ کرنے کا کہا گیا ہے اور اس فیصلے سے سینکڑوںپروازیں تاخیر یا منسوخیکا شکار ہوئی ہیں۔

اس پابندی سے صرف امریکہ ہی میں 500 سے زیادہ پروازیں متاثر ہوئی ہیں۔  

امریکن ایئر لائنز، جس کے زیر استعمال تقریباً پانچ سو کے قریب اے 320 طیارے ہیں، نے بتایا کہ اس کے 209 طیاروں کو یہ اپ ڈیٹ درکار تھی اور زیادہ تر اپ ڈیٹس دو گھنٹوں میں مکمل ہو جائیں گی۔

ایوی ایشن انڈسٹری کے ماہر مائیک اسٹینگل کے مطابق اگرچہ یہ مسئلہ ایک سفری لحاظ سے مصروف ہفتے کے اختتام پر سامنے آیا ہے تاہم اچھی خبر یہ ہے کہ یہ خرابی سافٹ ویئر اپ ڈیٹ کے ذریعے چند گھنٹوں میں حل ہو سکتی ہے۔ ان کے بقول یہ طیارہ دنیا میں سب سے زیادہ زیر استعمال طیاروں میں شامل ہوتا ہے، اس لیے اس کی مرمت کا عمل تیزی سے جاری ہے۔

اے 320 فیملی، جو بوئنگ 737 کی براہِ راست حریف ہے، دنیا بھر میں چھوٹے اور درمیانی فاصلے کی پروازوں کا بنیادی ستون سمجھی جاتی ہے۔ ایئربس کمپنی کا دعویٰ ہے کہ یہ دنیا کا سب سے زیادہ فروخت ہونے والا سنگل آئل طیارہ ہے۔ یہی وجہ ہے کہ اس میں موجود سافٹ ویئر مسئلے نے عالمی سطح پر فوری توجہ حاصل کی۔

ایئر بس کی جانب سے جاری کردہ بیان کے مطابق مسئلہ زیادہ تر سافٹ ویئر سے متعلق ہے اور اس کا حل نسبتاً سادہ ہے۔ تاہم کسی بھی طیارے کو سافٹ ویئر اپ ڈیٹ کیے بغیر مسافروں کے ساتھ پرواز کی اجازت نہیں دی جائے گی۔ طیارے صرف مرمتی مراکز تک لے جانے کے لیے ہی اڑان بھر سکیں گے۔

دنیا بھر میں اس وقت 11 ہزار سے زائد اے 320 فیملی کے طیارے آپریشنل ہیں۔ ان میں سے بڑی تعداد امریکہ، چین، یورپ اور بھارت میں زیرِ استعمال ہے۔