ہرار کی بنیاد دسویں سے تیرہویں صدی کے درمیان یہاں نقل مکانی کر کے آنے والے عربوں نے رکھی تھی۔ اس شہر کے قدیمی حصے تک رسائی پانچ بڑے دروازوں کے ذریعے حاصل کی جا سکتی ہے۔ یہ صوبائی دارالحکومت بھی ہے اور یہاں زیادہ تر اُورومو نسل آباد ہے۔ سن دو ہزار چھ سے یہ عالمی ثقافتی ورثے میں بھی شامل ہے۔

اس شہر میں بیاسی چھوٹی بڑی مساجد کے علاوہ ایک سو سے زائد مزار بھی ہیں۔ جامع مسجد اس کی سب سے بڑی اور مرکزی مسجد ہے۔ ایتھوپیا کی ایک تہائی آبادی مسلمانوں پر مشتمل ہے لیکن اس شہر میں مسلمان اکثریت میں ہیں۔

جامع مسجد وہ واحد مسجد ہے، جہاں مردوں کے ساتھ ساتھ خواتین کو بھی نماز ادا کرنے کی اجازت ہے۔ خواتین کے لیے مسجد کی دائیں جانب ایک چھوٹا دروازہ رکھا گیا ہے۔ لیکن خواتین مسجد کے صحن یا بیرونی حدود میں بھی نماز ادا کرتی نظر آتی ہیں۔

قدیم شہر کی دیواروں کے اندر دو چرچ بھی واقع ہیں۔ میدان علم چرچ یہاں کا واحد آرتھوڈکس چرچ ہے۔ ہرار کے باشندوں کو یہاں قائم مذہبی ہم آہنگی پر فخر ہے۔ لیکن حالیہ کچھ عرصے کے دوران یہاں زمین کی ملکیت کے حوالے سے کچھ مسائل سامنے آئے ہیں۔

ایک لاکھ بیس ہزار سے زائد آبادی والے اس شہر کو یہاں کی صوفیانہ تعلیمات منفرد بناتی ہیں۔ سب سے مقدس مزار شیخ ابادر کا سمجھا جاتا ہے۔ ان کا شمار اس شہر کے بانیوں میں ہوتا ہے۔ یہاں پر ایسے مریدین کا بھی ہجوم رہتا ہے، جو نشے آور قات نامی پودے کے پتے چباتے رہتے ہیں۔

شروع میں قات کے پتوں کو صرف روحانی مقاصد کے لیے استعمال کیا جاتا تھا لیکن اب ایتھوپیا بھر میں ان کا استعمال ہوتا ہے۔ ہرار کا مضافاتی علاقہ اب بھی ان پتوں کی تجارت اور استعمال کا مرکز ہے۔ علاقے کی ستر فیصد زراعت اسی پر مشتمل ہے۔ مردوں کے ساتھ ساتھ خواتین کی ایک بڑی تعداد بھی ان پتوں کا استعمال کرتی ہے۔

ہرار کی معیشت کپڑوں کی صنعت سے بھی جڑی ہوئی ہے۔ یہاں کے مرکزی بازار کو ’مکینا گِر گِر‘‘ کے نام سے جانا جاتا ہے۔ یہ نام یہاں جگہ جگہ رکھی ہوئی سلائی مشینوں کی وجہ سے دیا گیا ہے۔ لوگ یہاں سے ہی کپڑے خریدتے ہیں اور انہیں یہاں بیٹھے ہوئے درزیوں کو ہی سینے کے لیے دے دیا جاتا ہے۔

بازاروں میں صبح صبح ہی ہجوم بڑھنا شروع ہو جاتا ہے۔ شہر کے مضافات سے بھی اُورومو نسل کے لوگ اپنے اشیاء بیچنے کے لیے بازاروں میں پہنچ جاتے ہیں۔ یہ لوگ ابھی تک گدھوں کے ذریعے کئی گھنٹوں کا سفر کرتے ہیں۔ یہاں اسمگلر مارکیٹ، مسلم مارکیٹ، تازہ سبزی مارکیٹ اور مصالہ مارکیٹ سب سے مشہور ہیں۔

ہرار سے چالیس کلومیٹر دور اونٹوں کی مشہور مارکیٹ واقع ہے۔ یہ ایک ہفتے میں دو مرتبہ لگتی ہے۔ صرف ایک صبح میں دو سو سے زائد اونٹ فروخت ہوتے ہیں۔ یہاں زیادہ تر صومالیہ کے گلہ بان تاجر ہوتے ہیں۔ اونٹ سفر اور خوراک کے لیے استعمال کیے جاتے ہیں۔

لندن کے مشہور ویکٹوریا اینڈ البرٹ میوزیم میں ایتھوپیا سے لوٹے گئے قدیم نوادرات کی نمائش نے ایک بار پھر اس بحث کو چھیڑ دیا ہےکہ ان کو آخر کس ملک میں رہنا چاہئے۔ اس نمائش میں 1868ء میں جنگ مجدلہ میں فتح کے بعد لوٹی گئی 20 شاہی اور مذہبی نوعیت کی نوادرات رکھی گئی ہیں۔

جنگ میں فتح کے بعد برطانوی فوج کو آزادی تھی کہ وہ جو چاہیں لوٹ سکتے ہیں۔ ان کا یہ عمل نہ صرف اُس وقت تنازعے کا باعث بنا بلکہ برطانیہ کے لیے باعث شرمندگی بھی تھا۔

گزشتہ کئی برسوں سے یورپ اور امریکا کے درمیان ان نوادرات کی واپسی کے معاملے پر بے نتیجہ مباحثے چلے آرہے ہیں۔

برطانوی سپاہیوں کی جانب سے کتنا خزانہ لوٹا گیا تھا اس بات کا آج تک حتمی تعین نہیں کیا جا سکا ہے تاہم ایک تاریخ دان کے مطابق سپاہیوں کو جو بھی اس وقت بہترین شے نظر آئی، وہ انہوں نے اپنے قبضے میں لے لی۔ ان میں ہاتھ سے لکھی ایسی نایاب اور اعلیٰ کتب بھی ہیں جو کئی ایتھوپین باشندوں نے کبھی دیکھی نہیں۔

گو کہ ان نوادرات کو ایتھوپیا واپس لوٹانے کے لیے کئی مضبوط دلائل موجود ہیں، تاہم یہ کہا جا سکتا ہے کہ یورپی میوزیم نوادرات کی حفاظت کو نہایت سنجیدگی سے لیتی ہے۔

ان نوادرات کی واپسی کی حمایت کرنے والے افراد کہتے ہیں اگر لائبریریاں ان ہاتھ سے لکھی گئی کُتب کو ڈیجیٹل صورت میں لے آئیں، تو دنیا بھر میں ان سے استفادہ حاصل کیا جا سکے گا چاہے وہ اپنے اصل ملک کو کیوں نہ لوٹائی جا چکی ہوں۔