ایئرایشیا کی ایئربس انڈونیشیا کے جزیرے جاوا کے سورابایا کے ہوائی اڈے سے سنگاپور کے لیے روانہ ہوئی، تاہم پرواز کے چالیس منٹ بعد اس جہاز کا کنٹرول ٹاور سے رابطہ منقطع ہو گیا۔ اس جہاز پر 162 افراد سوار تھے اور اب اس کی تلاش کے لیے کارروائیاں جاری ہیں۔

لاپتہ ہونے سے قبل اس ایئربس A320-200 کے پائلٹ نے کنٹرول ٹاور کو ایک طوفان کا حوالہ دیتے ہوئے راستہ تبدیل کرنے کی اجازت طلب کی تھی، جو اسے نہ مل سکی۔ اب حکام اس جہاز کو انڈونیشیا کے جزیرے بنگکا بیلِٹُنگ کے قریب بحیرہء جاوا میں تلاش کر رہے ہیں۔ اس جہاز کی گم شدگی نے ایم ایچ 370 کی یادیں تازہ کر دیں۔

سن 2014ء میں ملائیشیا ایئرلائنز کے دو بوئنگ 777 جہاز تباہ ہوئے۔ ان میں سے ایک اب تک لاپتہ ہے۔ رواں برس مارچ میں کوالالمپور سے بیجنگ جانے والی پرواز ایم ایچ 370 اچانک ریڈار کی نگاہ سے اوجھل ہو گئی تھی اور اس کے بعد آج تک اس کا ملبہ نہیں مل سکا۔ اس جہاز کے بارے میں کہا جاتا ہے کہ یہ ممکنہ طور پر جنوبی بحرہند میں گر کر تباہ ہوا۔

پرواز ایم ایچ 370 کے ساتھ ہوا کیا؟ یہ ہوابازی کی تاریخ کا سب سے بڑا معمہ ہے۔ کیا اس جہاز کو کوئی تکنیکی خرابی لاحق ہوئی؟ کیا اسے اغوا کر لیا گیا؟ یا اس کے پائلٹ نے خودکشی کی اور اپنے ساتھ سارے مسافروں کی جان بھی لے لی؟ اس جہاز کی تلاش کے لیے متعدد ممالک اب بھی کوششیں کر رہے ہیں۔

سیٹیلائیٹ تصاویر میں سمندر میں متعدد بار مواد دکھائی دیا، تاہم جن چیزوں کو اس جہاز کا ملبہ سمجھا گیا، ہر بار وہ دیگر چیزیں ہی نکلیں۔ اس تلاش میں سمندری جہازوں اور آب دوزوں نے جہاز کے ڈیٹاریکارڈ سے نکلنے والے سگنلز کو وصول کرنے کی بھی سرتوڑ کوشش کی، مگر نتیجہ ندارد۔

رواں برس جولائی میں ملائیشیا ایئرلائنز کا ایک اور بوئنگ طیارہ ایم ایچ 17تباہ ہو گیا۔ اس جہاز کو خانہ جنگی کے شکار ملک یوکرائن کے مشرقی حصے میں میزائل کے ذریعے نشانہ بنایا گیا۔ اس جہاز پر 298 افراد سوار تھے، جو ایمسٹرڈم سے کوالالمپور کے سفر پر تھے۔

ایم ایچ 17 میں سوار تمام افراد ہلاک ہو گئے، جب کہ اس کے ملبے کی سلامتی اور تفتیش بھی مشکلات کا شکار رہی۔ مشرقی یوکرائن میں روس نواز باغیوں نے تفتیش کاروں کو جائے حادثہ پر پہنچنے اور تباہی کے فوری بعد تحقیقات کرنے سے روکے رکھا۔

اس حادثے کے پانچ روز بعد روس نواز باغیوں نے جہاز کے فلائٹ ریکارڈر کو ملائیشیا کے حکام کے حوالے کیا۔ ابتدائی تحقیقات کے مطابق ایم ایچ 17 پرواز کو ممکنہ طور پر زمین سے فضا میں مار کرنے والے کسی میزائل کے ذریعے نشانہ بنایا گیا۔ یہ معلوم نہیں کہ جہاز کی تباہی، روسی، یوکرائنی یا باغی فورسز میں سے کس کی جانب سے غلطی سے چلائے جانے والے میزائل کا نتیجہ ثابت ہوئی۔

ایم ایچ 17 کے سانحے کے صرف چھ روز بعد ہوا بازی کی صنعت کو ایک اور حادثے کا سامنا کرنا پڑا، جب تائیوان میں ٹرانس ایئرویز کا ایک مسافر بردار طیارہ طوفانی موسم میں لینڈنگ کی کوشش میں تباہ ہو گیا۔ اس واقعے میں 48 افراد ہلاک ہوئے جب کہ دس افراد زندہ بچ پائے۔

جولائی کی 24 تاریخ کو برکینا فاسو سے الجزائر جانے والا جہاز مالی میں گر کر تباہ ہو گیا۔ اس جہاز پر سوار تمام 118 افراد ہلاک ہو گئے۔ تباہی سے قبل پائلٹ نے کنٹرول ٹاور سے طوفان کے پیش نظر راستہ تبدیل کرنے کی اجازت طلب کی تھی۔

یہ جہاز انتہائی تیز رفتار سے زمین سے ٹکرایا اور اس کا ملبہ دور دور تک پھیل گیا۔ جہاز کی یہ مکمل تباہی مالی کے شہر گوسی کے قریب ہوئی۔ اے ایچ 5070 کی اس تباہی کی وجہ ممکنہ طور پر جہاز کا طوفان کی زد میں آنا تھی۔

رواں برس اگست کی دس تاریخ کو ایرانی ایئرلائن کا ایک طیارہ تہران سے پرواز کرنے کے چند ہی لمحوں بعد گر کر تباہ ہو گیا۔ اس پرواز AN-140 پر سوار 39 افراد ہلاک جب کہ دیگر نو زخمی ہو گئے۔ اس جہاز کی تباہی کی وجہ انجن فیل ہو جانا بتائی گئی تھی۔

جرمنی میں جون کی 23 تاریخ کو عسکری فضائی مشقوں کے دوران دو جہازوں کا تصادم ہو گیا۔ اس مشق کے دوران یورو فائٹر جہاز ایک چھوٹے شہری جہاز سے جا ٹکرایا۔ حکام کے مطابق اس شہری جہاز کا رابطہ کنٹرول ٹاور سے منقطع تھا، جس کی وجہ سے فائٹرجہاز کو فضا میں اس کی موجودگی کا علم نہیں تھا۔ تصادم کے بعد یہ شہری جہاز گر کر تباہ ہو گیا۔

یہ چھوٹا تربیتی شہری جہاز لیئرجیٹ پرواز کرتے ہوئے عسکری مشقوں کے مقام کے انتہائی قریب آن پہنچا۔ جرمن علاقے اولسبرگ میں پیش آنے والے اس حادثے میں اس تربیتی جہاز میں سوار پائلٹ اور معاون پائلٹ ہلاک ہو گئے۔

اس تصادم کی وجہ سے یوروفائٹر جہاز کو شدید نقصان پہنچا اور جہاز کے ایندھن کا بیرونی ٹینک تباہ ہو گیا، تاہم اس جہاز کا 31 سالہ پائلٹ اس لڑاکا طیارے کو بحفاظت اتارنے میں کامیاب ہو گیا۔

اگست کی 13تاریخ کو برازیل میں ریوڈی جنیرو سے سانتوس کی جانب پرواز کرنے والا پرائیویٹ سیسنا جہاز کریش لینڈنگ کی کوشش کے دوران تباہ ہو گیا۔ اس حادثے میں ہلاک ہونے والوں میں برازیل کے صدارتی انتخابات میں شامل امیدوار اڈوارڈو کمپوس بھی شامل تھے۔ اس حادثے کی وجہ خراب موسم قرار دی گئی تھی۔