ایران اور عالمی طاقتوں کے ساتھ متنازعہ جوہری پروگرام کے حوالے سے بات چیت کو تقریباً چھ ماہ گزر گئے ہیں۔ یورپی یونین کی جانب سے بات چیت کے نئے دور کے لیے تاریخ اور مقام کو تجویز کر دیا گیا ہے۔ یونین کے خارجہ امور کے شعبے کی چیف کیتھرین ایشٹن کے ترجمان میشائل مان نے البتہ یہ نہیں بتایا کہ یورپی یونین نے مذاکرات کی بحالی کے لیے کون سی تاریخ اور مقام تجویز کیا ہے۔ مذاکرات کے تین ادوار گزر چکے ہیں لیکن ابھی تک کوئی پیشرفت نہیں ہو سکی ہے۔ مغربی اقوام کو خدشہ ہے کہ ایران اپنے جوہری پروگرام سے ایٹمی ہتھیاروں کا حصول چاہتا ہے تاہم ایران ان الزامات کو رد کرتا ہے۔

ایران کے ساتھ مذاکرات میں امریکا، روس، چین، برطانیہ، فرانس اور جرمنی کے نمائندے شریک ہوتے ہیں۔ عالمی طاقتوں کے نمائندوں کی ایران کے ساتھ مذاکرات میں قیادت یورپی یونین کی خارجہ امور کی چیف کیتھرین ایشٹن کرتی ہیں۔ نیوز ایجنسی روئٹرز کے سوال پر بذریعہ ای میل جواب دیتے ہوئے یورپی یونین کے خارجہ امور کے شعبے کی چیف کے ترجمان میشائل مان نے تحریر کیا کہ 31 دسمبر کے روز یورپی یونین اور ایران کے اعلیٰ حکام نے مذاکرات کے نئے دور کو شروع کرنے کی بابت گفتگو کی تھی۔ مان نے یہ بھی لکھا کہ مذاکراتی عمل جلد ممکن ہے۔

اس سے قبل ایران کی جانب سے اعلان کیا گیا تھا کہ وہ رواں مہینے کے دوران اپنے جوہری پروگرام کے حوالے سے بین الاقوامی مذاکرات میں شرکت کے لیے رضامند ہے۔ نئی دہلی میں ان خیالات کا اظہار ایرانی مذاکرات کار اعلیٰ سعید جلیلی نے کیا تھا۔ سعید جلیلی اس وقت ایران کے قومی سلامتی کے مشیر بھی ہیں۔ جلیلی کے مطابق ان کا ملک اقوام متحدہ کے ادارے سلامتی کونسل کے پانچ مستقل اراکین اور جرمنی کے ساتھ مذاکرات کے لیے تیار ہے۔ ایران اور عالمی طاقتوں کے نمائندوں کے ساتھ ایران کے متنازعہ جوہری پروگرام کے حوالے سے مذاکراتی عمل قریب چھ ماہ سے معطل ہے۔

تہران حکومت اپنے جوہری پروگرام کے حوالے سے اپنے مؤقف پر ڈٹی ہوئی ہے کہ یہ پرامن مقاصد کے لیے ہے جبکہ عالمی طاقتوں کو خدشہ لاحق ہے کہ ایران پرامن جوہری سرگرمیوں کی آڑ میں نیوکلیئر ہتھیار سازی کے خفیہ پلان کو جاری رکھے ہوئے۔ اس مناسبت سے اب تک جتنے بھی مذاکرات ہوئے ہیں ایران عالمی طاقتوں کے خدشات کو مناسب شواہد کے ساتھ زائل کرنے میں ناکام ہوا ہے اور اس طرح تمام بات چیت کے ادوار بغیر کسی نتیجے پر ختم ہوئے۔ ایران اور عالمی طاقتوں کے درمیان آخری مذاکرات روس کے دارالحکومت ماسکو میں گزشتہ برس جون میں ہوئے تھے۔

ah / ab ( Reuters)