ایرانی دارالحکومت تہران سے ہفتہ 22 جون کو موصولہ رپورٹوں کے مطابق توماج صالحی کے وکیل نے بتایا کہ ملکی عدالت عظمیٰ نے اس بہت مقبول ریپر کو مہسا امینی نامی خاتون کی دوران حراست ہلاکت کے بعد شروع ہونے والے ملک گیر عوامی مظاہروں کی حمایت کرنے کے الزام میں سنائی گئی سزائے موت نہ صرف منسوخ کر دی ہے بلکہ ساتھ ہی سپریم کورٹ نے ان کے خلاف عائد کردہ الزامات کی نئے سرے سے عدالتی سماعت کا حکم بھی جاری کر دیا ہے۔

توماج صالحی کے وکیل امیر رئیسیان نے سوشل میڈیا پلیٹ فارم ایکس پر اپنی ایک پوسٹ میں لکھا، ''صالحی کو سنائی گئی سزائے موت سپریم کورٹ نے منسوخ کر دی ہے۔ ساتھ ہی ان کے خلاف مقدمہ نئے سرے سے چلانے کا حکم بھی سنایا گیا ہے۔‘‘

ایران میں حجاب کی خلاف ورزی کرنے والی خواتین کے خلاف مہم کا آغاز

ایرانی حکومت کے خلاف مزاحمت کی ایک اہم شخصیت

تین دسمبر 1990ء کو پیدا ہونے والے توماج صالحی اپنے ریپ میوزک کی وجہ سے بہت مشہور ہو جانے والے ایسے ایرانی گلوکار ہیں، جو ایران کی حکومت اور سیاسی مذہبی قیادت پر تنقید کرنے والی مرکزی شخصیات میں سے ایک سمجھے جاتے ہیں۔

انہوں نے 2022ء کے موسم خزاں میں ایران کی اخلاقی پولیس کی حراست میں مناسب انداز میں حجاب نہ کرنے والی ایک نوجوان کرد نژاد ایرانی خاتون کی ہلاکت کے بعد شروع ہو جانے والے ملک گیر عوامی مظاہروں کی حمایت کی تھی اور اسی لیے انہیں گرفتار کر لیا گیا تھا۔

سخت گیر ایرانی سیاستدانوں کے بچے مغرب سے محبت کیوں کرتے ہیں؟

پھر ایران میں اسلامی انقلاب سے دشمنی کے الزام میں انہیں اسی سال اپریل میں ایک ذیلی عدالت نے سزائے موت سنا دی تھی۔ سزاے موت کا حکم  سنائے جانے کے بعد حکام نے اپریل کے وسط میں ان کے جیل سے باہر کسی کو بھی ٹیلی فون کرنے پر بھی پابندی لگا دی تھی اور ان سے رابطہ ممکن نہیں رہا تھا۔

امن کا نوبل انعام، ایران میں قید انسانی حقوق کی کارکن نرگس محمدی کے نام

توماج صالحی کا تعلق بختیاری اقلیت سے

پیدائشی طور پر ایرانی شہر اصفہان سے تعلق رکھنے والے توماج صالحی بختیاری برادری کے باشندے ہیں، جو ایران میں ایک تسلیم شدہ سماجی اقلیت ہے۔ انہوں نے گزشتہ برسوں کے دوران اپنے گیتوں میں اسلامی جمہوریہ ایران کی مذہبی اور سیاسی قیادت پر جس طرح تنقید کی، اس میں مہسا امینی کی ہلاکت کے بعد عوامی مظاہروں کی حمایت نے اضافہ ہی کیا اور نتیجہ یہ نکلا کہ گرفتاری کے بعد انہیں آج سے دو ماہ قبل سزائے موت سنا دی گئی تھی، جس پر تاحال عمل درآمد نہیں کیا گیا تھا۔

یورپی یونین: انسانی حقوق کا سخاروف انعام مہسا امینی کے لیے

توماج صالحی کو سنائی گئی سزائے موت کی اندرون ملک اور بیرونی دنیا میں شدید مذمت کی گئی تھی۔ اسی لیے اب ایرانی سپریم کورٹ کی طرف سے ان کی یہ سزا منسوخ کیے جانے پر حکومتی ناقدین کی طرف سے خوشی کا اظہار کیا جا رہا ہے اور ان کے خلاف مقدے کی نئے سرے سے سماعت کے آئندہ نتائج سے بھی مثبت امیدیں وابستہ کی جا رہی ہیں۔

م م / ا ا (روئٹرز، ڈی پی اے)