ایران کے نئے صدر مسعود پیشکیان اپنا عہدہ سنبھالنے کے بعد اپنے پہلے سرکاری دورے پر آج بدھ 11 ستمبر کو عراقی دارالحکومت بغداد پہنچ گئے ہیں۔

مشرق وسطیٰ میں بڑھتے ہوئے تناؤ کے پس منظر میں پیزشکیان کو امید ہے کہ اس دورے سے تہران کے بغداد کے ساتھ تعلقات مزید مضبوط ہوں گے۔

امریکہ اور یورپی ممالک نے ایران پر مزید پابندیاں عائد کر دیں

ایران کو سو بلین ڈالر سے زائد کی بیرونی سرمایہ کاری درکار، صدر پزشکیان

عراقی وزیر اعظم کے دفتر سے جاری ہونے والے ایک بیان میں کہا گیا ہے کہ وزیر اعظم محمد شیعہ السوڈانی نے اسلامی جمہوریہ ایران کے صدر مسعود پیزشکیان کا بغداد ایئرپورٹ پر خیرمقدم کیا۔

عراق کے امریکہ اور ایران کے ساتھ پیچیدہ تعلقات

عراق کو ایک پیچیدہ صورتحال کا سامنا ہے۔ ایک طرف تو وہاں ایران سے قربت رکھنے والی متعدد مسلح گروہ اور جماعتیں موجود ہیں تو دوسری طرف عراق امریکہ کا شراکت دار بھی ہے جہاں تقریباﹰ 2500 امریکی فوجی اب بھی تعینات ہیں۔

ایران کے سرکاری میڈیا کے مطابق پیزشکیان نے اپنے دورے کے آغاز سے قبل کہا، ''ہم متعدد معاہدوں پر دستخط کرنے کی منصوبہ بندی کر رہے ہیں… بغداد میں ہماری اعلیٰ عراقی حکام سے ملاقاتیں ہوں گی۔‘‘

پیزشکیان ہمسایہ ممالک کے ساتھ تعلقات کو ترجیح دینے کا عزم ظاہر کر چکے ہیں کیونکہ وہ اپنے ملک کی معیشت پر امریکی قیادت میں غیر ملکی پابندیوں کے اثرات کو کم کرنا چاہتے ہیں۔

ایران کی برطانیہ، فرانس اور جرمنی کو دھمکی

خیال رہے کہ منگل 10 ستمبر کو مغربی طاقتوں نے ان خبروں کے تناظر میں تہران پر نئی پابندیاں عائد کرنے کا اعلان کیا تھا کہ اس نے یوکرین کے خلاف استعمال کے لیے روس کو کم فاصلے تک مار کرنے والے میزائل فراہم کیے ہیں۔

ایران کی وزارت خارجہ کے ترجمان ناصر کنعانی نے کہا ہے کہ برطانیہ، فرانس اور جرمنی کو اپنے 'معاندانہ' اقدام کے رد عمل میں مناسب اور متناسب کارروائی کا سامنا کرنا پڑے گا۔

پیزشکیان کا یہ دورہ مشرق وسطیٰ میں بڑھتی ہوئی کشیدگی کے دوران ہو رہا ہے، جس کا زیادہ تر تعلق غزہ میں جاری تنازعے سے ہے۔

اس تنازعے نے خطے بھر میں ایران کے حمایت یافتہ مسلح گروہوں کی توجہ اس تنازعے کی طرف موڑ دی ہے اور واشنگٹن کے ساتھ بغداد کے تعلقات کو بھی پیچیدہ بنا دیا ہے۔

سکیورٹی حکام کا کہنا ہے کہ پیزشکیان کی عراقی دارالحکومت آمد سے چند گھنٹے قبل امریکی قیادت میں اتحادی افوج کے زیر استعمال ایک اڈے پر دھماکہ ہوا۔

عراق میں ایرانی حمایت یافتہ کتائب حزب اللہ (حزب اللہ بریگیڈ) کے ایک ترجمان نے کہا کہ اس حملے کا مقصد ''ایرانی صدر کے دورے میں خلل ڈالنا‘‘ تھا۔

ا ب ا/ش ر (اے پی، اے ایف پی، روئٹرز)