جرمنی کی حکمران جماعت سوشل ڈیموکریٹک پارٹی ایس پی ڈی کے شریک سربراہ لارس کلنگبائل نے ایرانی حکام کی طرف سے ایک نوجوان لڑکی کو قید کی سزا سنانے پر تہران کو شدید تنقید کا نشانہ بناتے ہوئے کہا  ہے کہ ایران کے انقلابی گارڈز یا  پاسداران انقلاب کو یورپی یونین کی  دہشت گروںکی فہرست میں شامل کر دیا جانا چاہیے۔

 جرمنی کے فُنکے میڈیا گروپ پر اتوار 12 مارچ کو شائع ہونے والے تبصروں میں کلنگبائل کا یہ تازہ ترین بیان شائع ہوا۔ اس کے مطابق جرمن سیاستدان اور سوشل ڈیموکریٹ لیڈر نے کہا کہ انہیں تہران حکومت کی طرف سے ایک 18 سالہ طالبہ سمانہ اصغری کو تین ماہ کی قید کی سزا سنائے جانے کی خبر سے شدید صدمہ پہنچا ہے۔

جرمنی حزب اللہ کو دہشت گردوں کی فہرست میں شامل نہیں کرے گا، جرمن وزیر

سمانہ اصغری کون ہیں؟

سمانہ اصغری ایک 18 سالہ انجینیئرنگ کے شعبے میں تعلیم حاصل کرنے والی طالبہ ہیں۔ جرمن سیاستدان لارس کلنگبائل نے رواں سال جنوری میں اس طالبہ کی 'سیاسی کفالت‘ کی ذمہ داری لینے کا اعلان کیا تھا۔ انہوں نے اپنے بیان میں کہا، ''ایرانی حکومت نے سمانہ اصغری کو بلا جواز اور بالکل بے بنیاد الزامات کے تحت تین ماہ کی سزائے قید دی  ہے۔‘‘ اصغری کی فوری رہائی کا مطالبہ کرتے ہوئے جرمن سیاستدان نے کہا، ''ایران میں باہمت خواتین جو مہینوں سے احتجاج کر رہی ہیں اور اپنے لیے صرف برابری کی زندگی سے زیادہ کچھ نہیں مانگ رہی ہیں۔‘‘

 

ایرانی  ریوولوشنری گارڈز IRGC ایران کی اعلیٰ مسلح افواج میں شامل ہے۔ جو  1979ء کے اسلامی انقلاب کے بعد قائم ہوئی۔ اس کا کام ایران میں کسی قسم کی بغاوت کو روکنا اور ریاستی نظریہ کی حفاظت کرنا ہے۔

پاسداران انقلاب پر کڑی تنقید کیوں؟

ایران میں حالیہ بدامنی اور ملک گیر سطح پر عوامی احتجاج اور مظاہروں، جن میں نوجوان لڑکیاں اور خواتین قائدانہ کردار ادا کر رہی ہیں، کو دبانے اور مظاہرین پر جبر و تشدد کرنے میں پاسداران انقلاب کا کلیدی کردار ہے۔ ان مظاہروں کا آغاز گزشتہ سال ستمبر میں ایرانی نژاد کُرد نوجوان خاتون مہسا امینی کی ایران کی ''اخلاقی پولیس‘‘ کے ہاتھوں ہلاکت کے بعد ہوا تھا جو ابھی تک جاری ہیں۔ ان عوامی مظاہروں کو کچلنے اور عوام میں خوف و ہراس پھیلانے کے لیے تہران حکومت نے شدید نوعیت کا کریک ڈاؤن شروع کیا۔ اس کے تحت بڑے پیمانے پر مظاہرین کی گرفتاری، انہیں جیل کی سلاخوں کے پیچھے بند کرنے، خواتین کو جسمانی اور ذہنی طور پر اذیت دینے اور ان کے ساتھ ہر طرح کی زیادتیوں کے واقعات میں بھی غیر معمولی اضافہ دیکھنے میں آیا ہے۔

سعودی عرب کو ایرانی وارننگ: ہمارا صبر و تحمل ختم ہو سکتا ہے

یورپی یونین  کے قانون سازوں نے اس سال جنوری میں ایک غیر پابند قرار داد کی منظوری دی تھی۔ جس میں ایران کے پاسداران انقلاب یا ایرانی ریوولوشنری گارڈز IRGC کو یورپی بلاک کی طرف سے بنائے گئی دہشت گردوں کی فہرست میں شامل کرنے کی شق بھی شامل تھی۔

قانون اس بارے میں کیا کہتا ہے؟

یورپی یونین کے قانون کے تحت، کسی بھی تنظیم کو یورپی بلاک کی دہشت گردوں کی فہرست میں شامل کرنے کے لیے بنیادی شرط کو ملحوظ رکھنا لازمی ہے۔ یورپی یونین کی 'ایکسٹرنل ایکشن سروس‘ کے مطابق اس فہرست میں کسی بھی تنظیم کا نام شامل کرنے کا فیصلہ ایک معتبر اور قابل نیشنل اتھارٹی کی طرف سے ہونا چاہیے جیسے کہ عدالتی فیصلہ یا کسی انتظامی اتھارٹی کی طرف سے دیا گیا حکم جاری ہونے کی صورت میں یہ اقدام کیا جاسکتا ہے۔

ک م/ اب ا(ڈی پی اے)