ایران کا شمار دنیا کے ان ملکوں میں ہوتا ہے، جو تیل اور گیس کے بے پناہ ذخائر کے مالک ہیں۔ ایران دنیا میں تیل کے چوتھے بڑے ذخائر کا مالک ہے جبکہ روس کے بعد گیس کے سب سے زیادہ ذخائر رکھنے والا دوسرا بڑا ملک ہے۔ تیل اور گیس کی صنعت اس ملک کی معیشت میں ریڑھ کی ہڈی کی حیثیت رکھتی ہے تاہم اس معیشت کو اُن امریکی اور یورپی پابندیوں کے نتیجے میں سخت نقصان اٹھانا پڑا، جو 2012ء میں ایران کے توانائی اور بینکنگ کے شعبوں پر عائد کی گئی تھیں۔

ایران کے خلاف اُس کے متنازعہ ایٹمی پروگرام کی پاداش میں عائد کی گئی ان پابندیوں کی وجہ سے بڑی کمپنیاں یا تو ایران چھوڑ کر نکل آئی تھیں یا پھر اُنہوں نے ایران کے ساتھ اپنے کاروبار کو بہت ہی محدود کر دیا تھا۔

ان کمپنیوں کی غیر حاضری سے پیدا ہونے والی خالی جگہ کو ایشیا کی کچھ بڑی کمپنیوں نے پورا کرنے کی کوشش کی تاہم ابھی گزشتہ ہفتے ایران نے چین کی نیشنل پٹرولیم کارپوریشن کے ساتھ اپنا معاہدہ یہ کہتے ہوئے منسوخ کر دیا تھا کہ یہ کمپنی پیداواری ضروریات کو پورا کرنے میں ناکام رہی ہے۔

اس سال جنوری میں اُس عبوری معاہدے پر عملدرآمد شروع ہوا تھا، جو ایران نے سلامتی کونسل کی پانچوں ویٹو طاقتوں اور جرمنی کے ساتھ طے کیا تھا۔ تب سے ایران کو یہ اجازت بھی دے دی گئی ہے کہ وہ روزانہ 1.2 ملین بیرل تک تیل برآمد کر سکتا ہے۔ واضح رہے کہ پابندیوں سے پہلے 2011ء کے اواخر تک ایران کی روزانہ برآمدات 250 ملین بیرل تک ہوا کرتی تھیں۔

حالیہ مہینوں کے دوران ایرانی صدر حسن روحانی اور وزیر تیل بیجان زنگانیہ کہہ چکےہیں کہ ایران بین الاقوامی کمپنیوں کی سرمایہ کاری اور ٹیکنالوجی ٹرانسفر سے مستفید ہو گا۔

ایران کے سرکاری بیانات کے مطابق چھ مئی سے تہران میں شروع ہونے والے سالانہ میلے ’انٹرنیشنل آئل، گیس اینڈ پیٹروکیمیکل ریفائننگ ایگزیبیشن‘ کے لیے جن 600 کمپنیوں نے اپنے نام رجسٹر کروائے ہیں، اُن میں فرانس کی ٹوٹال اور جرمنی کی سیمینز کی علاقائی شاخیں بھی شامل ہیں۔ اس تجارتی میلے میں چینی کمپنیاں بھی شرکت کر رہی ہیں۔

نیوز ایجنسی اے ایف پی سے باتیں کرتے ہوئے ایران کی وزارت تیل کے ایک ترجمان نعمت اللٰہی اکبر نے کہا کہ شریک غیر ملکی کمپنیوں کی تعداد 2013ء کے مقابلے میں تین گنا زیادہ ہے جبکہ ایرانی کمپنیوں کی تعداد پچاس فیصد اضافے کے ساتھ بارہ سو ہو گئی ہے۔

اسی دوران آئندہ ہفتے ایران اور جرمنی سمیت چھ عالمی طاقتوں کے درمیان آسٹریا کے دارالحکومت ویانا میں ایران کے ایٹمی پروگرام کے حوالے سے پانچواں مذاکراتی دور شروع ہو رہا ہے، جس میں ایران کی جوہری سرگرمیوں کو محدود بنانے کے سلسلے میں ایک زیادہ طویل المدتی معاہدہ طے کرنے کی کوششیں کی جائیں گی۔

ایک مقامی بزنس مین نے اے ایف پی کو بتایا کہ ’ایران میں توانائی کی منڈی بہت بڑی ہے اور پانچ سالہ منصوبے میں 150 ارب ڈالر کی سرمایہ کاری کا پروگرام بنایا گیا ہے، جس میں سے کچھ سرمایہ بیرون ملک سے ملنے کی امید کی جا رہی ہے‘۔

اس کے برعکس تہران میں مقیم اور اس میلے میں شریک ایک اور اقتصادی ماہر نے محتاط انداز میں بتایا کہ دنیا کی تیل کا کاروبار کرنے والی بڑی کمپنیاں اس میلے میں اپنے نمائندے نہیں بھجیں گی۔