حالیہ دنوں میں باراک اوباما کی خارجہ پالیسی کا ایک اہم ہدف یہ ہے کہ ایران کے ساتھ تعلقات کو معمول پر لایا جائے۔ کانگریس کی جانب سے ایران پر لگائی گئی پہ در پہ پابندیوں نے اس کی معیشت کو تباہ کر کے رکھ دیا ہے۔ امریکی حکام کا خیال ہے کہ یہی وہ پابندیاں ہیں،جنہوں نے ایران کو لچکدار رویہ اپنانے پر مجبور کیا ہے اور تہران حکومت رواں ہفتے اپنے جوہری پروگرام سے متعلق بات چیت کا دوبارہ آغاز کر دے گی۔

امریکی اراکین کانگریس اگر یہ سمجھیں کہ تہران حکومت بات چیت کے لیے سنجیدہ ہے اور وہ اپنے جوہری پروگرام سے پیچھے ہٹنے کو تیار ہے تو انہیں یہ اختیار حاصل ہے کہ وہ ایران پر عائد پابندیاں ختم کردیں یا عارضی طور پر معطّل کردیں لیکن بہت سے ریپبلکن اور اوباما کے ڈیموکریٹس نئے ایرانی صدر حسن روحانی کے بیانات کے باجود ایران کے کردار کے حوالے سے شاکی ہیں۔

ریپبلکن سینیٹر جان مکین، لنڈ سےگراہم اور کیلی ایوٹے نے ایران کے بارے میں اوباما کے نرم رویے کے حوالے سے ایک مشترکہ بیان میں کہا ہے، ’’ہمیں کسی بھی نتیجے پر پہنچنے سے قبل صورت حال کا بغور جائزہ لینا چاہیے اور ایران کو کسی بھی صورت یہ اجازت نہیں دی جا سکتی کہ وہ مذاکرات کو وقت ضائع کرنے اور آنکھوں میں دھول جھونکنے کے لیے استعمال کرے‘‘۔

امریکا کے بہت سے اراکین کانگریس اسرائیل کے اس مؤقف کے ہم خیال ہیں کہ ایران خفیہ طور پر اپنے جوہری ہتھیاروں کی تیاری جاری رکھے ہوئے ہے۔ ایران کا جوہری پروگرام ایک ایسا مسئلہ ہے جس پر ریپبلکن اور ڈیموکریٹس دونوں ہم رکاب نظر آتے ہیں۔ امریکی سینٹ اور ایونِ نمائندگان نے بارہا ایران پر پابندیاں سخت سے سخت تر کرنے کے لیے قراردایں پاس کی ہیں۔

جمعرات سے ایران کے جوہری پروگرام سے متعلق مذاکرات کا دوبارہ آغاز ہو رہا ہے۔ اس موقع پر اگر ایران کی جانب سے کوئی مثبت پیش رفت نظر آتی ہے توامریکی صدر کو یہ اختیار حاصل ہے کہ وہ ایران کے خلاف پابندیوں کو 120 روز کے لیے معطّل کر سکتے ہیں۔ اس سلسلے میں انہیں کانگریس کی اجازت درکار نہیں ہے۔ امریکی صدر اپنا یہ اختیار دو مرتبہ استعمال کر سکتے ہیں۔

آرون ڈیوڈ ملِر جو کہ امریکی وزارت خارجہ کے ایک سابق اعلیٰ عہدیدار رہ چکے ہیں اور آج کل ووڈرو ویلسن سینٹر واشنگٹن سے وابستہ ہیں اس حوالے سے کہتے ہیں،’’ اس میں کوئی حرج نہیں امریکی کانگریس ایران کو شک کا فائدہ دے کر عارضی ریلیف دے اور اگر وہ ایران کی جانب سے کوئی ایسا اقدام دیکھیں جس پر انہیں شک ہو تو وہ یہ سہولت واپس بھی لے سکتے ہیں۔‘‘

منگل کے روز جن 11 ریپبلکن سینیٹرز نے شام پرامریکی حملے کی مخالفت کی تھی۔ انہوں نے ایران کے بارے میں بھی سخت رویہ اپنانے کی ضرورت پر زور دیا ہے۔ ان سینیٹرز میں سن 2016 کے صدارتی انتخابات کے ممکنہ امیدواروں میں سے ایک سینیٹر مارکو روبیو بھی شامل ہیں۔