ایران میں 28 جون کو ہونے والے صدارتی انتخابات میں حصہ لینے کے خواہش مند امیدواروں کے لیے رجسٹریشن کی پانچ روزہ مدت آج جمعرات 30 مئی کو شروع ہو گئی ہے۔ نئے منتخب ہونے والے صدر ابراہیم رئیسی کی جگہ لیں گے، جو اس ماہ کے اوائل میں ایک ہیلی کاپٹر حادثے میں ہلاک ہو گئے تھے۔ رئیسی کے ساتھ وزیر خارجہ حسین امیر عبدالھیان ہلاک ہوئے تھے۔

ایرانی صدر کی اچانک ہلاکت، اب کیا ہو گا؟

ایران میں صدر رئیسی کی موت کا سوگ

ایران میں یہ صدارتی انتخابات ایک ایسے وقت میں ہو رہے ہیں جب ملک کو 19 مئی کے حادثے کے بعد شدید مشکلات کا سامنا ہے اور تہران اور امریکہ کے درمیان کشیدگی موجود ہے۔

اگرچہ ایران میں 85 سالہ سپریم لیڈر آیت اللہ علی خامنہ ای ریاست کے تمام معاملات پر حتمی رائے رکھتے ہیں، لیکن ماضی میں ملکی صدور، اسلامی جمہوریہ ایران کے مغرب کے ساتھ روابط میں بہتری یا پھر تناؤ میں اضافے کی وجہ بنتے رہے ہیں۔

صدارتی انتخابات کے لیے کاغذات نامزدگی جمع کرانے کی تاریخ 30 مئی سے چار جون تک ہے۔ اس دوران ایسے امیدوار اپنے کاغذات جمع کرا سکتے ہیں جن کی عمر 40 سے 75 برس تک ہے اور جن کے پاس کم از کم ماسٹر ڈگری ہے۔ تمام امیدواروں کو حتمی منظوری ایران کی 12 رکنی گارڈین کونسل دے گی، جو علماء اور فقہاء کا ایک پینل ہے جس کی سربراہی بھی علی خامنہ ای کے ہی پاس ہے۔ خیال رہے کہ گارڈین کونسل نے کبھی بھی کسی خاتون امیدوار کو انتخابات لڑنے کی اجازت نہیں دی اور نہ ہی کسی ایسے شخص کو قبول کیا جو ملک کی حکمرانی میں بنیادی تبدیلی کا مطالبہ رکھتا ہو۔

خامنہ ای کے حامی ابراہیم رئیسی کی 2021 ء کے صدارتی انتخابات میں کامیابی اس لیے بھی تقریباﹰ یقینی ہو گئی تھی جب گارڈین کونسل نے ان تمام امیدواروں کو نا اہل قرار دے دیا تھا، جو ممکنہ طور پر رئیسی کے مضبوط حریف ثابت ہو سکتے تھے۔ ان انتخابات میں ایران کی تاریخ میں صدارتی انتخابات کے لیے سب سے کم ٹرن آؤٹ دیکھا گیا۔ یہ ممکنہ طور پر سخت گیر مذہبی رہنماؤں کے ساتھ رائے دہندگان کی ناراضی کی علامت تھی۔

ممکنہ مضبوط صدارتی امیدوار

ابھی یہ سوال تو قبل از وقت ہے کہ کس کو ان انتخابات میں حصہ لینے کی اجازت دی جائے گی لیکن ملک کے قائم مقام صدر محمد مخبر، جو بیوروکریٹ رہ چکے ہیں، اس دوڑ میں سب سے آگے ہو سکتے ہیں۔

دیگر ممکنہ امیدواروں میں سابق سخت گیر صدر محمد احمدی نژاد اور اصلاح پسند سابق صدر محمد خاتمی بھی شامل ہیں لیکن کیا انہیں انتخاب لڑنے کی اجازت دی جائے گی، یہ ابھی ایک سوال ہے۔

رجسٹریشن کی پانچ روزہ مدت منگل چار جون کو ختم ہو گی۔ توقع ہے کہ گارڈین کونسل اس کے بعد 10 دن کے اندر امیدواروں کی حتمی فہرست جاری کر دے گی۔ اس کے بعد سے جون کے اواخر میں ہونے والی ووٹنگ سے قبل دو ہفتوں کی مختصر انتخابی مہم چلائی جا سکے گی۔

نئے ایرانی صدر ایک ایسے وقت میں یہ عہدہ سنبھالیں گے جب ملک اب یورینیم کو اعلیٰ سطح پر افزودہ کر رہا ہے اور بین الاقوامی معائنے میں رکاوٹ بن رہا ہے۔ ایران نے یوکرین کے خلاف جنگ میں روس کو مسلح کرنے کے ساتھ ساتھ غزہ کی جنگ کے دوران اسرائیل پر ڈرون اور میزائل حملے بھی کیے ہیں۔

خیال رہے کہ ابراہیم رئیسی ایران کے دوسرے ایسے صدر تھے جو اپنے عہدے پر رہتے ہوئے انتقال کر گئے ہیں۔ سنہ 1981 میں صدر محمد علی رجائی ایک بم دھماکے میں ہلاک ہو گئے تھے۔

ا ب ا/ا ا (اے پی، روئٹرز)