جنوبی کوریا کے دستبردار ہونے کے باوجود پاکستانی ٹیم کے ہیڈ کوچ اختر رسول نے ایشیشن چیمپئنز ٹرافی کو مشکل ٹورنامنٹ قرار دیا جوہر ٹاون ہاکی سٹیڈیم میں گفتگو کرتے ہوءے اختر رسول نے بتایا کہ یہ ایشین گیمز جتنا ہی مشکل ٹورنامنٹ ہے کیونکہ بھارت کے علاوہ ملائشیا اور جاپان کی ٹیمیں اپ سیٹ کرنے کی پوری صلاحیت رکھتی ہیں۔ اختر رسول کے بقول پاکستانی ٹیم کو جو گراف بلند ہوا ہے ہم اسے دوحہ میں برقرار رکھنے کی کوشش کریں گے۔

پاکستانی کپتان اور فل بیک محمد عمران نے ریڈیو ڈوءچے ویلے کو بتایا کہ میلبورن چیمپئنز ٹرافی میں وکٹری اسٹینڈ پر آنے کے بعد اب دوحہ میں ٹیم پر توقعات کا دباو بھی ہوگا۔ عمران کا کہنا تھا کہ عصر حاضر کی ہاکی میں کسی ٹیم کو آسان نہیں لیا جا سکتا اور چیمپئنز ٹرافی میں اچھا کھیلنے کے باوجود ہم اپنی خامیوں پر قابو پانے کی کوشش کر رہے ہیں۔ عمران نے کہا کہ کھلاڑیوں اور کوچز کی نیت صاف تھی اس لیے میلبورن میں ٹیم کو اچھی کارکردگی کا صلہ ملااور اب پاکستان ہاکی سنہری دور واپس آئے گا۔ پرتھ سپر سیریز اور چیمپئنز ٹرافی کے بعد پاکستان کی گز شتہ چار ہفتوں میں یہ تیسری اسائنمنٹ ہے تاہم کپتان کے مطابق کھلاڑی تھکاوٹ کا شکار نہیں ہیں۔
میلبورن چیمپئنز ٹرافی میں اولمپک چیمپئن جرمنی اور بھارت جیسی ٹیموں کو ہرا کر کانسی کا تمغہ حاصل کرنے والی پاکستانی ٹیم کی عالمی درجہ بندی میں بھی خاطر خواہ بہتری آءی ہے۔ ٹیم اب نویں سے پانچویں نمبر پر پہنچ گئی ہے۔ اسی لیے پاکستانی کوچنگ پینل میں شامل سابق کپتان حنیف خان کے مطابق گرین شرٹس کے اچھے دن لوٹنے والے ہیں۔

مگر پاکستان کے مایہ ناز فاروڈ شکیل عباسی جنہیں حالیہ میلبورن چیمپئنز ٹرافی کا بہترین کھلاڑی قرار دیا گیا ہے اپنے کوچ کی اس بات سے بالکل اتفاق نہیں کرتے۔ شکیل عباسی نے اس بابت ڈوئچے ویلے کو بتایا کہ میلبورن میں بریک تھرو تو ملا مگر ہاکی کا اس سے احیاء نہیں ہوگا۔ میں بارہ برس سے پاکستان کی طرف سے کھیل رہا ہوں آج دنیا کا بہترین کھلاڑی قرار دیا گیا ہوں مگر میرے پاس نوکری نہیں ہے ان حالات میں میں کیسے کسی کو ہاکی کھیلنے کا مشورہ دے سکتا ہوں۔ انہوں نے کہا کہ میں کسی سے گلہ نہیں کر رہا کیونکہ شکایت کمزور لوگ کرتے ہیں اور عوام مجھے پسند کرتے ہیں اور میرے لیے یہی اصل اعزاز ہے۔
کپتان محمد عمران کو بھی چیمپئنز ٹرافی میں وکٹری اسٹینڈ پر آنے کے بعد حکومت کی جانب سے پزیرائی نہ ملنے کا گلہ ہے۔ عمران کا کہنا تھا کہ مزدور کو مزدوری پسینہ خشک ہونے سے پہلے ملنی چاہیے مگر وکٹری اسٹینڈ پر آنے کے باوجود ہمیں اب تک کسی نے نہیں پوچھا۔
ایشیئن چیمپئنز ٹرافی میں پاکستان کو پہلا میچ اکیس دسمبر کو جاپان کے خلاف کھیلنا ہے۔ چوبیس دسمبر کو پاکستان اور بھارت کی ٹیمیں دوحہ کے الریحان ہاکی اسٹیدیم میں مدمقابل آئیں گی جو جو ستاءیس دسمبر کو ہونیوالے فاءنل کی ڈریس رہیرسل ثابت ہوسکتا ہے۔
دریں اثنا اگلے ماہ بھارت میں کرکٹ کی آیہ پی ایل کی طر پر ہونیوالی انڈیا ہاکی لیگ کی کھلاڑیوں کی نیلامی میں محمد راشداور محمد توفیق سمیت آٹھ پاکستانی کھلاڑیوں کو دہلی اور ممبئی کی فرنچائز ٹیموں نے خرید لیا ہے۔

طارق سعید، لاہور

ادارت: عابد حسین