ہندو دھرم میں گائے کو ماں کا درجہ حاصل ہے۔ ہندو گھروں میں گائے کے گوبر سے فرش کی پُتائی کو متبرک سمجھا جاتا ہے۔ گائے سے حاصل ہونے والی پانچ چیزیں (دودھ، دہی، گھی، گوبر اور پیشاب) کافی اہم سمجھی جاتی ہیں۔ مودی حکومت نے ان پر سائنسی تحقیق کے لیے کروڑوں کے بجٹ مختص کیے ہیں۔

کورونا کی وجہ سے ہسپتالوں میں بھی افراتفری کا ماحول ہے۔ آکسیجن اور دواؤں کی کمی کی وجہ سے لوگ کورونا سے بچنے کے لیے گائے کا گوبر اور پیشاب کے لیپ لگوانے کے لیے گاؤشالاؤں میں پہنچ رہے ہیں۔

چند ماہ قبل دارالحکومت دہلی میں ایک ہندو تنظیم نے گاؤ موتر(گائے کا پیشاب) پینے کے لیے باضابطہ تقریب کا اہتمام کیا تھا۔

ہندوؤں کے ایک طبقے کا دعویٰ ہے کہ گائے کے پیشاب کے بے شمار طبی فائدے ہیں۔ اس کے پینے سے کورونا وائرس مر جاتا ہے۔

وزیر اعظم مودی کی آبائی ریاست گجرات کے احمد آباد میں ان دنوں ایک سینٹر میں گوبر سے باضابطہ علاج کیا جا رہا ہے۔ جسم پر پیشاب اور گوبر کا لیپ لگایا جاتا ہے اور اسے خشک ہونے دیا جاتا ہے۔ بعد میں اس شخص کو دودھ اور دہی سے نہلایا جاتا ہے۔

ڈاکٹروں کا کہنا ہے کہ اب تک اس حوالے سے کسی قسم کے سائنسی شواہد نہیں مل سکے ہیں کہ گائے کے پیشاب اور گوبر سے انسانوں کی قوت مدافعت میں اضافہ ہوتا ہو۔ ڈاکٹروں کے مطابق یہ صرف ’اعتقاد کا معاملہ اور گمراہی‘ ہے۔

ماہرین صحت نے تنبیہ کی ہے کہ گوبر اور پیشاب کا لیپ لگانے سے فائدے کے بجائے نقصان ہو سکتا ہے۔ ماہرین کے مطابق اس سے کورونا کے پھیلنے کے خدشات کے ساتھ ساتھ بلیک فنگس کا شکار ہو جانے کے خطرات بھی لاحق ہو سکتے ہیں۔

برا مت دیکھو، برا مت کہو اور برا مت سنو۔ یہ تصویر بھارت کے شہر احمد آباد میں یوگا کے عالمی دن سے چند روز قبل بنائی گئی۔ جہاں مسلم طالب علموں نے ایک اسکول میں یوگا کی کلاس میں شرکت کی۔

ملٹری پریڈ کی طرح یونیفارم میں تمام طالب علم ایک جیسے انداز میں یوگا کی ورزش کر رہے ہیں۔ کیا یوگا کے ذریعے ان بچیوں میں خود اعتمادی اور یکجہتی کا عنصر پیدا ہوگا؟ یہ بات قابل بحث ہے۔

یوگا، ایسا بھی دکھتا ہے۔ بھارتی شہر حیدرآباد میں یوگا ماہر پرتیبھا اگروال (درمیان میں) اور ان کی شاگردوں کے چہرے پر خوشی بخوبی دیکھی جا سکتی ہے۔ وہ ’ایرئل یوگا‘ یعنی فضائی یوگا کی ایک مشق کر رہی ہیں۔ اس مشق میں چھت سے بندھے ہوئے کپڑے کے ساتھ مختلف انداز میں لٹک کر کثرت کی جاتی ہے۔

عورتوں کا ٹانگيں پھيلا کر بيٹھنا، سر کے بل کھڑے ہونا اور جھکنا، يوگا کے چند اہم جزو ہيں۔ چھت سے بندھے کپڑے کے ساتھ لٹکنا بھی ایک مشکل ورزش ہے۔ یہ مشق صرف تجربہ کار ٹرینر کے ساتھ ہی کرنا چاہیے۔

يوگا ايک قديم روحانی ہندو روايت ہے لیکن اس کے تانے بدھ مت سے بھی ملتے ہیں۔ یوگا مختلف مقامات پر منفرد انداز میں کیا جاتا ہے جیسے کہ جنوبی افریقہ کے شہر ڈربن میں ساحل سمندر پر واقع ایک پارک میں جسم اور روح کے سکون کے لیے یوگا کیا جا رہا ہے۔

یوگا لفظ کا تعلق قدیمی ہندو زبان سنسکرت سے ہے، جس کے معنی سخت، کھردرے، یا پھر کھچے ہوا ہونا ہے جو کہ پر سکون رہنے کے بالکل برعکس ہے۔ شمالی میکسیکو کے شہر سیوداد خواریز کے صحرا میں بھی یوگا کی مشقیں جاری ہیں۔

جی ہاں، یوگا کی مشقوں کے متنوع اقسام ہیں، جیسے کہ ماضی میں الہ آباد کہلانے والے بھارتی شہر پرایاگراج میں یہ شخص یوگا کی ایک خاص مشق کر رہا ہے، جس میں درخت پر سکڑ کر لٹکا جاتا ہے۔

اس شخصیت کے بغیر آج شاید یوگا کا عالمی دن نہیں منایا جا سکتا تھا۔ بھارت کے وزیر اعظم نریندر مودی کی جدوجہد کے بعد سن 2014ء میں اقوام متحدہ نے 21 جون کو ’یوگا کا عالمی دن ‘ قرار دے دیا، کیونکہ ’عالمی صحت بھی ایک طویل المدتی ترقیاتی مقصد‘ ہے۔

’آل انڈیا ہندو یونین‘ نے بھارتی دارالحکومت نئی دہلی میں ہفتے کے دن کورونا وائرس سے بچنے کی خاطر گائے کا پیشاب پینے کی ایک خصوصی تقریب کا اہتمام کیا، جس میں کم ازکم دو سو ہندو افراد شریک ہوئے۔

بھارت میں کچھ ہندو گروپوں کا اصرار ہے کہ گائے کا پیشاب طبی لحاظ سے فائدہ مند ہے، اس لیے اسے پینے سے کورونا وائرس سے بچا جا سکتا ہے۔ اسی لیے اس تقریب میں خواتین کی ایک بڑی تعداد بھی موجود تھی۔

تقریب میں شامل ایک خاتون گائے کا پیشاب پیتے ہوئے۔ ہندو مت میں گائے کو مقدس قرار دیا جاتا ہے اور یہی وجہ سے کہ کچھ قدامت پسند ہندوؤں میں اس طرح کے فرسودہ خیالات رائج ہیں۔

تقریب میں شامل ایک ہندو پیشاب پیتے ہوئے۔ تاہم طبی ماہرین بارہا کہہ چکے ہیں کہ ایسے کوئی شواہد نہیں کہ گائے یا اونٹ کا پیشاب کینسر یا کسی دوسری بیماری کا علاج ثابت ہو سکتا ہے۔ عرب ممالک میں کچھ حلقے اونٹ کے پیشاب کو بھی طبی لحاظ سے شافی قرار دیتے ہیں۔

گائے کا پیشاب پینے کی پارٹی 'آل انڈیا ہندو یونین‘ کے نئی دہلی میں واقع صدر دفتر میں منعقد کی گئی تھی۔ منتظمین نے کہا ہے کہ اسی طرح کی پارٹیاں دیگر بھارتی شہروں میں بھی منعقد کی جائیں گی۔

’آل انڈیا ہندو یونین‘ کے سربراہ چکراپانی مہاراج نے اس تقریب کے دوران کورونا وائرس کے فرضی کیریکیچر (خاکے) کے ساتھ ایک تصاویر بھی بنوائی، جن میں وہ گائے کے پیشاب کا پیالہ تھامے نظر آ رہے ہیں۔ انہوں نے اس پیشاب کو کورونا وائرس کا توڑ قرار دیا ہے۔

اس پارٹی میں شریک ہونے والے اوم پرکاش نے روئٹرز سے گفتگو میں کہا، ''ہم گزشتہ اکیس برسوں سے گائے کا پیشاب پیتے آ رہے ہیں اور ہم گائے کے گوبر سے نہاتے بھی ہیں۔ ہمیں کبھی بھی انگریزی دوا لینے کی ضرورت نہیں پڑی ہے۔‘‘

طبی ماہرین کے علاوہ بھارت میں رہنے والے اکثریتی ہندوؤں کا کہنا ہے کہ گائے کا پیشاب یا گوبر طبی لحاظ سے کسی بیماری کا علاج نہیں ہو سکتا۔ تاہم حکمران ہندو قوم پرست بھارتیہ جنتا پارٹی کے متعدد رہنما وکالت کرتے ہیں کہ گائے کا پیشاب ایک دوا ہے اور اس سے بالخصوص کینسر کا علاج ممکن ہے۔

ریاست آسام میں وزیر اعظم نریندر مودی کی سیاسی جماعت سے تعلق رکھنے والے ایک سیاستدان نے حال ہی میں اسمبلی کے اجلاس کے دوران کہا تھا کہ کورونا وائرس سے بچنے کی خاطر گائے کا پیشاب اور گوبر سود مند ثابت ہو سکتا ہے۔

کووڈ انیس کو عالمی وبا قرار دیا جا چکا ہے، جس کی وجہ سے کم ازکم پانچ ہزار افراد ہلاک جبکہ ایک لاکھ پینتالیس ہزار کے لگ بھگ متاثر ہو چکے ہیں۔ گزشتہ دسمبر چین سے پھوٹنے والی اس وبا کا ابھی تک کوئی علاج دریافت نہیں کیا جا سکا ہے۔ تاہم طبی ماہرین کی کوشش ہے کہ اس بیماری کے خلاف جلد از جلد کوئی دوا تیار کر لی جائے۔