نیوجرسی کی ایک خاتون کو اس وقت انتہائی ناگوار تجربے کا سامنا کرنا پڑا، جب اسے نیپیوں کے دو ڈبے پوسٹ کے ‌ذریعے وصول ہوئے اور وہ دونوں ڈبے ہی پہلے سے استعمال شدہ نیپیوں سے بھرے ہوئے تھے۔

نیو جرسی شہر کی خاتون نیسلی سیلز کا میڈیا سے گفتگو کرتے ہوئے کہنا تھا کہ انہوں نے اپنی دو چھوٹی بچیوں کے لیے یہ نیپیاں آن لائن اشیاء فروخت کرنے والی بڑی کمپنی ایمازون سے خریدیں تھیں۔ یہ کمپنی نئی اشیاء کے ساتھ ساتھ سیکنڈ ہینڈ اشیاء بھی فروخت کرتی ہے۔ یہ اشیاء دیگر کی نسبت سستی ہوتی ہیں۔

جب اس خاتون نے نیپیوں والے ڈبے کو کھولا تو اسے احساس ہوا، انہیں تو پہلے ہی استعمال کیا جا چکا ہے کیوں کہ وہ پہلے سے آلودہ تھیں۔ اس خاتون کا اے بی سی نیوز سے گفتگو کرتے ہوئے کہنا تھا، ''میں نے جب نیپیوں والا ڈبا اٹھایا، تو وہ بھاری تھا۔ میں ابھی سو کر اُٹھی تھی اور لائٹ بھی بند تھی۔ جب میں نے لائٹ چلائی تو نیپیاں انتہائی ترتیب سے فولڈ کی گئی تھیں لیکن استعمال شدہ تھیں۔‘‘

دوسری جانب ایمازون کا کہنا ہے کہ وہ صارف کے ساتھ رابطے میں ہیں اور اس حوالے سے تفتیش شروع کر دی گئی ہے۔ متاثرہ خاتون کا کہنا تھا کہ اس نے مزید نیپیاں کھول کر نہیں دیکھیں لیکن وہ انسانی فضلے سے آلودہ اور انتہائی بدبودار تھیں۔

ایمازون کمپنی کے ایک ترجمان کا کہنا ہے کہ یہ ہر طرح سے ان کے معیارات کے خلاف ہے اور وہ اس حوالے سے صارف سے معافی بھی مانگ چکے ہیں۔ اس ترجمان کا کہنا تھا کہ وہ بہت جلد اس معاملے کی تہہ تک پہنچ جائیں گے۔

ا ا / ب ج ( اے ایف پی، روئٹرز)