لندن پولیس کی ایک ترجمان نے ڈی ڈبلیو سے بات کرتے ہوئے تصدیق کی ہے کہ نارتھ ویسٹ کے علاقے سے ایک پاکستانی نژاد ساٹھ سالہ شخص کو منی لانڈرنگ کے کیس میں گرفتار کیا گیا ہے تاہم انہوں نے کہا کہ وہ ملزم کا نام نہیں بتا سکتیں۔ پاکستانی میڈیا اور ڈی ڈبلیو کے ذرائع کے مطابق گرفتار ہونے والے الطاف حسین ہی ہیں۔ برطانوی پولیس لندن میں مقیم ایم کیو ایم کے سربراہ کے خلاف ’چار لاکھ پاؤنڈز‘ کی منی لانڈرگ کے ایک کیس اور ایم کیو ایم ہی کے لیڈر عمران فاروق قتل کیس میں تحقیقات جاری رکھے ہوئے تھی۔ اس خبر کے منظر عام پر آنے کے فوری بعد کراچی اسٹاک ایکسچینج 780 سے زائد پوائنٹس کی کمی دیکھی گئی جبکہ کراچی بھر کے کاروباری مراکز بند ہونا شروع ہو گئے ہیں۔

گزشتہ ہفتے ایم کیو ایم ہی کے ایک لیڈر فاروق ستار نے کہا تھا کہ لندن میں ان کے قائد الطاف حسین کے بینک اکاؤنٹس منجمد کر دیے گئے ہیں۔ انہوں نے اپنے کارکنوں سے برطانوی حکومت کے خلاف ’پرامن احتجاج‘ جاری رکھنے کی اپیل کی تھی۔

قبل ازیں لندن کی میٹروپولیٹن پولیس نے کہا تھا کہ عمران فاروق قتل کیس کے سلسلے میں مارے گئے چھاپوں کے دوران انہیں ’کافی رقم‘ ملی ہے۔ اس کے بعد الطاف حسین کے خلاف منی لانڈرنگ کا کیس شروع کر دیا گیا تھا۔

دوسری جانب متحدہ قومی موومنٹ نے اپنے کارکنوں کو کراچی میں نائن زیرو کہلانے والے اپنے مرکز میں طلب کرتے ہوئے کہا ہے کہ الطاف حسین کو گرفتار نہیں کیا گیا اور ان سے گھر پر ہی پوچھ گچھ کی گئی ہے۔ کراچی پولیس کے مطابق شہر میں برطانوی سفارتخانے کی سکیورٹی بڑھا دی گئی ہے۔ مزید تفصیلات ابھی موصول ہو رہی ہیں۔