سوات میں گزشتہ انتخابات کے مقابلے میں خواتین کی ایک بڑی تعداد انتخابات میں حصہ لے رہی ہیں۔ خیبر پختونخوا صوبے اور قبائلی علاقوں میں انتخابات میں خواتین کی شرکت ہمیشہ سے مشکلات کا شکار رہی ہے۔

پاکستان میں ہونے والے ان تاریخی انتخابات میں نوجوانوں کی شرکت کو بڑے ٹرن آؤٹ کی ممکنہ وجہ قرار دیا جا رہا ہے۔

ان انتخابات میں آٹھ کروڑ سے زائد افراد اپنا حق رائے دہی استعمال کر رہے ہیں جن میں ایک بہت بڑی تعداد نوجوان ووٹروں کی ہے۔

پاکستان کے جنوب مغربی صوبے بلوچستان کے بعض علاقوں میں انتخابات کے حوالے سے انتہائی گرم جوشی کا مظاہرہ دیکھنے میں آیا۔ اس صوبے میں علیحدگی پسندوں کی جانب سے عوام کو انتخابات میں شرکت سے خبردار کیا گیا تھا۔

ملک کے ان تاریخی انتخابات کی شفافیت کی جانچ کے لیے غیرملکی مبصرین کے علاوہ مختلف بین الاقوامی صحافی بھی پاکستان پہنچے ہیں۔

طالبان عسکریت پسندوں کی جانب سے دہشت گردانہ کارروائیوں کی دھمکیوں اور متعدد مقامات پر پیش آنے والے پرتشدد واقعات کے تناظر میں صوبے میں متعدد مقامات پر سڑکیں عام ٹریفک کے لیے بند ہیں جب کہ سکیورٹی کے سخت انتظامات کیے گئے ہیں۔

پشاور سمیت ملک کے متعدد مقامات پر پولنگ اسٹیشنوں پر ہونے والے حملوں میں متعدد افراد ہلاک اور زخمی ہوئے ہیں۔ ہفتے کے روز پشاور میں ہونے والے ایک بم دھماکے میں بھی کئی افراد زخمی ہوئے۔

ان تاریخی انتخابات میں عوام میں خاصی دلچسپی کا اظہار دیکھنے میں آیا ہے اور ماضی کے برخلاف اس مرتبہ زیادہ ٹرن آؤٹ کی توقع کی جا رہی ہے۔ مبصرین کا کہنا ہے کہ زیادہ ٹرن آؤٹ کی ایک وجہ انتخابات میں نوجوانوں کی شرکت بھی ہے۔

کراچی سمیت ملک کے متعدد مقامات سے یہ شکایات بھی سامنے آ رہی ہیں کہ عملے کی کمی اور بدانتظامی کی وجہ سے کئی پولنگ اسٹیشنوں پر ووٹنگ کا آغاز مقررہ وقت سے کئی گھنٹے بعد شروع ہو سکا۔

ان انتخابات میں ماضی کے مقابلے میں اس مرتبہ خواتین بھی اپنے حق رائے دہی کے استعمال میں آگے آگے نظر آ رہی ہیں۔

سابق پاکستانی وزیراعظم اور پاکستان پیپلز پارٹی سے تعلق رکھنے والے امیدوار برائے قومی اسمبلی علی حیدر گیلانی کے اغوا کے واقعے کو مقامی پولیس نے دہشت گردی کی کارروائی قرار دیا تھا۔ اس کے علاوہ بھی متعدد دیگر سیاستدانوں کو دہشت گردانہ حملوں کا نشانہ کرنا پڑا

دہشت گردانہ کارروائیوں سے سب سے زیادہ متاثر ہونے والے صوبے خیبرپختونخوا کے دارالحکومت پشاور میں خواتین ایک پولنگ اسٹیشن میں قطار بنائے اپنی اپنی باری کا انتظار کر رہی ہیں۔

موجودہ انتخابات کے موقع پر ملک کے سب سے بڑے شہر کراچی سمیت ملک کے متعدد مقامات سے بیلٹ باکسز اور دیگر انتخابی مواد نہ پہنچنے کی اطلاعات سامنے آ رہی ہیں۔ کراچی میں جماعت اسلامی سمیت دیگر تین جماعتوں نے انتخابات کے بائیکاٹ کا اعلان کر دیا ہے۔

پاکستان میں ہونے والے ان انتخابات میں تقریبا ستر ہزار پولنگ اسٹیشن قائم کیے گئے ہیں جن میں سے نصف کو حساس قرار دیتے ہوئے سکیورٹی اہلکاروں کی بڑی نفری تعینات کی گئی ہے۔ تاہم پھر بھی متعدد مقامات سے بدنظمی اور بدانتظامی سمیت دھاندلی کی اطلاعات سامنے آئی ہیں۔