مولانا سمیح الحق کے بیٹے مولانا حامد الحق نے بتایا ہے کہ اُن کے والد اپنے گھر پر آرام کر رہے تھے کہ نامعلوم افراد اُن کے کمرے میں داخل ہوئے اور انہیں چھریوں کے وار کر کے شدید زخمی کر دیا۔ اِس واردات کے وقت مذہبی سیاسی رہنما کے ڈرائیور اور محافظ گھر کے باہر موجود تھے۔ اس طرح اُن پر نامعلوم افراد کی فائرنگ کی اطلاع غلط ثابت ہوئی ہے۔ مولانا حامد الحق کے مطابق جب ڈرائیور اور گن مین کمرے میں لوٹے تو مولانا سمیع الحق خون میں لت پت پائے گئے۔

پہلے یہ بتایا گیا تھا کہ جمیعت علمائے اسلام (س) کے رہنما مولانا سمیع الحق   کی کار پر راولپنڈی میں فائرنگ کی گئی ، جس کی زد میں آ کر وہ ہلاک ہو گئے ہیں۔ اُن کی جماعت کی پشاور شاخ کے صدر مولانا حصیم نے اپنے رہنما کی ہلاکت کی تصدیق کر دی ہے۔ یہ بھی بتایا گیا تھا کہ مولانا سمیع الحق کے ساتھ اُن کا ڈرائیور اور محافظ بھی شدید زخمی ہوئے تھے۔

مولانا سمیع الحق مشہور مذہبی شخصیت مولانا عبدالحق کے صاحبزادے تھے۔ ان کے والد اور مولانا فضل الرحمان کے والد مفتی محمود نے جمیعت علمائے اسلام کو ملکی سیاست کے دھارے میں ایک مرکزی مقام دلانے کی کوشش کی اور کامیاب بھی رہے۔ مولانا عبدالحق اور مفتی محمود کی رحلت کے بعد اُن کے صاحبزادگان سیاسی جماعت کو متحد رکھنے میں ناکام رہے اور یہ گروپوں میں تقسیم ہو کر رہ گئی۔

مولانا سمیع الحق افغان طالبان کے بہت قریب خیال کیے جاتے تھے۔ افغان طالبان بھی انہیں انتہائی معتبر حیثیت سے دیکھتے تھے۔ اُن کی مذہبی درسگاہ دارالعلوم حقانیہ پاکستانی شمال مغربی سرحدی صوبے خیبر پختونخوا کے مقام اکوڑہ خٹک میں واقع ہے۔ کہا جاتا ہے کہ افغان طالبان کے بانی اور سابق سربراہ ملا عمر نے اسی مدرسے سے دینی تعلیم حاصل کی تھی۔  سمیع الحق کی عمر تقریباًً 80 برس تھی۔ وہ انیس سو اٹھاسی سے دارالعلوم حقانیہ کے سربراہ تھے۔