شاکر اپنے گاؤں میں چوتھی جماعت کا طالب علم تھا۔ اب وہ ابلے ہوئے انڈے فروخت کرتا ہے۔ اس کا کہنا ہے کہ اس کو جتنا بھی منافع ملتا ہے، وہ اپنی والدہ کے پاس جمع کروا دیتا ہے تاکہ وہ عید کے موقع پر اس کے لیے اور اُس کی چھوٹی بہن کے لیے نئے کپڑے خرید سکے۔

دنیا بھر کے مسلمان رمضان کے روزے رکھنے کے بعد عید کا تہوار مناتے ہیں۔ چھوٹی عید یا عید الفطر منانے میں بچے پیش پیش ہوتے ہیں۔ مہندی، چوڑیاں، نئے کپڑے اور نئے جوتے پہن کر ہر شخص کی یہ خواہش ہوتی ہے کہ وہ اپنے گھر والوں کے ساتھ عید کی خوشیاں منائے لیکن اس سال وزیرستان سے نقل مکانی کرنے والے لاکھوں افراد گھر سے دور بے سر و سامانی کے عالم میں عید منا رہے ہیں۔

نائلہ کی عمر 12 سال ہے۔ اس نے بتایا کہ ان کی عید اس دن ہو گی جب حکومت ان کو واپس اپنے گاؤں جانے کی اجازت دے گی۔ اس کو اپنی بکریاں یاد آتی ہیں، جنہیں وہ میرعلی ہی میں چھوڑ آئی ہے۔

تین سالہ سدرہ ہر وقت کیمپ میں مقیم دوسرے بچوں کو کہتی ہے کہ اس کے ابو اور چچا عید پر اس کو لینے آئیں گے اور اسے نئے کپڑے، بالیاں اور چوڑیاں خرید کر دیں گے لیکن سدرہ کی والدہ کا کہنا ہے کہ ان دونوں کا گزشتہ ایک مہینے سے کچھ اتہ پتہ نہیں ہے اور یہ کہ اب تو رفتہ رفتہ ان کے زندہ ہونے کی امیدیں بھی دم توڑتی جا رہی ہیں۔ سدرہ کا والد اور چچا کرفیو کی وجہ سے میران شاہ میں پھنس گئے تھے۔

پانچ سالہ سیف اللہ اس بات پر بہت خوش ہے کہ اس کا نانا اسے جوتے خریدنے کے لیے بنوں شہر کے بازار لے کر آیا ہے۔ وہ کہتا ہے کہ میرعلی سے سفر کے دوران اس کے چپل راستے میں گم ہو گئے تھے اور وہ آج تک بغیر چپل کے پھر رہا تھا۔ وہ کہتا ہے کہ وہ ابھی بھی ان نئے جوتوں کو استعمال نہیں کرے گا بلکہ اب انہیں عید پر ہی پہنے گا۔

کیمپ میں رہائش پذیر بچے دن بھر والدین کی راہ تکتے رہتے ہیں کہ وہ شام کو ان کے لیے کس قسم کی اشیاء لے کر آئیں گے، جو وہ ممکنہ طور پر عید پر پہن سکیں گے۔ چار سالہ شکیلہ کا کہنا ہے کہ اس کا والد اس کے لیے نئے سرخ رنگ کے کپڑے لے کر آئے گا:’’وہ روز وعدہ کرتے ہیں لیکن آج وہ ضرور لائیں گے‘‘۔

فائزہ کی چوڑیاں پہنے کی خواہش اس وقت پوری ہوئی جب ایک سرکاری افسر نے فائزہ کو روتے ہوئے دیکھ کر سو روپے دیے۔ اسے بازار لانے والے اس کے بھائی کا کہنا ہے کہ اس نے چوڑیاں لینے کی ضد اس لیے کی کیونکہ پڑوس کی بچیوں نے بھی عید کے لیے چوڑیاں خریدی تھیں۔

عباد کو کرکٹ کھیلنے کا بہت شوق ہے۔ اس کا پسندیدہ کھلاڑی شاہد آفریدی ہے۔ عباد کہتا ہے کہ اس کی عید تو اسی دن ہو گئی تھی، جب عمران خان کے لوگوں نے اس کو کھیلنے کے لیے ایک بیٹ دیا تھا۔ وہ صرف سہ پہر کو اپنے دوستوں کے ساتھ کیمپ میں کھیلتا ہے کیونکہ دن کے وقت بہت گرمی ہوتی ہے۔

بصوبانہ پاک آرمی اور بحریہ ٹاؤن کا شکریہ ادا کرتے ہوئے کہتی ہے:’’میں ان دونوں اداروں کی بہت شکر گزار ہوں، انہوں نے مجھے سلائی مشین اور کپڑا دیا، اس کی وجہ سے اب عید پر اپنےاور بچوں کے لیے نئے کپڑوں کی فکرختم ہو چکی ہے۔‘‘

اپنے آبائی گاؤں دتہ خیل سے کوہاٹ نقل مکانی کرنے والے گلزار کا کہنا ہے کہ اس کا دتہ خیل میں لاکھوں روپوں کا ہول سیل کا کاروبار تھا۔ وہ کہتا ہے کہ حکومت نے انہیں نکلنے کے لیے صرف تین دن کا وقت دیا تھا جس کے دوران وہ صرف اپنے خاندان کو محفوظ مقام تک پہنچا پایا۔ اب وہ ایک مقامی تاجر کے ساتھ مل کر چنے بیچ رہا ہے اور یوں اپنے پانچ بچوں کو پال رہا ہے:’’میرے لیے یہ عید کسی ڈراؤنے خواب سے کم نہیں ہے‘‘۔

شمالی وزیرستان سے نقل مکانی کرنے والے لوگوں میں زیادہ تر تعداد معصوم بچوں کی ہے۔ فاٹا ڈیزاسٹر منیجمنٹ اتھارٹی کے مطابق آئی ڈی پیز میں لگ بھگ چار لاکھ بچے شامل ہیں، جنہوں نے اپنے والدین کے ہمراہ ہجرت کی ہے۔ ان بچوں کو اپنی پڑھائی بھی منقطع کرنا پڑی ہے اور کوئی نہیں جانتا کہ یہ بچے اپنا یہ نقصان کیسے پورا کر پائیں گے۔

نقل مکانی کرنے والے بچوں کے والدین کا کہنا ہے کہ وہ لوگ وزیرستان میں عید الفطر کے تہوار کو ہمیشہ جوش وخروش سے مناتے رہے ہیں لیکن اس سال صورت حال مختلف ہے۔ عید منانا اور بچوں کی خواہشات پوری کرنا تو دور، ان کی روزمرہ کی ضروریات پوری نہیں ہو رہی کیونکہ انہیں جنگ کی وجہ سے سب کچھ چھوڑ چھاڑ کر آنا پڑا ہے۔ وہ کہتے ہیں کہ یہاں اُن کا سارا وقت امدادی سامان کا انتظار کرتے گزرتا ہے۔

مختلف سرکاری ، غیرسرکاری اور فلاحی ادارے بے گھر لوگوں کی مدد کرنے میں مصروف ہیں۔ عید کی مناسبت سے راشن کے ساتھ ساتھ عید کی مناسبت سے بچوں کے لیے کھلونے اور دوسری اشیاء بھی تقسیم کی جا رہی ہیں، جن کے حصول کے لیے والدین کو گھنٹوں انتظار کرنا پڑتا ہے۔