اٹالانٹا یونانی دیو مالا میں عسکری دیوی کا نام ہے اور یہی نام ہے یورپی یونین کے اُس مشن کا، جس کے تحت سن 2008ء کے اواخر سے صومالیہ کے ساحلوں کے قریب سمندر میں بحری قزاقوں کے خلاف مشن کسی قدر کامیابی کے ساتھ جاری ہے۔ اگرچہ اس دوران بحر ہند کے مغربی حصے میں اغوا کیے جانے والے بحری جہازوں کی تعداد میں کمی آئی ہے لیکن یہ سلسلہ مکمل طور پر تھمنے میں ابھی نہیں آیا۔ بحری قزاقی کے پیچھے کارفرما عناصر نے اپنے اڈے سیاسی انتشار کے شکار صومالیہ میں قائم کر رکھے ہیں اور وہاں سے قزاقی کا نفع بخش کاروبار جاری رکھے ہوئے ہیں۔ اب ان قزاقوں سے سمندر کے اندر ہی نہیں بلکہ خشکی پر بھی نمٹا جا سکے گا لیکن صرف ساحل کے ساتھ ساتھ سمندر سے زیادہ سے زیادہ دو ہزار میٹر کے فاصلے پر اور وہ بھی صرف اور صرف فضا سے۔

زمینی لڑائی خارج از امکان نہیں

زمین پر کارروائی کی اصولی طور پر اجازت نہیں ہے لیکن اٹالانٹا مشن کو خشکی تک توسیع دینے میں بہرحال خطرات پنہاں ہیں اور فوجیوں کی زندگیوں کو لاحق اِنہی ممکنہ خطرات کی بناء پر کئی ایک پارلیمانی اراکین نے توسیع کی مخالفت کی ہے۔ ہیلی کاپٹر اور جاسوس طیارے ٹینک شکن راکٹوں کا نشانہ بن سکتے ہیں، جن کی خانہ جنگی کے شکار صومالیہ میں کوئی کمی نہیں ہے۔ ماضی میں ہیلی کاپٹر ریت کے طوفانوں کی وجہ سے بھی گر کر تباہ ہو چکے ہیں۔ ظاہر ہے ایسی صورتحال میں خصوصی یونٹوں کو اِن گمشدہ فوجیوں کی تلاش میں خشکی پر بھی جانا پڑے گا۔ یوں جرمن فوج کے سپاہی خشکی پر جھڑپوں میں بھی ملوث ہو سکتے ہیں اور اُس طرح کے ہولناک مناظر حقیقت کا روپ دھار سکتے ہیں، جن کی عکاسی 1993ء کی امریکی فلم ’بلیک ہاک ڈاؤن‘ میں کی گئی ہے، جس میں ایک امریکی فوجی ہیلی کاپٹر کو اُس کے عملے سمیت صومالی دارالحکومت موغادیشو میں مار گرایا جاتا ہے۔

خشکی پر قزاقوں کا تعاقب کس حد تک فائدہ مند ثابت ہو گا؟

پہلے بھی قزاقوں نے ثابت کیا ہے کہ کتنی تیزی سے وہ خود کو نئے حالات کے مطابق ڈھال لیتے ہیں۔ ساحلی علاقوں کی چیکنگ بڑھ جانے کے بعد قزاقوں نے سمندر میں زیادہ دور تک جا کر جہاز اغوا کرنا شروع کر دیے تھے۔ آیا خشکی پر بھی جا کر اُن کے تعاقب کے کوئی مثبت نتائج برآمد ہوں گے، یہ بات یقین سے نہیں کہی جا سکتی۔ اب ساحلوں کے قریب خشکی پر کارروائی ہونے کے بعد وہ اپنے اڈے ملک کے دور دراز عقبی حصوں میں منتقل کر سکتے ہیں۔

انسانی ڈھالیں

ایک اور خطرہ یہ ہے کہ قزاق انسانوں کو بطور ڈھال استعمال کر سکتے ہیں۔ اس صورت میں بھی فوجیوں کے ہاتھ بندھے ہوں گے۔ صومالیہ ایک ناکام ریاست کے طور پر مسلمان انتہا پسندوں کی آماجگاہ بن چکا ہے اور انتہا پسند تو یہی چاہیں گے کہ یورپی فوجی خشکی پر آ کر جھڑپوں میں ملوث ہوں تاکہ مقامی آبادی مغربی دُنیا اور غیر ملکی فوجیوں کے خلاف ہو جائے۔ ایسا ہوا تو بھی اٹالانٹا مشن میں توسیع کا کوئی فائدہ نہیں ہو گا۔ قزاق نہیں چاہتے کہ صومالیہ میں حالات مستحکم ہوں لیکن ہم یورپی ایسا ضرور چاہتے ہیں۔ بہتر حل یہ ہے کہ صومالیہ کے ساحلی تحفظ کے اپنے ایک مؤثر نظام کو جلد از جلد عملی شکل دی جائے۔

Scheschkewitz/aa/hk