ایتھوپیا کے دارالحکومت ادیس ابابا سے بدھ 25 مارچ کو ملنے والی رپورٹوں کے مطابق قرن افریقہ کے خطے سے ہزارہا تارکین وطن اپنے لیے بہتر اقتصادی مستقبل کی خاطر جس سمندری راستے سے جزیرہ نما عرب کا رخ کرتے ہیں، وہ ماہرین کے مطابق ''مشرقی روٹ‘‘ کہلاتا ہے۔

لیکن تین ماہ قبل ختم ہونے والے سال 2025ء میں یہ سمندری راستہ ایسی بے قاعدہ مہاجرت کرنے والے انسانوں کے لیے غیر معمولی حد تک جان لیوا ثابت ہوا۔

بحیرہ روم سانحہ: 2023ء کے حادثے پر اٹلی میں عدالتی کاروائی کا آغاز

گزشتہ برس اس راستے پر چھوٹی بڑی کشتیوں میں غیر محفوظ سمندری سفر کرنے والے تارکین وطن میں سے جتنے انسان مارے گئے، ان کی تعداد اس سے ایک سال پہلے کے مقابلے میں دو گنا ہو کر 922 ہو گئی، جو ایک نیا لیکن بہت تشویشناک ریکارڈ ہے۔

اقوام متحدہ کے اعداد و شمار

ادیس ابابا میں اقوام متحدہ کے ترک وطن سے متعلق ادارے، بین الاقوامی ادارہ برائے مہاجرت (آئی او ایم) کی طرف سے بتایا گیا کہ ہر سال ایتھوپیا، صومالیہ اور خطے کے دیگر غربت زدہ ممالک سے بیسیوں ہزار تارکین وطن بحیرہ احمر پار کر کے جزیرہ نما عرب تک پہنچنے کی کوشش کرتے ہیں۔

یہ سفر زیادہ تر جبوتی سے شروع ہو کر یمن میں ختم ہوتا ہے۔ اس راستے پر اپنی زندگیوں کو داؤ پر لگا دینے والے تارکین وطن کی خواہش ہوتی ہے کہ وہ کسی طرح خلیج کے خطے کے امیر عرب ممالک تک پہنچ جائیں تا کہ وہاں مزدوروں یا گھریلو ملازمین کے طور پر کام کر سکیں۔

یورپی یونین میں غیر قانونی مہاجرت روکنے کے لیے مزید سختیاں

اس بارے میں جبوتی میں آئی او ایم کے مشن کی سربراہ تانیا پاسیفیکو نے نیوز ایجنسی اے ایف پی کو بتایا، ''سمندر کے راستے ترک وطن کے ایسٹرن روٹ پر سفر کے دوران ہلاکتوں کی تعداد کے لحاظ سے 2025ء تاریخ کا سب سے ہلاکت خیز سال ثابت ہوا۔ اس دوران 922 افراد یا تو مارے گئے یا مختلف حادثات کے بعد سمندر میں لاپتا ہو گئے۔ یہ تعداد 2024ء کے مقابلے میں دو گنا بنتی ہے۔‘‘

اسپین: لاکھوں غیرقانونی تارکینِ وطن کو قانونی حیثیت دینے کا منصوبہ

تانیا پاسیفیکو نے بتایا کہ ہلاک یا لاپتا ہونے والے تارکین وطن میں سب سے بڑی تعداد ایتھوپیا کے باشندوں کی تھی، جو اپنے 130 ملین سے زائد شہریوں کے ساتھ براعظم افریقہ کا دوسرا سب سے بڑی آبادی والا ملک ہے، لیکن جسے طویل عرصے سے شدید غربت اور کئی طرح کے داخلی تنازعات کا سامنا ہے۔

خطے کی حکومتوں کے ساتھ مل کر کام کرتے رہنے کا عزم

بین الاقوامی ادارہ برائے مہاجرت کے جبوتی میں مشن کی سربراہ نے بتایا، ''آئی او ایم اس بات کا تہیہ کیے ہوئے ہے کہ وہ آئندہ بھی جبوتی اور خطے کے دیگر ممالک کی حکومتوں کے ساتھ مل کر کام کرتا رہے گا تاکہ ترک وطن کے محفوظ اور باوقار طریقوں کی ترویج کی جا سکے اور مستقبل میں بڑی تعداد میں ایسی انسانی ہلاکتوں جیسے نئے المیوں سے بچا جا سکے۔‘‘

جرمنی، برلن تارکین وطن کو تیسرے ممالک بھیجنے پر غور

یورپی یونین کے ممالک میں مہاجرین کی ملک بدری تیز تر کرنے کی دوڑ

قرن افریقہ سے بحیرہ احمر پار کر کے ہر سال جزیرہ نما عرب تک پہنچنے والے افریقی تارکین وطن میں سے بڑی تعداد کا ایک المیہ یہ بھی ہوتا ہے کہ وہ یمن پہنچنے کے بعد وہیں پر پھنس کر رہ جاتے ہیں۔

یمن جزیرہ نما عرب کا غریب ترین ملک بھی ہے اور اسے تقریباﹰ ایک دہائی سے اپنے ہاں خونریز خانہ جنگی کا سامنا بھی ہے۔ ان حالات میں بہت سے افریقی تارکین وطن تو یمن سے ہی واپس اپنے آبائی ممالک کا رخ کرنے کا فیصلہ بھی کر لیتے ہیں۔

بعض یورپی ممالک میں تارکینِ وطن پر حملوں میں اضافہ

تانیا پاسیفیکو نے بتایا، ''ایتھوپیا میں معاشی ترقی کی رفتار اب کافی زیادہ ہے، جو اس سال 10 فیصد تک رہنے کی امید ہے۔ اس ترقی کی وجہ سے وہاں سے ترک وطن کا رجحان آئندہ کم ہو سکتا ہے۔‘‘

’’تاہم منفی بات یہ ہے کہ ایتھوپیا میں افراط زر کی شرح بھی بہت زیادہ ہے، جو گزشتہ ماہ 10 فیصد رہی تھی۔‘‘

ادارت: شکور رحیم