اس تقریب میں ساٹھ خواتین کو سستے داموں ’سی ڈی 70 ڈریم‘ موٹر سائیکلیں فراہم کی گئیں۔ یہ موٹر سائیکلیں لاہور، فیصل آباد، سرگودھا، ملتان اور راولپنڈی سے تعلق رکھنے والی خواتین کو فراہم کی گئی ہیں۔

مصنف اور اداکارہ میرا سیٹھی نے بھی اس ریلی میں شرکت کی۔ سیٹھی نے سوشل میڈیا ویب سائٹ انسٹاگرام پر اپنی تصویر شیئر کرتے ہوئے لکھا کہ لاہور کی سٹرکوں پر خواتین موٹر سائیکل سوار کتنی اچھی لگیں گی۔ یہ پیشرفت خواتین کی خود مختاری اور روز مرہ زندگی میں ان کی شمولیت کی ایک نئی مثال قائم کرے گی۔ سیٹھی نے لکھا کہ وہ جانتی ہیں کہ یہ تھوڑا مشکل ہے لیکن پاکستان کی بہادر عورتیں یہ کر سکتی ہیں۔

گلوکارہ میشا شفیع بھی اس ریلی میں شریک تھیں۔ انہوں نے اپنی تصویر ٹوئٹر پر شیئر کرتے ہوئے لکھا کہ کس نے کہا ہے کہ وہ کینیڈا چلی گئی ہیں، یہ لاہور کی سٹرک ہے۔ انہوں نے لکھا، ’’ویمن آن وہیلز ریلی میں ان بہادر خواتین کے ساتھ موٹر سائیکل چلا کر مجھے بہت اچھا لگا ہے۔‘‘ شفیع نے ابھی حال ہی میں معروف گلوکار علی ظفر پر جنسی ہراسانی کا الزام عائد کیا تھا اور افواہ تھی کہ وہ ملک چھوڑ کر کینیڈا چلی گئی ہیں۔

ویمن آن وہیلز مہم لاہور، ملتان ، فیصل آباد، راولپنڈی اور سرگودھا میں شروع کی جا چکی ہے اور اب تک اس مہم کے تحت 3500 خواتین کو موٹر سائیکل چلانا سکھایا جا چکا ہے۔

ریلی میں بڑی تعداد میں خواتین نے شرکت کی۔ اس موقع پر سماجی کارکنان بھی موجود تھے۔

افغانستان میں امریکا کے زیر سربراہی بین الاقوامی فوجی اتحاد نے سن 2001 میں طالبان حکومت کا تختہ الٹ دیا تھا، جس کے بعد سے ملک میں خواتین کے حقوق کی صورتحال نے ایک نیا موڑ لیا۔ تاہم موجودہ افغان حکومت میں طالبان کی ممکنہ نمائندگی کا مطلب ہے کہ خواتین ایک مرتبہ پھر تعلیم اور روزگار جیسے بنیادی حقوق سے محروم ہو جائیں گی۔

ایرانی خواتین کی ایک فٹ بال ٹیم تو بن چکی ہے لیکن وہاں آزادی اور خودمختاری کی لڑائی آج بھی جاری ہے۔ ایرانی وکیل نسرین سوتودیہ کو پانچ برس قید کی سزا سنائی گئی کیونکہ وہ اسکارف کی پابندی کے خلاف مظاہرہ کرنے والی خواتین کا دفاع کر رہیں تھیں۔

یہ پاکستان کی پہلی کار مکینک عظمٰی نواز (درمیان میں) کی تصویر ہے۔ یہ جنوبی ایشیائی ملک خواتین کی آزادی کے راستے پر گامزن ہے۔ خواتین کے عالمی دن کے موقع پر کراچی میں خواتین ’عورت آزادی مارچ‘ #AuratAzadiMarch میں شرکت کر رہی ہیں۔

بھارت میں ’خواتین بائیکرز‘ کا رجحان تیزی سے بڑھ رہا ہے۔ ایسے مثبت اقدام کے باوجود خواتین جنسی تشدد اور ریپ کا نشانہ بنتی ہیں۔ گزشتہ برس، بھارت میں متعدد خواتین نے اپنے حقوق کے دفاع کے لیے آواز بلند کی۔ #MeToo مہم کے ذریعے متاثرہ خواتین معاشرے کے طاقتور مردوں کے خلاف سراپا احتجاج تھیں۔

انڈونیشی خواتین ملکی ترقی کا اہم حصہ ہیں لیکن ان کو قدامت پسند مذہبی قوانین کا سامنا ہے۔ مثال کے طور پر آچے صوبے میں شرعی قوانین نافذ کیے جانے کے بعد خواتین کو اسکارف پہننے پر مجبور کیا گیا اور خواتین کا نا محرم مردوں سے بات چیت کرنا ممنوع قرار دیا گیا۔

سری لنکا میں صنفی مساوات کی صوتحال قدراﹰ بہتر ہے۔ سری لنکن خواتین تعلیم اور روزگار کا انتخاب خود کر سکتی ہیں۔ جنوبی ایشیا میں سری لنکا شاید واحد ایسا ملک ہے، جہاں خواتین کو صحت اور تعلیمی سہولیات تک بھرپور رسائی حاصل ہے۔

بنگلہ دیشی عوام دو دہائیوں سے زائد عرصے سے ایک خاتون کا بطور وزیراعظم انتخاب کر رہے ہیں۔ ان کے دور حکومت میں خواتین کے حقوق میں واضح بہتری پیدا ہوئی ہے۔ تاہم روزگار کی منڈی میں خواتین کی نمائندگی ابھی بھی کم ہے اور صحت و تعلیم تک محدود رسائی ہے۔

چینی خواتین کو بلاشبہ ملک کی تیز معاشی ترقی سے فائدہ حاصل ہوا ہے لیکن ان کو سماج میں امتیازی سلوک کا سامنا ہے۔ آج بھی بچیوں کی پیدائش کے حوالے سے سماجی تعصب موجود ہے۔ خواتین کو مردوں کے مقابلے میں تعلیم تک محدود رسائی فراہم کی جاتی ہے۔