میڈرڈ کے سپر اسٹار رونالڈو بنیادی طور پر پرتگال سے تعلق رکھتے ہیں۔ وہ ہمیشہ ایک شان اور تمکنت کے ساتھ فٹ بال کے میدان میں داخل ہوتے ہیں۔ اپنی بے پناہ صلاحیتوں پر بجا طور پر فخر کرنے والے رونالڈو نے ہسپانوی فٹ بال لیگ میں سب سے زیادہ یعنی اکتیس گول کیے ہیں۔ پرتگال کی قومی ٹیم نے رونالڈو ہی کے شاندار کھیل کے باعث سویڈن کو شکست دے کر برازیل کے ورلڈ کپ کے لیے کوالیفائی کیا۔

ارجنٹائن کا یہ کھلاڑی چیمپئنز لیگ کے تین اعزازات حاصل کرنے کے ساتھ ساتھ چار مرتبہ دنیا کا بہترین فٹ بال کھلاڑی چُنا گیا ہے۔ میسی بارسلونا کے لیے 277 لیگ میچوں میں 243 گول کر چکا ہے۔ بین الاقوامی اور کپ میچوں میں کیے جانے والے گول اس کے علاوہ ہیں۔ میسی نے اپنی قومی ٹیم کے لیے بھی گول کیے ہیں لیکن توقعات سے کم۔ میسی کے ساتھ ارجنٹائن کی ٹیم زیادہ سے زیادہ 2008ء کا اولمپک ٹورنامنٹ ہی جیت پائی ہے۔

نیمار میزبان ملک برازیل کی سب سے بڑی امید ہے اور یہ کھلاڑی بھی اپنے ملک کو چھٹی مرتبہ عالمی چیمپئن بنانے کا خواب رکھتا ہے۔ پچھلے موسم گرما کے دوران کنفیڈریشن کپ میں نیمار کے پھرتیلے حملوں سے پتہ چلتا تھا کہ وہ ایسا کرنے کی صلاحیت بھی رکھتا ہے۔

یہ اطالوی کھلاڑی میدان میں کبھی انتہائی بُرا بن کر سامنے آتا ہے اور کبھی ایک شرمیلا بچہ بن جاتا ہے۔ وہ کئی مرتبہ اپنے ٹرینرز کو پریشانی سے دوچار کر چکا ہے۔ تاہم اطالوی قومی ٹیم کے کوچ سیزارے پرانڈیلی کو اُس پر مکمل اعتماد ہے۔ بالوٹیلی اس اعتماد کا شکریہ زیادہ سے زیادہ گول کر کے ادا کرتا ہے جیسا کہ اُس نے دو سال پہلے یورپی چپیمپئن شپ کے سیمی فائنل میں جرمنی کے خلاف کیا۔

چار برس پہلے کے عالمی کپ میں یوروگوئے کے یہ دو کھلاڑی (دائیں جانب سواریس) اپنی ٹیم کو سیمی فائنل تک لے جانے میں کامیاب ہوئے تھے۔ اُس کے بعد سے یہ کھلاڑی اور بھی خطرناک ہو چکے ہیں۔ سواریس بہترین فارم میں ہے اور ایف سی لیورپول کے لیے کھیلتے ہوئے تینتیس لیگ مقابلوں میں اکتیس گول کر چکا ہے۔ کاوانی (بائیں) پیرس کے لیے تینتالیس میچوں میں پچیس گول کر چکا ہے۔

بوسنیا ہیرزیگووینا کی ٹیم پہلی مرتبہ عالمی کپ میں حصہ لے رہی ہے لیکن یہ ٹیم اپنے گروپ میں ایران، نائجیریا اور ارجنٹائن کے خلاف جیت بھی سکتی ہے۔ اس سلسلے میں ٹیم کے بہترین کھلاڑی ایڈین جَیکو اہم کردار ادا کر سکتے ہیں، جن کی شاندار کارکردگی ہی کی بدولت یہ ٹیم برازیل پہنچی ہے۔ 28 سالہ جَیکو ہی کی بدولت مانچسٹر سٹی کی ٹیم بھی انگلش پریمیئر لیگ جیتنے میں کامیاب ہوئی ہے۔

ایڈین جَیکو کے ہمراہ انگلش پریمیئر لیگ جیتنے والا ارجنٹائن کا یہ کھلاڑی اپنی قومی ٹیم میں لیونیل میسی کے ساتھ مل کر مخالف ٹیموں کے دفاع میں دراڑ ڈالنے کی کوشش کرے گا۔ فٹ بال ماہرین سرجیو آگوئیرو کو، جو کُون بھی کہلاتا ہے، سب سے زیادہ ورسٹائل سٹرائیکر سمجھتے ہیں۔ آگوئیرو نے ’سٹیزنز‘ کے لیے صرف چونتیس میچ کھیلے لیکن اٹھائیس گول کیے۔

ہالینڈ کی ٹیم بھی ورلڈ کپ میں حصہ لے رہی ہے اور کچھ ماہرین کے نزدیک یہ ٹیم ورلڈ کپ جیت بھی سکتی ہے۔ چار سال پہلے منعقدہ ورلڈ کپ میں یہ ٹیم دوسرے نمبر پر رہی تھی۔ اس بار اس ٹیم میں مانچسٹر یونائیٹڈ کے لیے کھیلنے والے روبن فان پیرسی (بائیں) اور جرمنی کی شالکے ٹیم کے لیے کھیلنے والے کلاس ژان ہنٹے لار (دائیں) کی صورت میں دو بہترین کھلاڑی میدان میں ہوں گے۔

اس ورلڈ کپ میں بیلجیم کی ٹیم کی جانب سے بھی عمدہ کارکردگی کی توقع کی جا رہی ہے، جس کی بڑی وجہ اس ٹیم میں رومیلو لوکاکو جیسے شاندار کھلاڑی کی موجودگی ہے۔ اکیس سالہ لوکاکو نے انگلش پریمیئر لیگ میں ایف سی ایورٹن کے لیے ایک اچھا سیزن کھیلتے ہوئے پندرہ گول کیے۔ نئے سیزن میں وہ واپس ایف سی چیلسی میں چلے جائیں گے۔

انگلینڈ کے اس کھلاڑی کے لیے گزشتہ سیزن زیادہ اچھا نہیں رہا۔ رُونی کی ٹیم مانچسٹر یونائیٹڈ سیزن ختم ہونے پر محض ساتویں نمبر پر آئی تاہم رُونی کی انفرادی کارکردگی شاندار رہی ہے۔ چالیس میچوں میں رُونی نے 19 گول کیے۔

چھتیس سال کی عمر میں بھی ڈیڈیئر ڈروگبا کو آئیوری کوسٹ کے سپر اسٹار کی حیثیت حاصل ہے۔ ڈروگبا کے برعکس آئیوری کوسٹ کی ’گولڈن جنریشن‘ کے کئی کھلاڑی قصہء ماضی بن چکے ہیں۔ گالاتاسارائے استنبول کے لیے کھیلنے والے ڈروگبا غالباً اپنے کیریئر کا آخری ورلڈ کپ کھیلیں گے۔

جرمن ٹیم کا یہ کھلاڑی اب تک ورلڈ کپ مقابلوں میں چَودہ گول کر چکا ہے۔ اگر اِس بار کلوزے نے ایک بھی اور گول کر لیا تو وہ رونالڈ کا سب سے زیادہ یعنی پندرہ گول کرنے کا ریکارڈ برابر کر دے گا۔ حال ہی میں 36 سالہ کلوزے نے 132بین الاقوامی میچوں میں جرمن ٹیم کے لیے سب سے زیادہ یعنی 69 گول کرنے کا نیا ریکارڈ قائم کیا۔ اس سے پہلے گیرڈ ملر نے جرمنی کی نمائندگی کرتے ہوئے 68 گول کیے تھے۔