خبر رساں ادارے اے ایف پی نے برسلز سے موصولہ رپورٹوں کے حوالے سے بتایا ہے کہ جمعے کے دن حراست میں لیے گئے انتیس سالہ مہدی نیموش نے چالیس سکینڈ کا ایک ویڈیو پیغام ریکارڈ کیا تھا، جس میں اس نے چوبیس مئی کو برسلز میں واقع ایک یہودی میوزیم پر حملے کی ذمہ داری قبول کی۔

اس میوزیم پر ہوئے حملے میں ایک اسرائیلی جوڑا اور ایک فرانسیسی خاتون ہلاک ہو گئی تھی۔ اگرچہ اس حملے کا ملزم اپنی پرتشدد کارروائی کے بعد فرار ہونے میں کامياب ہو گیا تھا تاہم جمعے کے دن پولیس نے اس کو گرفتار کر لیا تھا۔

اتوار کو استغاثہ نے تصدیق کی کہ اس ملزم سے ایک کلاشنکوف اور ایک ہینڈ گن بھی برآمد ہوئی ہے۔ بتایا گیا ہے کہ اس کے قبضے سے ایک ایسی ویڈیو بھی ملی ہے، جس میں اس نے اس شوٹنگ کی ریکارڈنگ کی تھی۔ بعدازاں نیموش نے اپنے اسلحے کے ساتھ ایک اور ویڈیو بنائی تھی۔

بیلجیم کے دارالحکومت میں منعقد ہوئی ایک پریس کانفرنس میں پراسیکیوٹر فریڈرک فان لیو نے بتایا کہ اس دوسری ویڈیو میں ملزم نے میوزیم پر حملہ کرنے کا دعویٰ کیا۔ تاہم ان کا کہنا تھا کہ وہ فوری طور پر اس امر کی تصدیق نہیں کر سکتے کہ اس ویڈیو میں آواز نیموش کی ہی ہے۔

اتوار کے دن ہی پیرس میں منعقد ہوئی ایک پریس کانفرنس میں دفتر استغاثہ کے ایک اعلیٰ اہلکار فرانسوا مؤلنز نے بتایا ہے کہ نیموش سے ایک ایسا کپٹرا بھی برآمد ہوا ہے، جس پر عربی زبان میں ’اسلامک اسٹیٹ آف عراق و شام‘ کا نام لکھا ہوا ہے۔ انہوں نے مزید کہا کہ نیموش نے شام میں ایک برس قیام کیا تھا اور اس کے مبینہ طور پر جہادی گروہ ’اسلامک اسٹیٹ آف عراق و شام‘ سے روابط تھے۔

فرنسوا مؤلنز نے بتايا کہ نیموش کو بینک میں ڈاکا ڈالنے کے جرم میں پانچ برس کی قید بھی سنائی گئی تھی اور اسے دسمبر 2012ء میں رہا کیا گیا تھا۔ اطلاعات کے مطابق جنوری 2013ء میں وہ شام چلا گیا تھا اور مشتبہ طور پر وہاں خانہ جنگی کا حصہ بھی بنا رہا۔

نیموش کے گھر والوں نے اس کی گرفتاری پر تشویش کا اظہار کرتے ہوئے کہا ہے کہ وہ کم گو لیکن نقصان پہنچانے والا ہر گز نہیں ہے۔ اس کی خالہ نے اے ایف پی کو بتایا، ’’نیموش ایک اچھا، ذہین اور پڑھا لکھا شخص ہے اور اس نے ایک برس یونیورسٹی میں تعلیم بھی حاصل کی ہے۔‘‘ ان کا کہنا تھا کہ نیموش کا کنبہ اس تمام واقعے پر دھچکے کا شکار ہے۔ ان کے بقول نیموش نے نہ تو کبھی مسجد کا رخ کیا تھا اور نہ ہی مذہب کے بارے میں بات کرتا تھا۔