يورپی ملک بيلجيم کے ايک چھوٹے سے شہر يپريس ميں آج بروز جمعرات يورپی يونين کے اٹھائيس رکن ممالک کے رہنما جمع ہو رہے ہيں۔ 1914ء تا 1918ء تک جاری رہنے والی پہلی عالمی جنگ کے دوران يہ شہر اسٹريٹيجک لحاظ سے کافی اہميت کا حامل تھا اور يہی وجہ ہے کہ اس شہر کی تاريخ قتل عام اور خون سے بھری ہوئی ہے۔

آج اسی شہر ميں يورپی يونين کے رکن ملکوں کے رہنما پہلی عالمی جنگ کی ياد ميں منعقدہ ايک تقريب ميں شرکت کريں گے۔ بعد ازاں يورپی رہنما بلاک کی آئندہ پانچ سالوں کی پاليسياں طے کرنے کے ليے ايک عشائيے ميں شريک ہوں گے۔ يوں دو دن دورانيے کے اُس گرما گرم مشاورتی عمل کا آغاز ہو گا، جس ميں يورپی يونين کے کئی اہم منصبوں کے حوالے سے فيصلے کيا جانا ہيں۔

اس سمٹ ميں سب سے اہم معاملہ يورپی کميشن کے آئندہ صدر کی باقاعدہ نامزدگی کا ہے۔ برطانوی وزير اعظم ڈيوڈ کيمرون کميشن کے صدر کے طور پر لکسمبرگ کے سابق وزير اعظم ژاں کلود يُنکر کے خلاف ہيں۔ کيمرون کا کہنا ہے کہ گزشتہ ماہ منعقدہ يورپی انتخابات ميں دائيں بازو کی جماعتوں کی نماياں کارکردگی کے نتيجے ميں اب يونين ميں اصلاحات کا عمل لازمی ہے اور يُنکر اس ناگزير عمل کو پيچيدہ بنا ديں گے۔ تاہم ايسا معلوم ہوتا ہے کہ کيمرون اپنی کاوشوں ميں اکيلے ہی ہيں۔

ہالينڈ کے وزير اعظم مارک روٹے اور اُن کے سويڈش ہم منصب فريڈرک رائن فيلڈ نے اپنی اپنی پارليمانوں کو مطلع کر ديا ہے کہ وہ يورپی کميشن کی صدارت کے منصب کے ليے يُنکر کی نامزدگی کی حمايت کريں گے۔ جرمن چانسلر انگيلا ميرکل پہلے ہی متعدد مرتبہ يُنکر کی حمايت کا اظہار کر چکی ہيں۔ اب بظاہر يُنکر کی مخالفت ميں کيمرون کے واحد حامی ہنگری کے وکٹر اوبان ہی نظر آتے ہيں۔

مرکز سے بائيں بازو کی طرف جھکاؤ رکھنے والی يورپی قوتيں فرانس اور اٹلی بھی يُنکر ہی کی حمايت کر رہی ہيں۔ تاہم اُن کا مطالبہ ہے کہ آئندہ پانچ سالوں کے ليے اقتصادی نمو اور روزگار کے مواقع پيدا کرنے پر خصوصی توجہ دی جائے۔ اطالوی وزير اعظم ماتيو رينزی يُنکر کی حمايت اس ليے بھی کر رہے ہيں کيونکہ وہ اٹلی ميں لاگو سخت بچتی پاليسيوں ميں نرمی کے خواہاں ہيں۔ يہ پاليسياں يورو زون کے مالی بحران کے تناظر ميں برسلز کی جانب سے متعارف کرائی گئی تھيں۔

آج سے شروع ہونے والی اس سمٹ کے حوالے سے بات چيت کرتے ہوئے ايک يورپی سفات کار کا کہنا تھا، ’’يہ سمٹ جذبات، واقعات اور مواد سے بھرپور ہو گی۔‘‘