لندن سے آمدہ رپورٹوں کے مطابق وزیر داخلہ مے نے پیر کی شام یہ اعلان بھی کیا کہ اس بارے میں بھی جامع چھان بین کرائی جائے گی کہ 80 کے عشرے میں بچوں سے جنسی زیادتیوں کے الزامات اور ان کی تفتیش کے حوالے سے عوامی اداروں اور ان کے اہلکاروں نے کس طرح کا رویہ اپنائے رکھا۔

Theresa May نے پارلیمان سے خطاب کرتے ہوئے کہا، ’‘حکومت بچوں سے جنسی زیادتیوں کے واقعات کی مکمل تحقیقات کے لیے اپنی ہر ممکن کوشش کرے گی تاکہ ذمہ داران کا تعین کیا جا سکے اور انہیں سزائیں دلوائی جا سکیں۔‘‘ خبر ایجنسی ڈی پی اے کے مطابق اس عمل کے دوران جس ایک معاملے کا نئے سرے سے بھرپور جائزہ لیا جائے گا، وہ یہ ہے کہ 1983ء میں خود برطانوی وزارت داخلہ نے رکن پارلیمان جیفری ڈکنز کی اِس وزارت کو مہیا کردہ مفصل دستاویزات پر کیا کارروائی کی تھی۔ کہا جاتا ہے کہ برٹش ہوم آفس کو جیفری ڈکنز کی مہیا کردہ دستاویزات میں آٹھ طاقتور عوامی شخصیات پر جنسی زیادتیوں کے سلسلے میں انتہائی ’دھماکا خیز‘ الزامات عائد کیے گئے تھے۔

اس پس منظر میں ماضی کے حالات و واقعات کے حوالے سے زیادہ پریشان کن بات گزشتہ ویک اینڈ پر سامنے آنے والی یہ رپورٹیں تھیں کہ برطانوی وزارت داخلہ نے 100 سے زائد اہم فائلیں گم کر دی ہیں۔ یہ فائلیں مختلف اراکین پارلیمان پر لگائے جانے والے بچوں سے جنسی زیادتیوں کے الزامات سے متعلق تھیں اور ان میں جیفری ڈکنز کی طرف سے ہوم آفس کو مہیا کردہ دستاویزات بھی شامل تھیں۔

ٹیریسا مے نے ارکان پارلیمان کو بتایا کہ جس کثیرالجہتی اور جامع انکوائری کا اعلان انہوں نے کیا ہے، اس کی سربراہی پیٹر وینلیس کریں گے۔ Peter Wanless برطانیہ میں بچوں سے بدسلوکی کے خلاف قومی تنظیم کے سربراہ ہیں۔ اس انکوائری کے نتائج آٹھ سے لے کر آئندہ دس ہفتوں تک سامنے آ جائیں گے۔ اس کے علاوہ پیٹر وینلیس برطانوی وزارت داخلہ کے اس اندرونی جائزے کا بھی نئے سرے سے تنقیدی جائزہ لیں گے، جس میں ہوم آفس نے اپنے طور پر سرکردہ سیاسی شخصیات کی طرف سے بچوں سے جنسی زیادتیوں کے واقعات سے متعلق حقائق تک پہنچنے کی کوشش کی تھی۔

اس کے علاوہ ایک اور جامع انکوائری اس بارے میں ہو گی کہ ماضی میں قومی سطح کے برطانوی پبلک ادارے، مثال کے طور پر بی بی سی اور نیشنل ہیلتھ سروس، بچوں سے جنسی زیادتیوں کے الزامات سامنے آنے کے بعد ان سے کس طرح نمٹتے رہے ہیں۔ برطانوی وزیر اعظم ڈیوڈ کیمرون کے بقول مختلف پہلوؤں سے یہ مفصل چھان بین اس لیے ضروری ہے کہ ماضی کے حالات و واقعات سے سبق سیکھا جا سکے۔

برطانیہ میں بچوں سے جنسی زیادتیوں کا موضوع گزشتہ دو برسوں کے دوران شاید ہی کبھی میڈیا کی شہ سرخیوں سے دور رہا ہے۔ خاص طور پر برطانوی نشریاتی ادارے بی بی سی کے انتہائی کامیاب ٹیلی وژن میزبان جمی سیویل کی موت کے بعد سے اب تک سینکڑوں افراد ان الزامات کے ساتھ منظر عام پر آ چکے ہیں کہ وہ ذاتی طور پر جمی سیویل کے ہاتھوں جنسی زیادتیوں کا نشانہ بنے تھے۔