جمعے کے روز سنی شدت پسند تنظیم اسلامک اسٹیٹ کی جانب سے انٹرنیٹ پر ایک ویڈیو جاری کی گئی تھی، جس میں برطانوی امدادی کارکن ایلن ہیننگ کا سر قلم کرتے دکھایا گیا تھا۔ اس ویڈیو کی برطانوی حکومت کی جانب سے تصدیق کر دی گئی ہے۔ اس سے قبل بھی اسلامک اسٹیٹ تین مغوی مغربی باشندوں کے سر قلم کرنے کی ویڈیوز جاری کر چکی ہے۔

امریکی صدر باراک اوباما کی جانب سے جمعے کے روز جاری کردہ ایک بیان میں کہا گیا ہےکہ امریکا دہشت گرد گروہ اسلامک اسٹیٹ کے ہاتھوں ایلن ہیننگ کے ’ظالمانہ قتل‘شدید مذمت کرتا ہے۔ بیان میں مزید کہا گیا ہے۔ ’ہیننگ شامی عوام کی زندگیوں میں بہتری کے لیے امدادی کام میں مصروف تھے اور ان کی موت سے ان افراد، ان کے اہل خانہ اور برطانوی عوام کا نقصان ہوا ہے۔ بیان میں صدر اوباما کی جانب سے کہا گیا ہے کہ امریکا اپنے برطانوی ساتھیوں اور دیگر اتحادی ممالک کے ساتھ مل کر ایلن ہیننگ کے قاتلوں کو انصاف کے کٹہرے میں لائے گا، جب کہ جم فولی، سٹیون سوٹلوف اور ڈیوڈ ہینس کے قاتلوں کو بھی انصاف کا سامنا کرنا ہو گا۔

اس سے قبل برطانوی وزیراعظم ڈیوڈ کیمرون نے بھی اس قتل کی شدید الفاظ میں مذمت کی اور اس عزم کا اظہار کیا کہ برطانیہ اسلامک اسٹیٹ کے خلاف اپنی کارروائیاں جاری رکھے گا۔

واضح رہے کہ جمعے کے روز جاری کردہ اس ویڈیو میں ہیننگ اس صحرائی علاقے میں اورنج رنگ کے لباس میں گھنٹوں کے بل بیٹھے دکھائی دیے جب کہ ان کے قریب ایک نقاب پوش عسکریت پسند نے خنجر اٹھا رکھا تھا۔ اس ویڈیو میں ہیننگ کے آخری الفاظ تھے، ’ہماری پارلیمان کی جانب سے اسلامک اسٹیٹ کے خلاف حملوں کے فیصلے کی وجہ سے میں، برطانوی عوام کے ایک رکن کی طور پر اس فیصلے کی یہ قیمت ادا کر رہا ہوں۔‘

ان کے ساتھ کھڑے سیاہ لباس میں ملبوس عسکریت پسند نے ہیننگ کا گلا کاٹنے سے قبل کہا، ’ڈیوڈ ہائنز کا خون تمہارے ہاتھ میں تھا کیمرون اور ہیننگ کا خون برطانوی پارلیمان کے سر ہے۔‘ اس کے بعد یہ عسکریت پسند خنجر لیے مغوی کے گلے کی جانب بڑھتا ہے۔

برطانوی وزارت خارجہ کی جانب سے اس ویڈیو پر ردعمل میں کہا گیا ہے کہ اگر یہ ویڈیو سچی ہے تو یہ ایک اور بھیانک قتل ہے۔ ’ہم متاثرہ خاندان کو تمام ممکنہ مدد کی پیشکش کر رہے ہیں۔‘

واضح رہے کہ شدت پسند تنظیم اسلامک اسٹیٹ شام اور عراق کے ایک بڑے علاقے پر قابض ہے اور امریکا اپنے اتحادی ممالک کے ساتھ مل کر اس تنظیم کے خلاف فضائی کارروائیوں جاری رکھے ہوئے ہے۔ اس سے قبل ترک پارلیمان نے بھی ایک قرارداد میں حکومت کو اسلامک اسٹیٹ کے خلاف فوجی کارروائی کرنے کی اجازت دے دی تھی۔